2 CORINTH 11 - Hakcipta - Biatah Bidayuh

Paul ngga bara Pinyuruh Kadong

¹ Aku mite angān turut ngga aku, bait di tika aku mun daya budo. Anŭ aku mite so angān!

² Aku mbit bat di angān nimun Tapa mbit bat di angān; angān agi keya ka dayung tibŭn adi aku mbŭh nunang ngga ndi naan daya adŭ, adŭp Kristus.

³ Pak aku taru sibia-i pikir ngan miriseu, ka dŭh tia tŭtŭd di Kristus, nimun Eve adi ko tibudō da akar jippŭh.

⁴ Amai angān tandah tadŭ daya mandŭg tudu angān ka ngajar pasar Jesus adi bŭkŭn, dŭh sianŭ adi kieh nyuse. Angān an gŭh trima roh ngga agah kana adi taŭn mbŭh raru bŭkŭn so Roh ngga Agah Kana adi angān ko kambat so kieh!

⁵ Aku puan aku dŭh siabo sŭ so ngara adi angān nang “pinyuruh” ngan adi raru kana!

⁶ Kadŭ-i aku sawŭ dŭh sukup siradik darŭm aku minyu, pak aku dŭh kurang pinyipuan; anŭ muko kieh kiren di angān di barang nga-i ka di barang masam kayuh.

⁷ Aku dŭh mite angān bayar kan aku nyuse Agah Kana so Tapa di angān; aku pirapat adŭp ku siŭn angān bisa jadi rabis biguna. Sarah kah aku ndai simŭnŭ?

⁸ Sitadŭn aku nyiraja di ruang ngan, aku dog bayar eklisia eklisia di tarun bŭkŭn. Aku mbŭh keya ka mirupak ngara ramŭn ku an turung angān.

⁹ Ka sitadŭn aku agi ngga angān aku mating nyusah angān kan aku biguna di duit; bara adi sabah adi mandŭg so Macedonia taban ka yŭn ku sopŭrŭg kayuh adi aku biguna. Nimun adi mbŭh, ka simŭnŭ gŭh jŭ: Aku dŭh re nyusah angān!

¹⁰ Ngga ajar pasar Jesus adi taŭn sawŭ ka adi agi di aku, aku bipayu mating daya di ndi tarun tana Achaia re tungang pirŭŭ aku mingangŭn.

¹¹ Agi kah aku nang sakanŭ sabab aku dŭh rindu angān? Tapa puan aku rindu angān!

¹² Aku re babŭ ndai kayuh adi aku ndai madin, siŭn bara “pinyuruh” anŭ dŭh dapŭd aran ngga mingangŭn ka nang adŭp-i mbŭh nyiraja mun kieh.

¹³ Ngara anŭ dŭh pinyuruh adi sawŭ; ngara pinyuruh kadong, adi kadong pasar kraja pingandai-i buang ngakar bada adŭp-i mun pinyuruh adi sawŭ yŭn Kristus.

¹⁴ Anŭ dŭh-i kayuh saruh! Adŭp Shetan pandai gŭh bada adŭp-i mun malaikat jawa!

¹⁵ Ngapŭi-i dŭh kayuh saruh kambŭi bara urun-i ndai adŭp ngara da mun bara urun pinŭnggŭn. Pinŭbŭn-i ngara re trima baras-i nanyam kraja pingandai ngara.

Pinyusah Paul Darŭm-i Jadi Pinyuruh

¹⁶ Pari aku nang: daya dŭh bisa pikir aku ati budo. Pak kambŭi agi daya nang aku budo, trima meh aku nimun daya budo, isa aku nak suba mingangŭn nisit.

¹⁷ Taŭn-i, kayuh adi aku nang madin dŭh-i kayuh adi Tuhan bada aku nang; pasar mingangŭn ati aku ati sawŭ mbŭh minyu mun daya budo.

¹⁸ Pak amai mbŭh raru bagŭ daya mingangŭn pasar kayuh ong, aku bisa gŭh ndai simŭnŭ.

¹⁹ Adŭp ngan mbŭh raru bijak, ngapŭi angān raan bigaur ngga bara adi budo!

²⁰ Angān tan kinyam daya mritah angān, nipu angān, kudog angān, ngamun angān, ka napar angān di jawin ngan.

²¹ Dasa aku ngaku kieh mbŭh raru pinakut re ndai simŭnŭ! Pak kambŭi daya an mingangŭn pasar kayuh, aku an gŭh. Aku minyu mun daya budo.

²² Ngara daya Hebrew kah? Aku daya Hebrew gŭh. Ngara daya Israel kah? Aku daya Israel gŭh. Ngara sesang Abraham kah? Aku sesang Abraham gŭh.

²³ Ngara urun Kristus kah? Aku sak daya gira, pak aku ati urun adi kana dŭ so ngara! Aku agi bandar dŭ nyiraja, aku mbŭh siraru dŭ dog na darŭm jer, aku mbŭh siraru dŭ dog madŭs, ka mbŭh siraru dŭ dŭm tadŭ re kabŭs.

²⁴ Pirimŭh kari aku kambat taruh puru-prii padŭs so daya Jahudi;

²⁵ pitaruh kari aku dog madŭs daya Rome; ka ndi sidah aku dog manjan ngga batuh. Pitaruh kari aku agi sua darŭm kapar kaŭm di rawŭt, ka ndi sidah manyap duwŭh puru-pat jam di rawŭt.

²⁶ Darŭm siraru panu aku agi mbŭh re dog susah da uba, da pirupak; mbŭh re dog susah da bangsa adŭp ku daya Jahudi samŭn da daya adi dŭh bangsa Jahudi; mbŭh re dog susah di barang kupo, susah di tuān, susah di rawŭt bās, ka mbŭh re dog susah da dingan adi dŭh sawŭ.

²⁷ Aku mbŭh bandar nyiraja ka siraru dŭh bŭŭs; aku mbŭh darŭm sibŭrŭk ngga badŭh asŭng; aku siraru dŭh biyŭn sukup pinguman, puan kah sutok tarun yŭn rŭŭ, puan kah kurang piraka.

²⁸ Dŭh kira adi bŭkŭn, barang andu aku susah da atin gapang ku di bara eklisia.

²⁹ Kan agi daya ramah, aku ramah gŭh; kan agi daya ndai dosa, aku mbŭh jadi raru susah.

³⁰ Kambŭi aku dŭh siŭn dŭh mingangŭn, aku re mingangŭn pasar kayuh adi kiren munki masam pinyiramah ku.

³¹ Tapa adi Sama Tuhan ta Jesus; biberkat inŭh adŭn-I ndŭg situi tui! Ayŭh puan aku dŭh kadong.

³² Di andu aku di Damascus, gabenor adi di ribo Raja Aretas bada soldadu soldadu adi jaga di tiban kuta kupo nakap aku.

³³ Pak aku dog bisor darŭm bakur so rubang di sindung kuta kupo ka bu mangān ayŭh.