2 SAMUEL 15 - Hakcipta - Biatah Bidayuh

Absalom Bisatur an Rawan Pritah

¹ Ripas anŭ, Absalom sidia krita kuda ka kuda kuda yŭn adŭp-i, ka rimŭh puru naan daya adi tukang nguru adŭp-i.

² Ayŭh ari makat awar ka di mijog di bŭngŭn aran di tiban-bās kupo. Kan tadŭ tadŭ daya murah re bada raja ngatur kaii-i, Absalom bagan ayŭh ka siken so ki ayŭh. Ka ripas daya anŭ ko kidaan di ayŭh so tibaran-asar aki ndi ayŭh,

³ Absalom ari nang, “Ukum-adat tura ka parad mu, pak mating pingarun raja adi tukang dingah pinyusah mu.”

⁴ Ka ayŭh ari gŭh nang, “Kasi kah aku ati akim! Kambŭi daya mandŭg ka yŭn ku taban kaii puan kah pimite-i, aku bisa turung ayŭh.”

⁵ Kan daya mandŭg tudu Absalom ka mutu ubak ka ayŭh, Absalom ari tudu daya anŭ, dakŭp ayŭh, ka sium ayŭh.

⁶ Absalom ndai simŭnŭ di barang naan daya Israel adi mandŭg an ngadu kayuh ka raja, ngapŭi meh ngara nundok di ayŭh.

⁷ Kan-i mbŭh ripas pat sawa, Absalom nang di Raja David, “Tuan, bada aku di ka Hebron di sita janji adi aku muko ndai ngga TUHAN.

⁸ Sitadŭn aku rŭŭ di Geshur di Syria, aku bijanji ngga TUHAN nang kambŭi Ayŭh bada aku pari ka Jerusalem, aku an nyambah Ayŭh di Hebron.”

⁹ “Kuu bisa di,” raja nang di ayŭh. Jadi Absalom di ka Hebron.

¹⁰ Pak ayŭh pait pinyisung ka sopŭrŭg daya Israel bada nang, “Kan angān dingah jawŭn trompet, angān nyirais nang, ‘Absalom mbŭh jadi raja di Hebron!’ ”

¹¹ Mbŭh agi duwŭh ratus naan daya adi muko dog bagan Absalom mbŭh sua ngga ayŭh so Jerusalem; ngara dŭh puan ani ani pasar pekat anŭ pak matak ngga sanang asŭng.

¹² Ka sitadŭn Absalom jugan sadis, ayŭh pait daya ka kupo Gilo bada bagan Ahithophel, ndi naan daya adi tukang pitayan yŭn Raja David. Pekat rawan raja mbŭh jadi rabis bake, ka bara pinunda Absalom mbŭh bitambah bagŭ.

David Bu so Jerusalem di Bisukan

¹³ Ndi naan pinyisung kidaan di David, “Bara daya Israel mbŭh bipekat ngga Absalom.”

¹⁴ Jadi David nang di sopŭrŭg pinurung-i adi agi ngga ayŭh di Jerusalem, “Ata dŭh siŭn dŭh bu madin kambŭi ata an nyiramat adŭp ta so Absalom! Rikas! Kambŭi dŭh ayŭh re rikas ndŭg ti ka ngarah ka siŭ barang naan ata di kupo!”

¹⁵ “Sawŭ ayŭh, Tuan Raja,” ngara nam. “Kieh mbŭh sidia an ndai ani ani adi bada mai.”

¹⁶ Jadi raja bu, ayō sopŭrŭg rawang-i ka bara pinurung-i, adŭ-i simŭng naan dayung nyikŭn, adi-i tingge bada sita istana.

¹⁷ Darŭm raja ngga sopŭrŭg daya-i bu so kupo, ngara nyasa di sikasŭn ramin.

¹⁸ Sopŭrŭg pinurung-i mijog sindŭk ayŭh darŭm bara pingibān raja murah di ka jawin. Nŭm ratus naan soldadu adi tunda ayŭh so Gath murah gŭh,

¹⁹ ka raja nang di Ittai, pingubak ngara, “Mani angān sua ngga kieh? Pari ka di rŭŭ ngga raja adi bauh. Kuu daya pinami, daya nupang jo so rais adŭp mu.

²⁰ Kuu gibayuh tui rŭŭ digiti, jadi simuki aku re bada kuu sua bigandon ngga aku? Pimanu adŭp ku dŭh gŭh aku puan. Panu pari, taban sopŭrŭg daya mu; ka mite TUHAN mandis ka tŭtŭd ngga kuu.”

²¹ Pak Ittai nam, “Tuan Raja, aku bipayu di kaam ngga adŭn TUHAN aku re ari sua ngga kaam ka tadŭ yŭn mai di, ndŭg ka kabŭs bait kani.”

²² “Kana!” David nam. “Pijuu garang panu!” Jadi Ittai di ngga sopŭrŭg daya-i samŭn bara rawang ngara.

²³ Bara daya sien darŭm bara pinunda David matak. Raja mutas sungi Kidron, dog tunda bara daya-i, ka samah panu nuju tarun tana-pajam.

²⁴ Zadok adi imam agi diginŭ, ka ayō ayŭh agi bara daya Levi, tawid Pati Simanya kudus. Ngara piguru-i ka dŭh pakat-i dinge ndŭg ka sopŭrŭg daya mbŭh abo bu tingge kupo anŭ. Imam Abiathar agi gŭh diginŭ.

²⁵ Komŭnŭ raja nang di Zadok, “Taban Pati Simanya anŭ pari ka kupo. Kambŭi TUHAN munos asŭng-I di aku, ndi andu Ayŭh re bada aku pari di tingga-i samŭn tarun adi yŭn-i dog na.

²⁶ Pak kambŭi Ayŭh dŭh munos asŭng-I di aku, isa-i Ayŭh ndai di tunduh aku ani ani adi raan-I.”

²⁷ Ayŭh pijuu nang di Zadok, “Tingga, taban anak mu Ahimaaz ngga Jonathan adi anak Abiathar ngga pari ka kupo buang dŭh bidudu.

²⁸ Sitadŭn kuu diginŭ, aku re kajŭn di yŭn mutas sungi di tarun tana-pajam ndŭg ka aku mbŭh dingah agah so kuu.”

²⁹ Jadi Zadok ngga Abiathar taban Pati Simanya anŭ pari ka Jerusalem ka rŭŭ diginŭ.

³⁰ David maad Sandah Kanā buang sien; ayŭh dŭh bikasut ka ubak-i dŭh dog nutu, tandā ayŭh susah. Sopŭrŭg adi tunda ayŭh nutu ubak buang ngara sien gŭh.

³¹ Kan David dog kidaan nang Ahithophel mbŭh tunda Absalom, ayŭh bidua, “Turung, TUHAN, bada pinyitayan Ahithophel marui jadi au-tarun!”

³² Kan David mbŭh ndŭg tibung sandah, di tarun yŭn bisambah, jerā adi bisa-i sabah, Hushai daya Archi bidapŭd ngga ayŭh taban piraka-i tiratak ka ubak-i kais da tana.

³³ David nang di ayŭh, “Dŭh re jadi kana di aku kambŭi kuu sua ngga aku,

³⁴ pak kuu bisa turung aku darŭm kuu pari ka kupo ka kidaan di Absalom nang kuu re so madin bituan di ayŭh nimun kuu mbŭh tŭtŭd bituan di sama-i. Ka ngga situngang tungang mu matah pinyitayan adi Ahithophel nggen.

³⁵ Imam Zadok ngga imam Abiathar re agi diginŭ; kidaan di ngara sopŭrŭg kayuh adi kuu dingah di istana raja.

³⁶ Agi anak anak ngara ayō ngara, ka kuu bisa pait ngara ka aku taban agah sopŭrŭg kayuh adi kuu mbŭh dingah.”

³⁷ Jadi Hushai, adi jerā David, pari ka kupo, pak di tika Absalom aŭn mandŭg kamanŭ.