2 SAMUEL 16 - Hakcipta - Biatah Bidayuh

David ngga Ziba

¹ Kan David mbŭh mua juan-i rewan tibung sandah anŭ, ayŭh tipia bidapŭd ngga Ziba, daya-gaji Mephibosheth, adi agi taban ndi pasang kaldi kabis 200 baru ruti, siratus bŭtŭs buwa anggor adi pisŭk, siratus bŭtŭs buwa adi tibŭn, ka ndi bŭrŭh-kurit adi puno ngga wain.

² Raja David siken ayŭh, “Re mu simuki ngga sopŭrŭg kayuh anŭ?” Ziba nam, “Kaldi kaldi ati inŭh yŭn rawang Tuan Raja, ruti ngga buwa ati inŭh yŭn bara daya mai man, ka wain ati inŭh re ngara nok kan ngara mbŭh kawŭk di tarun tana-pajam.”

³ “Diki Mephibosheth, sukuh tuan mu Saul?” raja siken ayŭh. “Ayŭh rŭŭ di Jerusalem,” Ziba nam, “sabab ayŭh puan nang bara daya Israel re nggen pari di ayŭh pritah babai-i Saul.”

⁴ Raja nang di Ziba, “Sopŭrŭg kayuh adi Mephibosheth dapu inŭh jamu.” “Aku ati daya-gaji mai,” Ziba nam. “Isa-i aku ari pimunos asŭng mai Tuan Raja.”

David ngga Shimei

⁵ Kan Raja David mbŭh ndŭg Bahurim, ndi so bara madis Saul, Shimei anak Gera, mandŭg di tudu ayŭh buang-i mangu ayŭh.

⁶ Shimei rasu migarang batuh ka David samŭn bara pinurung-i, sunggu David dog kirurung bara daya-i ka bara pingibān-i.

⁷ Shimei mangu ayŭh ka nang, “Bu so ti! Bu so ti! Pinyiŭ! Pinyamun!

⁸ Kuu tambit pritah Saul, ka madin Tapa mbŭh ngukum kuu amai daya darŭm rawang Saul bagŭ muko mu siŭ. TUHAN mbŭh nggen pritah mu ka anak mu Absalom, ka kuu inŭh mbŭh rusag, kuu adi pinyiŭ!”

⁹ Abishai, adi sama-i Zeruiah, nang di raja, “Tuan Raja, mani kaam tandah kasong ati mangu kaam? Bada aku di kamanŭ ka kapŭg ubak-i!”

¹⁰ “Ati dŭh har mu,” raja nang di Abishai ka di jurud-i Joab. “Kambŭi ayŭh mangu aku sabab TUHAN bada ayŭh ndai simŭnŭ, mating daya biyŭn kuasa re siken mani ayŭh ndai simŭnŭ?”

¹¹ Ka David nang di Abishai ka di sopŭrŭg bara pinurung-i, “Anak adŭp ku an siŭ aku; jadi simuki meh angān re gŭgŭh kiris urah daya Benjamin ati? TUHAN bada ayŭh mangu aku; tandah ayŭh ka awang adŭp-i ndai simŭnŭ.

¹² Kadŭ TUHAN re kiris pinyusah ku ka nggen di aku berkat ngga gati pangu-i.”

¹³ Jadi David ngga bara daya-i pijuu pimanu ngara. Shimei tunda ngara, panu kadŭg bŭngŭn sandah; ayŭh mangu buang migarang batuh ngga tana ka ngara buang-i panu.

¹⁴ Raja ngga sopŭrŭg daya-i mbŭh raru kawŭk kan ngara mbŭh ndŭg Jordan, ka diginŭ ngara rŭŭ ka guru.

Absalom di Jerusalem

¹⁵ Absalom ngga sopŭrŭg daya Israel adi ngga ayŭh mŭrŭt Jerusalem, ka Ahithophel agi gŭh ngga ngara.

¹⁶ Kan Hushai, jerā adi David sabah, bidapŭd ngga Absalom, ayŭh nyirais nang, “Siramat ambu umbur ka tuan raja! Siramat ambu umbur ka tuan raja!”

¹⁷ “Munki meh pinyitŭtŭd mu madin di jerā mu David?” Absalom siken ayŭh. “Mani kuu dŭh tunda ayŭh?”

¹⁸ Hushai nam, “Simuki aku re bisa tunda ayŭh? Aku tunda sianŭ adi TUHAN mbŭh mien, adi bara daya ati mbŭh mien, ka adi sopŭrŭg daya Israel mbŭh mien. Aku re babŭ ngga kaam.

¹⁹ Asi boh re ku yŭn bituan, kambŭi dŭh di anak tuan ku? Nimun aku muko bituan di sama mu, simŭnŭ gŭh madin aku bituan di kaam.”

²⁰ Komŭnŭ Absalom bigiring nura Ahithophel ka nang, “Madin ata mbŭh digiti, ani meh pinyitayan mu yŭn kieh?”

²¹ Ahithophel nam, “Panu di guring ngga dayung dayung nyikŭn sama mu adi-i tingge bada jaga istana. Simŭnŭ bara daya di Israel re puan nang sama mu mbŭh nyirundeng kuu pinganyu-i, ka bara pinunda mu re rabis dog ngatat.”

²² Jadi ngara ndai bari yŭn Absalom di tibung istana, ka di sirung jawin daya bagŭ Absalom nyibŭŭs ngga dayung dayung nyikŭn sama-i.

²³ Tadŭ tadŭ pinyitayan so Ahithophel di jaman anŭ dog trima keya ka pinganang so adŭp Tapa; So-duwŭh ngara, David ngga Absalom tunda-i.