2 CORINTH 3 - Hakcipta - Biatah Bidayuh

Urun Simanya Bauh

¹ Agi kah kieh ati sak adi mingangŭn pasar adŭp ami? Agi kah kieh ati biguna di surat nuju angān puan kah so angān ngga kidaan di daya pasar adŭp ami?

² Adŭp ngan inŭh surat ami, adi dog nuris darŭm atin ami isa sopŭrŭg daya puan ka basa.

³ Taŭn granan adŭp Kristus nuris surat anŭ ka pait-i so kieh. Ayŭh dog nuris dŭh ngga dawat pak ngga Roh Kudus adi udip, ka dŭh dog mŭŭt di batuh pak di atin manusia.

⁴ Kieh nang sakanŭ sabab kieh mbŭh raru bisangan di Tapa so ka Kristus.

⁵ Dŭh sirati-i kieh biyŭn hak re nang adŭp ami tungang ndai kraja anŭ. Pinyitungang ami mandŭg so adŭp Tapa.

⁶ Ayŭh inŭh adi bada kieh tibirang jadi urun simanya bauh, simanya bauh adi dŭh mun ukum-adat adi dog nuris pak so ka Roh Kudus. Ukum-adat adi dog nuris taban pinyikabŭs, pak Roh Kudus nggen udip.

⁷ Turis Ukum-adat dog mŭŭt di batuh, ka bragah Tapa tatŭng di andu-i dog nggen. Sunggu sekar jawa di jawin Moses dŭ dŭ asab, jawa anŭ mbŭh raru daras ndŭg ka daya Israel dŭh tungang tingga jawin-i. Kambŭi Ukum-adat, adi taban pinyikabŭs dog nggen ngga bragah adi mun anŭ,

⁸ tatu rabis sangŭn bragah kraja pingandai Roh Kudus!

⁹ Kambŭi anŭ adi taban pinyikabŭs agi bragah-i, dŭh kah rabis bragah-i kraja pingandai adi taban pinyiramat!

¹⁰ Ata bisa nang, sabab bragah adi madin agi rabis jawa so bragah anŭ adi raru jawa-i jah, bragah anŭ adi jah mbŭh mating.

¹¹ Amai kambŭi bragah agi darŭm anŭ adi dŭh tan tui, bragah darŭm anŭ adi tan tui re rabis sangŭn!

¹² Sabab pingarap ami agi simŭnŭ inŭh kieh birani minyu.

¹³ Kieh dŭh mun Moses, adi na taŭb di jawin-i isa daya Israel dŭh kiris sekar jawa anŭ asab.

¹⁴ Pikir ngara sawŭ dŭh tikuka; ka ndŭg andu ati pikir ngara dog nutu ngga taŭb anŭ darŭm ngara basa surat surat simanya amba. Taŭb anŭ dog kadi adŭ-i kan daya anŭ mbŭh udip darŭm Kristus.

¹⁵ Di jaman madin gŭh, tiap kari ngara basa Ukum-adat Moses, taŭb anŭ babŭ matŭn pikir ngara.

¹⁶ Pak taŭb anŭ bisa dog kadi, sak adi nang Surat-kudus pasar Moses: “Taŭb-i dog kadi kan ayŭh nura Tuhan.”

¹⁷ “Tuhan” adi dog nyabŭt di ayat ati inŭh Roh; asi asi adi biyŭn Roh Tuhan, ayŭh anŭ mbŭh dog pirupas.

¹⁸ Sopŭrŭg ata meh, ngga jawin adi dŭh bitaŭb, kiren jawa bragah Tuhan; ka bragah anŭ, adi mandŭg so Tuhan adi Roh, bada ata bitukar jadi mun Ayŭh darŭm bragah adi rabis bās.