2 CORINTH 10 - Hakcipta - Biatah Bidayuh

Paul Nyibandar Kraja-i

¹ Aku, Paul, mite angān nyiringa aku. Sak adi nang daya, aku tŭkŭn buang dŭdŭt atin kan aku agi ngga angān, pak mangah kan aku jo so angān. Ngga pinyiduduh ka mandis Kristus

² aku mite angān dŭhnyah bada aku mangah kan aku mandŭg; amai aku taŭn bisa mangah ngga ngara adi nang kraja pingandai ami agi so ka pinyiraan ong.

³ Taŭn-i sawŭ kieh udip di ong, pak kieh dŭh birawan so ka pinyiraan ong.

⁴ Sinyata adi kieh pakai ngga birawan dŭh-i sinyata ong pak sinyata adi bikuasa so Tapa, adi kieh bisa pakai ngga nyirubuh kuta. Kieh pirarap karit adi dŭh sawŭ;

⁵ kieh re nyirubuh pingandai uap-sambuh manusia adi jadi pinyibatŭn di pinyipuan pasar Tapa; kieh re tambit sopŭrŭg pikir-kira ka bada-i nundok di Kristus.

⁶ Ka ripas angān ko kiren adŭp ngan mbŭh batur batur nundok, kieh taŭn mbŭh sidia re ngukum sopŭrŭg adi dŭh nundok.

⁷ Angān tingga kayuh so tura ka tunduh-i adŭ. Kambŭi agi daya pikir adŭp-i mbŭh dog dapu Kristus, ayŭh patut pikir dinge, sabab kieh mbŭh tung Kristus gŭh.

⁸ Amai aku dŭh mangŭh, sunggu sungak bait kani aku darŭm aku mingangŭn pasar kuasa adi Tuhan mbŭh nggen di kieh; kuasa anŭ kieh pakai ngga pijog angān, dŭh ngga nyirubuh angān.

⁹ Dŭh aku an bada adŭp ku mun adi pirawan angān ngga surat surat ku.

¹⁰ Agi daya re nang, “Surat Paul raru bisā, pak kan adŭp-i agi ngga ata, ayŭh ramah, ka pinganang-i au-tarun!”

¹¹ Daya adi mun anŭ patut puan nang kayuh adi kieh ko nuris di surat darŭm kieh jo so angān agi samah ngga kayuh adi kieh re ndai darŭm kieh agi ngga angān.

¹² Sawŭ, kieh dŭh birani re kadŭn adŭp ami asi asi puan kah danding adŭp ami ngga ngara adi muji adŭp-i. Ngara budo! Ngara ndai takar ngga nakar adŭp-i, ka nyadŭng adŭp-i pakai takar anŭ!

¹³ Mun kieh, kambŭi kieh mingangŭn kieh dŭh bada-i rabis so patut. Kieh dŭh re bada-i rabis so patut darŭm kraja adi Tapa mbŭh nggen di kieh, simŭnŭ gŭh darŭm kraja ami di ruang ngan.

¹⁴ Ka amai angān mbŭh darŭm utung anŭ, kieh dŭh bisa rabis so patut kan kieh mandŭg ka angān taban Agah Kana pasar Kristus.

¹⁵ Ngapŭi kieh dŭh mingangŭn di kraja pingandai adi daya ko ndai rabis so adi Tapa ko miratak yŭn ami. Pak kieh harap pinyabah ngan bisa bitambah, buang kieh tungang ndai rabis bās kraja di dupan ngan, di darŭm utung adi Tapa mbŭh miratak.

¹⁶ Komŭnŭ kieh bisa nyuse Agah Kana di rais rais bŭkŭn jo so angān, ka dŭhsah mingangŭn pasar kraja pingandai adi mbŭh jadi di tarun yŭn daya bŭkŭn nyiraja.

¹⁷ Pak sak adi nang Surat-kudus, “Asi asi adi raan mingangŭn dŭh siŭn dŭh mingangŭn pasar kayuh adi Tuhan ko ndai.”

¹⁸ Ayŭh simŭnŭ, sabab kan adŭp Tuhan muji daya, daya anŭ taŭn sawŭ dapŭd puji, dŭh inŭh kan ayŭh muji adŭp-i.