2 CORINTH 5 - Hakcipta - Biatah Bidayuh

¹ Pŭrŭng ta ati agi keya ka bari adi yŭn ta rŭŭ di ong ati. Pak kan bari ati dog nyirubuh, ata puan Tapa re nggen di barang naan ata tarun yŭn rŭŭ. Ramin arŭn anŭ dŭh-i re ramin adi manusia ndai, pak ramin arŭn di shorga adi tan adu adu.

² Sitadŭn ata di ong ati, ata nyidaing sabab ata raan rŭŭ di ramin arŭn ta anŭ adi di shorga.

³ Ata raan kasŭk-i mun piraka isa ata dŭh sitagor.

⁴ Bari ati adi yŭn ta rŭŭ madin mbŭh keya ka pinyirabis adi raru bat, adi nyidaing ata da-i. Ata nang sakanŭ dŭh sitagar ata raan tingge pŭrŭng ta ati adi di ong, pak sabab ata raan kasŭk pŭrŭng adi so shorga. Ngga simŭnŭ meh pŭrŭng ta adi bisa kabŭs birubah jadi anŭ adi dŭh bisa kabŭs.

⁵ Tapa inŭh adi bada sopŭrŭg anŭ bisa jadi. Ayŭh mbŭh nggen di ata Roh-I isa ata tatu puan Ayŭh re ndai-i.

⁶ Jadi kieh mbŭh siraru puno ngga atin pagan. Kieh puan siragi kieh rŭŭ darŭm pŭrŭng ati, kieh taŭn jo so ramin arŭn Tuhan.

⁷ Pak kieh udip pakai pinyabah, dŭh pakai kayuh adi kieh kiris.

⁸ Ngga atin pagan inŭh kieh an dŭ dog nyibarai so pŭrŭng, siŭn kieh bisa udip ngga Tuhan.

⁹ Rabis so kayuh bŭkŭn, kieh raan pimunos Tuhan bait-i darŭm pŭrŭng ami digiti puan kah di ramin arŭn di shorga.

¹⁰ Amai sopŭrŭg ta dŭh siŭn dŭh mijog bisara di sirung jawin Kristus. Barang naan re trima baras-i nanyam pingandai-i sitadŭn-i udip darŭm pŭrŭng, bait-i kana, bait-i arap.

Bidingan ngga Tapa darŭm Kristus

¹¹ Kieh puan rati-i nŭŭh taru Tuhan, ngapŭi kieh suba an ngasu daya bŭkŭn da marik pimudip-i pari ka Ayŭh. Tapa mbŭh batur batur puan asi kieh, ka aku harap angān puan gŭh kieh.

¹² Dŭh-i kieh suba an kibās adŭp ami dinge di sirung jawin ngan, pak an nggen di angān sabab adi kana yŭn ngan mingangŭn pasar kieh, isa angān bisa nam ngara adi mingangŭn kaŭs pasar ayong manusia ka dŭh mingangŭn pasar urah-rakah manusia.

¹³ Kambŭi kieh mun daya gira, anŭ mbŭh yŭn Tapa. Kambŭi kieh tirase, anŭ mbŭh sabab angān.

¹⁴ Kieh mbŭh dog nguasa pinyirindu Kristus, amai kieh puan ndi naan Daya mbŭh kabŭs yŭn sopŭrŭg, rati-i sopŭrŭg ngara mbŭh sua kabŭs samah ngga Ayŭh.

¹⁵ Ayŭh kabŭs yŭn sopŭrŭg, isa ngara adi udip dŭh tia udip yŭn adŭp ngara, pak yŭn Ayŭh adŭ adi kabŭs ka dog pakat udip bauh sitagar ngara.

¹⁶ Ata dŭh tia tingga daya so ka gaya atur manusia. Sunggu agi bait kani ata tingga Kristus nunda ka gaya atur manusia, ata mbŭh dŭh tia simŭnŭ madin.

¹⁷ Daya adi udip darŭm Kristus mbŭh daya bauh; adi amba mbŭh mating, adi bauh mbŭh mandŭg.

¹⁸ Sopŭrŭg anŭ mbŭh Tapa ndai, adi so Kristus mbŭh ngubah ata so jadi pinganyu-I da jadi bara dingan-I, ka mbŭh bada ata ndai daya bŭkŭn da jadi dingan-I gŭh.

¹⁹ Kayuh adi kieh nyuse inŭh Tapa mbŭh ndai sopŭrŭg manusia da jadi bara dingan-I, darŭm Kristus. Tapa dŭh an ingat sarah ngara, ka mbŭh nggen di kieh piminyu ajar adi kidaan munki Ayŭh ndai ngara da bidingan ngga adŭp-I.

²⁰ Kieh ati meh garang, minyu yŭn Kristus, keya ka adŭp Tapa ndai pimite-I so baba ami. Kieh mite ngga ngarun Kristus: bada Tapa ngubah angān so jadi pinganyu da jadi bara dingan-I!

²¹ Kristus bŭn ndai sarah, pak sitagar ata Tapa mbŭh bada Ayŭh gŭrŭng dosa ta siŭn ata darŭm udip ndi ngga Ayŭh bisa dapŭd pinŭnggŭn Tapa.