2 CORINTH 2 - Hakcipta - Biatah Bidayuh

¹ Jadi aku mbŭh ndai pikir ku dŭh re mandŭg ka angān dinge, isa angān dŭh susah.

² Amai kambŭi aku bada angān susah, asi meh re nyipawŭn asŭng ku, kambŭi-i dŭh adŭp ngan adi ko ku bada susah.

³ Anŭ inŭh sabab aku nuris surat anŭ ka angān. Dŭh aku an mandŭg ka angān ka susah sabab adŭp daya adi patut bada aku gaŭn. Amai aku puan, kambŭi aku gaŭn, sopŭrŭg ngan gaŭn gŭh.

⁴ Aku nuris ka angān prajah ngga atin bipito buang susah ka sien; pinŭtŭn ku dŭh inŭh an bada angān susah, pak isa angān rada munki masam bās pinyirindu ku di sopŭrŭg ngan.

Pingapun di Daya adi Sarah

⁵ Jadi kambŭi agi daya mbŭh bada daya bŭkŭn susah, ayŭh dŭh ndai-i di tunduh ku pak di tunduh sopŭrŭg ngan, biar-i duwŭh taruh naan.(Aku nang sakanŭ sabab aku dŭh an paŭh karas di tunduh ayŭh.)

⁶ Bagŭ angān mbŭh nyara sarah daya anŭ, ka-i mbŭh jadi sukup ukum di tunduh-i.

⁷ Angān patut apun ayŭh, nyaduh ayŭh, isa ayŭh dŭh jadi raru susah ndŭg ka jadi jimŭ.

⁸ Aku mite angān kiren di ayŭh adŭp ngan sawŭ rindu ayŭh.

⁹ Aku nuris surat anŭ ka angān ngga suba angān, an puan tunda ngan kah dŭh pinyitayan ku.

¹⁰ Kan angān apun sarah daya, aku apun gŭh ayŭh. Amai kan aku apun, kambŭi agi re ku apun, aku apun di sirung jawin Kristus sabab angān,

¹¹ siŭn Shetan dŭh mbit pluang di tunduh ta; ata puan akar-i.

Paul Nyangŭd Kan Ayŭh di Troas

¹² Kan aku mbŭh ndŭg Troas an nyuse Agah Kana pasar Kristus, aku kiris Tuhan mbŭh kuka aran yŭn ku diginŭ.

¹³ Pak aku raru gapang, sabab aku dŭh tungang dapŭd dingan ta Titus. Jadi ripas aku ko kidaan adŭp ku re panu di daya diginŭ aku matak di ka Macedonia.

Pimanang Darŭm Kristus

¹⁴ Pak trima kaseh di Tapa! Amai darŭm udip ndi ngga Kristus kieh mbŭh siraru dog nguru Tapa nimun daya-takap darŭm baris pimanang Kristus. Tapa pakai kieh da pikambang pinyipuan pasar Kristus adi keya ka buuh wangi ka barang yŭn.

¹⁵ Amai kieh agi keya ka kayuh adi buuh ramak dog jugan Kristus ka Tapa, di dupan ngara adi mbŭh siramat ka ngara adi mbŭh manyap.

¹⁶ Amai di ngara adi mbŭh manyap, anŭ mbŭh dagŭn madam adi bisa siŭ; pak di ngara adi siramat, anŭ mbŭh dagŭn wangi adi nggen udip. Asi meh garang, daya adi tungang ndai kraja bās anŭ?

¹⁷ Kieh dŭh mun daya bŭkŭn, bijaja ngga Agah Kana so Tapa ka bada-i mun kayuh adi dŭh brega; pak sabab Tapa mbŭh pait kieh, kieh minyu ngga atin tŭnggŭn di sirung jawin-I, nimun bara urun Kristus.