2 SAMUEL 10 - Hakcipta - Biatah Bidayuh

David Ngarah Daya Ammon ngga Daya Syria

¹ Mua tian ripas anŭ Raja Nahash so Ammon kabŭs, ka anak-i Hanun jadi raja.

² Raja David nang, “Aku dŭh siŭn dŭh bijerā ngga Hanun, nimun sama-i ko bijerā ngga aku.” Jadi David pait kudu kudu naan pinyisung-i bada di kidaan adŭp-i masi dingah pinyikabŭs sama-i. Kan ngara mbŭh ndŭg Ammon,

³ pinguru pinguru daya Ammon nang di raja, “Kaam pikir amai stabi-i di sama mu, David pait ngara anŭ bada kidaan di kuu atin masi-i di pinyikabŭs sama mu? Manŭn dŭh! Ayŭh pait ngara kamati bada nyibatŭh kupo ta, isa ayŭh tungang nyerang ata!”

⁴ Hanun nakap pinyisung pinyisung David, gumbak ndi parad gagap ngara, kapŭg piraka ngara kŭd kupong, ka pibu ngara.

⁵ Ngara mbŭh raru mangŭh re pari ka kupo adŭp ngara. Kan David dingah kayuh adi mbŭh jadi, ayŭh pait pinganang di ngara bada rŭŭ di Jericho ka dŭhsah diŭ pari ndŭg ka gagap ngara mbŭh pari timbu.

⁶ Daya Ammon rada adŭp ngara mbŭh bada David jadi pinganyu ngara, jadi ngara ngupah 20,000 naan soldadu daya Syria so Bethrehob ngga Zobah, 12,000 naan daya so Tob, samŭn raja so Maacah ngga 1,000 daya-i.

⁷ David dingah kayuh anŭ ka pait Joab ngga sopŭrŭg bara tibaran soldadu-i da di nyerang ngara.

⁸ Bara daya Ammon matak ka kajŭn di jawin tiban sindŭ kupo ngara, Rabbah, atan adi bŭkŭn, bara daya Syria ngga bara daya so Tob ngga Maacah, kajŭn di sapa tarun tana rais.

⁹ Joab kiris bara soldadu pinganyu re nyerang ngara so tura ka jawin ngga so tura ka punok, jadi ayŭh mien bara soldadu Israel adi siabo pandai birawan ka bada ngara kajŭn di ndi yŭn nura bara soldadu daya Syria.

¹⁰ Ayŭh bada bara soldadu-i adi bŭkŭn dog nguru jurud-i Abishai, adi bada ngara kajŭn di ndi yŭn nura bara soldadu daya Ammon.

¹¹ Joab nang di ayŭh, “Kambŭi kuu kiris bara soldadu daya Syria mbŭh re ngarah aku, mandŭg di turung aku, ka kambŭi bara soldadu daya Ammon mbŭh re ngarah kuu, aku di turung kuu.

¹² Dŭhnyah taru! Ata bandar bandar biperang yŭn daya ta ka yŭn kupo kupo Tapa ta. Ka isa-i TUHAN ndai nanyam ka pinyiraan-i!”

¹³ Joab ngga bara daya-i nyurong di nyerang, ka bara soldadu daya Syria bu.

¹⁴ Kan bara soldadu daya Ammon kiris bara soldadu daya Syria bu, ngara bu mangān Abishai ka pari mŭrŭt kupo. Jadi Joab mari ko rawan daya Ammon, pari ka Jerusalem.

¹⁵ Bara daya Syria rada adŭp ngara mbŭh dog ngarah bara daya Israel, jadi ngara bagan sopŭrŭg bara soldadu ngara bada tikuruk.

¹⁶ Raja Hadadezer bagan bara soldadu daya Syria adi ko kajŭn tura ka timor Yang Euphrates, ka ngara mandŭg ka Helam dog nguru Shobach, pingibās bara soldadu Raja Hadadezer so Zobah.

¹⁷ Kan David dingah, ayŭh nguruk bara soldadu Israel, mutas Yang Jordan, ka matak ka Helam, di yŭn bara soldadu daya Syria mbŭh kajŭn ayŭh. Bisaad piguru,

¹⁸ ka bara soldadu daya Israel rawan ngara bada ngundur. David ngga bara soldadu-i siŭ 700 naan soldadu daya Syria adi tukang pimanu krita kuda ka 40,000 naan soldadu adi nunggang kuda, ka ngara bada biragan Shobach adi pingibās soldadu pinganyu, adi kabŭs di yŭn biperang.

¹⁹ Kan bara raja adi di ribo Hadadezer kinyam adŭp ngara dog ngarah daya Israel, ngara bidamai ngga ngara ka nundok di ribo kuasa ngara. Daya Syria mbŭh taru re turung daya Ammon tia.