2 SAMUEL 12 - Hakcipta - Biatah Bidayuh

Ajar Nathan ngga Atin Nyesar David

¹ TUHAN pait nabi Nathan ka yŭn David. Nathan di ka yŭn-i ka nang, “Agi duwŭh naan daya rŭŭ di ndi kupo; ndi naan kaya, ndi naan sirata.

² Adi kaya biyŭn bagŭ sapi ngga biri,

³ darŭm sianŭ adi sirata biyŭn ndi anak biri adŭ, adi-i ko miris. Ayŭh nakit sita-i, ka-i baga di arŭn-i samah ngga bara anak adŭp-i. Agi andu ayŭh paan-i ngga pinguman adŭp-i, bada-i nok so saker adŭp-i, ka kŭkŭn-i. Anak biri anŭ mbŭh keya ka anak dayung-i.

⁴ Agi ndi sidah ndi naan daya muah ka ramin daya kaya anŭ. Daya kaya anŭ dŭh raan siŭ ndi so dāng adŭp-i ngga ndai pinguman yŭn daya anŭ; ayŭh tambit anak biri daya sirata anŭ ngga sidia pinguman yŭn dingan-i anŭ.”

⁵ David mbŭh raru baji di daya kaya anŭ ka nang, “Aku bipayu ngga adŭn TUHAN daya adi ndai kayuh anŭ dŭh siŭn dŭh kabŭs!

⁶ Amai pingandai-i mbŭh raru sarah, ayŭh dŭh siŭn dŭh bayar pari pat rupet kayuh adi-i ko tambit.”

⁷ “Kuu inŭh daya anŭ,” Nathan nang di David. “Ka ati inŭh kayuh adi TUHAN Tapa Israel nang: ‘Aku bada kuu jadi raja Israel ka mbŭh nyiramat kuu so tangan Saul.

⁸ Aku ko nggen di kuu pritah-i samŭn bara sawŭn-i; Aku bada kuu jadi raja Israel ngga Judah. Kambŭi ati dŭh sadang, Aku bisa nggen di kuu duwŭh rupet.

⁹ Mani kuu dŭh dingah pinganang Ku? Mani kuu ndai kayuh arap adi mun anŭ? Kuu bada Uriah dog siŭ darŭm perang; kuu bada daya Ammon siŭ ayŭh, ka komŭnŭ kuu tambit sawŭn-i!

¹⁰ Madin, di barang turap kada so sesang mu re kabŭs dog siŭ sabab kuu dŭh dingah pinganang Ku ka mbŭh tambit sawŭn Uriah.

¹¹ Aku bipayu di tunduh adŭp mu Aku re bada daya so rawang adŭp mu taban pinyusah ka kuu. Kuu re kiris-i kan Aku tambit bara sawŭn mu so kuu ka nggen ngara di dari bŭkŭn; ka ayŭh re nyibŭŭs ngga ngara darŭm jawa sandu.

¹² Kuu ndai dosa darŭm bisukan, pak Aku re bada kayuh anŭ jadi darŭm jawa sandu di batŭh sopŭrŭg daya Israel.’ ”

¹³ “Aku mbŭh bidosa rawan TUHAN,” David nang. Nathan nam, “TUHAN mbŭh apun kuu; kuu dŭh re kabŭs.

¹⁴ Pak sabab pingandai mu anŭ adi dŭh stabi di TUHAN, anak mu re kabŭs.”

¹⁵ Komŭnŭ Nathan pari ka ramin adŭp-i. TUHAN bada anak adi sawŭn Uriah mbŭh biranak yŭn David bana birandam.

Anak David Kabŭs

¹⁶ David bidua ka Tapa mite anak anŭ bua. Ayŭh dŭh an man tadŭ tadŭ kayuh, ka barang ngarŭm di birit-i ayŭh guring di samen.

¹⁷ Bara pinurung-i di istana di ka yŭn-i ka suba bada ayŭh makat, pak ayŭh abah buang abah man ani ani ayō ngara.

¹⁸ Ndi minggu ripas anŭ, anak anŭ kabŭs, ka bara pinurung David taru kidaan di ayŭh. Ngara nang, “Sitadŭn anak anŭ gibabŭ udip, David dŭh an nam ata kan ata minyu ngga ayŭh. Simuki ata re kidaan di ayŭh nang anak-i mbŭh kabŭs? Te ayŭh ida ida ngga adŭp-i!”

¹⁹ Kan David kiris ngara sigayas dupan adŭp ngara, ayŭh rasu puan anak anŭ mbŭh kabŭs. Jadi ayŭh siken ngara, “Mbŭh kabŭs kah anak ku anŭ?” “Mbŭh kabŭs,” ngara nam.

²⁰ David makat so samen, mamuh, nyinod ubok-i, ka nyambi piraka-i. Komŭnŭ ayŭh di ka ramin TUHAN di simayang. Kan ayŭh pari ka istana, ayŭh mite pinguman ka rasu man kan-i mbŭh dog ngidang.

²¹ “Kieh dŭh mirati kayuh ati,” bara pinurung-i nang di ayŭh. “Sitadŭn anak anŭ gibabŭ udip, kaam sien buang dŭh an man; pak kan ayŭh mbŭh kabŭs, kaam makat ka man!”

²² “Sawŭ,” David nam, “Aku sawŭ bipusa ka sien sitadŭn ayŭh gibabŭ udip. Aku pikir TUHAN an masi di aku ka dŭh bada anak anŭ kabŭs.

²³ Pak madin ayŭh mbŭh kabŭs, ani sah aku bipusa? Bisa kah aku bada ayŭh pari udip? Ndi andu adŭp ku re di ka tarun adi yŭn-i anŭ, pak ayŭh dŭh bisa pari ka aku.”

Solomon dog Biranak

²⁴ David nyaduh sawŭn-i Bathsheba. Ayŭh nyibŭŭs ngga ayŭh, ka ayŭh biranak ndi anak dari, adi David kadŭn Solomon. TUHAN rindu anak anŭ

²⁵ ka pesan Nathan bada kadŭn anak anŭ Jedidiah, sabab TUHAN rindu ayŭh.

David Sirabut Rabbah

²⁶ Di tipuh anŭ Joab pijuu biperang an sirabut Rabbah, sindŭ kupo Ammon, ka mbŭh sindŭk re dapŭd sirabut-i.

²⁷ Ayŭh pait pinyisung ka David bada kidaan: “Aku mbŭh nyerang Rabbah ka mbŭh sirabut pagong tibŭn-piin.

²⁸ Madin kaam bisa nguruk bara soldadu mai, ka adŭp mai nyerang kupo anŭ ka sirabut-i. Dŭh aku raan dapŭd dŭn ko sirabut-i.”

²⁹ Jadi David nguruk bara soldadu-i, di ka Rabbah, nyerang-i, ka ngarah-i.

³⁰ So ubak tibudo Molech tapa daya Ammon David tambit ndi makota mas adi kira ka 35 kilogram bat-i ka adi biyŭn batuh brega dieh. David tambit batuh brega anŭ ka na-i di makota adŭp-i. Ayŭh tambit gŭh mua kiang kayuh sirapas so kupo anŭ

³¹ ka bada bara daya so kupo anŭ nyiraja ngga grigaji, sakor basi, kapak basi, ka takan ngara bada nyiraja di yŭn daya ndai batuh batā. Ayŭh ndai simŭnŭ gŭh ngga bara daya di sopŭrŭg kupo bŭkŭn di Ammon. Komŭnŭ ayŭh ngga bara soldadu-i pari ka Jerusalem.