2 SAMUEL 17 - Hakcipta - Biatah Bidayuh

Hushai Nggen Pinyitayan adi Sarah di Absalom

¹ Dŭh tui ripas anŭ, Ahithophel nang di Absalom, “Bada aku mien simŭng duwŭh ribu naan daya, ka sikambŭh aku matak di nyerang David.

² Aku re nyerang ayŭh darŭm ayŭh mbŭh kawŭk buang dŭh bigaya. Ayŭh re taru, ka sopŭrŭg daya-i re bu. Aku re siŭ kaŭs-i raja

³ ka komŭnŭ sopŭrŭg daya-i aku re taban ka kuu, nimun pingaten dayung pari ka banŭh-i. Kuu raan siŭ ndi naan daya adŭ; bara adi bŭkŭn dŭh re mani mani.”

⁴ Pinyitayan anŭ sak adi kana di Absalom ka di sopŭrŭg pinguru daya Israel.

⁵ Absalom nang, “Bagan Hushai, ata suba dingah tung jangi pinganang.”

⁶ Kan Hushai mandŭg, Absalom nang di ayŭh, “Anŭ inŭh pinyitayan adi Ahithophel mbŭh nggen di kieh; bisa kah kieh tunda-i? Kambŭi dŭh, kuu kidaan di kieh ani patut ami ndai.”

⁷ Hushai nam, “Pinyitayan adi Ahithophel nggen di angān saba ati dŭh-i kana.

⁸ Kuu puan nang sama mu David ngga bara daya-i daya adi pandai birawan; tambah dinge ngara mangah keya ka sindŭ buāng adi mbŭh asa anak-i. Sama mu soldadu adi pandai birawan ka dŭh-i rŭŭ briyŭn ngga daya-i singarŭm.

⁹ Madin tong-i kadŭ ayŭh mbŭh bisukan di darŭm tang puan kah di tarun bŭkŭn. Pasu David nyerang daya mu, asi asi adi dingah taŭn re nang daya mu mbŭh arah.

¹⁰ Ka daya adi siabo pagan mun singah meh re taru sabab sopŭrŭg daya di Israel puan nang sama mu soldadu adi timagah ka bara daya-i taŭn daya adi pandai birawan.

¹¹ Jadi pinyitayan ku inŭh kuu taban sopŭrŭg daya Israel so bŭngŭn rais ndi ndŭg bŭngŭn rais andi bada tikuruk, ka kiang ngara kiang sumat di pang rawŭt, ka adŭp mu taban ngara di biperang.

¹² Kieh re jiroh David di barang yŭn-i, ka nyerang ayŭh diŭ so-i puan ani kayuh adi jadi. Mating re dŭm bait-i ayŭh puan kah daya-i.

¹³ Kambŭi ayŭh bu ka darŭm kupo, sopŭrŭg daya ta re taban taris ka tarik kupo anŭ ka darŭm dau di sagān. Ndi panggar batuh mating gŭh re dŭm di tibung sandah anŭ.”

¹⁴ Absalom ngga sopŭrŭg daya Israel nang, “Pinyitayan Hushai agi kana dŭ so tung Ahithophel.” TUHAN mbŭh natu nang pinyitayan Ahithophel dŭh bisa dog pakai, isa pinyirusag nyatŭk Absalom.

David dog Bakan ka Mbŭh di Bisukan

¹⁵ Ripas anŭ Hushai kidaan di imam Zadok ngga Imam Abiathar pinyitayan adi-i ko nggen di Absalom ngga di bara pinguru Israel ka pasar pinyitayan so Ahithophel.

¹⁶ Hushai nang, “Rikas, madin! Pait pinganang ka David bada dŭh nyirŭmŭn di pang sungi anŭ di tarun tana-pajam, pak rikas mutas yang Jordan, isa ayŭh ngga bara daya-i dŭh dog nakap ka dog siŭ.”

¹⁷ Jonathan anak Abiathar ngga Ahimaaz anak Zadok agi kajŭn di rubang piin Enrogel, di sapa Jerusalem, sabab ngara dŭh raan dog kiris mŭrŭt kupo anŭ. Ndi naan daya-gaji adi dayung, siraru-i di ka kidaan di ngara kayuh adi mbŭh jadi, ka komŭnŭ ngara di kidaan di Raja David.

¹⁸ Pak ndi andu ndi naan anak dari tipia kiris ngara, ka-i rasu kidaan di Absalom; jadi ngara rikas di bisukan di ramin ndi naan daya dŭn Bahurim. Ayŭh biyŭn ndi prigi sindŭk ramin-i, ka ngara duwŭh mūn ka darŭm-i.

¹⁹ Sawŭn daya anŭ tambit ndi kayuh adi ngga nutu, mamad-i di baba prigi anŭ ka ren gandom di tunduh-i, isa daya dŭh rada ani ani dieh.

²⁰ Bara pinurung Absalom mandŭg ka ramin daya anŭ ka siken di dayung anŭ, “Diki Ahimaaz ngga Jonathan?” “Ngara mbŭh mutas yang anŭ,” ayŭh nam. Bara pinurung anŭ jiroh ngara pak dŭh tungang dapŭd, jadi ngara pari ka Jerusalem.

²¹ Kan ngara mbŭh bu, Ahimaaz ngga Jonathan ruah so prigi anŭ ka rasu di kidaan di Raja David. Ngara kidaan di ayŭh kayuh adi Ahithophel mbŭh ndai ngga rawan ayŭh ka nang, “Rikas mutas Yang anŭ.”

²² Jadi David ngga bara daya-i rasu mutas yang Jordan, ka ngga isan isan sopŭrŭg ngara mbŭh ndŭg parad mandi-i.

²³ Kan Ahithophel kinyam pinyitayan-i dŭh dog tunda, ayŭh na tapas-pinyiguru di tunduh kaldi-i ka pari ka kupo adŭp-i. Ripas-i muko nyirase sopŭrŭg kayuh-i, ayŭh tangid adŭp-i. Ayŭh dog kubur di kubur rawang-i.

²⁴ David mbŭh ndŭg kupo Mahanaim di tika Absalom ngga bara daya Israel mbŭh mutas yang Jordan. (

²⁵ Absalom mbŭh bada Amasa jadi pingubak bara soldadu gati Joab. Amasa inŭh anak Jether daya Ishmael; sindŭ-i Abigail, adi anak Nahash ka sude dayung Zeruiah adi sindŭ Joab.)

²⁶ Absalom ngga bara daya-i bibari di tarun tana Gilead.

²⁷ Kan David mbŭh ndŭg Mahanaim, ayŭh bidapŭd ngga Shobi anak Nahash so kupo Rabbah di Ammon, ka bidapŭd ngga Machir anak Ammiel so Lodebar, ka bidapŭd ngga Barzillai so Rogelim di Gilead.

^28-29 Ngara taban makuk, priok tana, ngga ambok, samŭn pinguman yŭn David ngga bara daya-i: gandom, jeri, pinguman, sirandang gandom, kasang, kasang bireh, ju banyis, chis, krim ngga kudu kudu pŭrŭng biri. Ngara puan David ngga bara daya-i re sibŭrŭk, badŭh asŭng, ka kawŭk di tarun tana-pajam.