2 SAMUEL 1 - Hakcipta - Biatah Bidayuh

David Dingah Agah pasar Pinyikabŭs Raja Saul

¹ Ripas Saul mbŭh kabŭs David pari ko ngarah daya Amalek ka rŭŭ di Ziklag duwŭh andu.

² Ngga andu jawa ndi, ndi naan bujang dari mandŭg so bari Saul. Ngga kiren adŭp-i susah, ayŭh nyiratak piraka-i ka na tana di ubak-i. Ayŭh di ka yŭn David ka mutu ubak-i ka tana ngga stabi.

³ David siken ayŭh, “So ki kuu?” “Aku bu so tarun yŭn daya Israel bibari,” ayŭh nam.

⁴ “Kidaan di aku ani mbŭh jadi,” David nang. “Bara soldadu ta bu so yŭn biperang,” ayŭh nam, “ka bagŭ so bara ta mbŭh dog siŭ. Saul ngga anak-i Jonathan mbŭh dog siŭ gŭh.”

⁵ “So ki kuu puan Saul ngga Jonathan mbŭh kabŭs?” David siken ayŭh.

⁶ Ayŭh nam, “Aku tipia agi di Darŭd Gilboa, ka aku kiris Saul minyandis di jarok-i buang dudu krita kuda ngga bara soldadu pinunggang kuda pinganyu aŭn mbŭh re sindŭk ayŭh.

⁷ Komŭnŭ ayŭh bigiring ka kiris aku, ka bagan aku. Aku nam, ‘Ani, tuan!’

⁸ Ayŭh siken asi aku, ka aku kidaan adŭp ku daya Amalek.

⁹ Komŭnŭ ayŭh nang, ‘Kamati, siŭ aku! Aku mbŭh bana biragan, ka mbŭh re kabŭs.’

¹⁰ Jadi aku di ka yŭn-i ka siŭ ayŭh, sabab aku puan mŭnŭ re kabŭs gŭh ayŭh pasu-i tumbang. Komŭnŭ aku tambit makota so ubak-i ka garang so tangan-i, ka mbŭh taban-i ka yŭn mai, tuan.”

¹¹ Darŭm susah David nyiratak piraka-i, ka simŭnŭ gŭh bara daya-i adi agi diginŭ.

¹² Ngara muās ka ngurid buang bipusa ndŭg singumi andu yŭn Saul ngga Jonathan ka yŭn Israel, adi daya TUHAN, sabab mbŭh raru bagŭ mbŭh kabŭs darŭm biperang.

¹³ David siken bujang dari anŭ adi taban agah anŭ, “So ki kuu?” Ayŭh nam, “Aku daya Amalek, pak aku rŭŭ di rais ngan.”

¹⁴ David siken ayŭh, “Simuki kuu bisa birani siŭ raja adi TUHAN ko mien?”

¹⁵ Komŭnŭ David bagan ndi naan so bara daya-i ka nang, “Siŭ ayŭh!” Daya anŭ japa daya Amalek anŭ ka siŭ ayŭh,

¹⁶ ka David nang di daya Amalek anŭ, “Ati sarah adŭp mu. Kuu nunggu adŭp mu darŭm kuu ngaku adŭp mu siŭ daya adi TUHAN ko mien bada jadi raja.”

David Muās Saul ngga Jonathan

¹⁷ David nang ragu puās ati yŭn Saul ngga anak-i Jonathan,

¹⁸ ka nggen ukum bada-i dog ngajar di sopŭrŭg daya Israel. (Ragu ati agi dog nuris darŭm Surat Jashar.)

¹⁹ “Di sandah sandah di Israel bara pinguru ta kabŭs! Bara soldadu ta adi siabo pagan mbŭh dog siŭ!

²⁰ Dŭhnyah pigarau-i di Gath puan kah di aran aran di Ashkelon. Dŭhnyah bada bara dayung daya Philistia gaŭn; dŭhnyah bada bara dayung daya adi dŭh puan Tapa pawŭn.

²¹ “Isa-i mating sipot-abun bait ujen rabu di sandah Gilboa; Isa-i tana ŭmŭh ngara ari matung! Amai pinangin pimagan mbŭh mingare diginŭ; pinangin Saul mbŭh dŭh tia dog ngusu ngga inyo.

²² Bawŭh panah Jonathan ko raru bisā-i, pedang Saul ko dŭh biyŭn pinyirasi, japa daya adi bake, siŭ pinganyu.

²³ “Saul ngga Jonathan sanang nŭŭh rindu; udip samah, kabŭs samah; raju so beuh, bake so singah.

²⁴ “Bara dayung Israel, ngurid Saul! Ayŭh kibarui angān ngga piraka adi bireh ka ngabuh angān ngga batuh brega mas pirak.

²⁵ “Bara soldadu adi pagan mbŭh kabŭs, ngara dog siŭ darŭm perang. Jonathan dog siŭ di sandah.

²⁶ “Aku nyibara kuu, Jonathan, adi jurud ku; kuu inŭh adi aku ruai siŭt! Pinyirindu mu di aku mbŭh sukup bās-i. kana dŭ so pinyirindu dayung.

²⁷ Bara soldadu adi pagan mbŭh kabŭs, sinyata ngara dog tagan ka jadi dŭh biguna.”