1 TIMOTHY 6 - Hakcipta - Biatah Bidayuh

¹ Ngara adi jadi urun dŭh siŭn dŭh stabi di tuan ngara, isa daya dŭh kinarap adŭn Tapa samŭn ajar ta.

² Urun tuan adi Kristen dŭh siŭn ngamun tuan ngara, amai ngara mbŭh bara adi sabah gŭh. Sipatut-i ngara an nakit bituan di ngara, sabab ngara anŭ adi dapŭd utung so kraja ngara inŭh bara adi sabah adi ngara rindu. Kuu dŭh siŭn dŭh an ngajar kayuh ati di daya eklisia buang ngatat ngara da tunda-i.

Ajar Kadong ngga Pinyikaya adi Sawŭ

³ Asi asi adi ngajar ajar adi bŭkŭn ka dŭh situju ngga pinganang adi sawŭ so Tuhan ta Jesus Kristus ka dŭh gŭh situju di ajar adat ta,

⁴ daya anŭ mbŭh bakak ngga atin gambung buang dŭh puan tarun. Ayŭh mbŭh raru suka bikarit ka bikaii pasar bang piminyu; anŭ pijadi atin sina, dendam, bakit, pise adi arap,

⁵ ka kaii adi dŭh ko ko so ngara adi mbŭh rusak pikir-kira buang mbŭh dŭh natŭng kayuh adi sawŭ. Ngara pikir adat mbŭh aran ngga jadi kaya.

⁶ Adat bisa bada daya kaya, kambŭi daya puas ngga anŭ adi-i biyŭn.

⁷ Ani mbŭh ta taban ka ong? Mating! Ani bisa ta taban bu so ong? Mating!

⁸ Jadi meh, kambŭi ata biyŭn pinguman ngga piraka, anŭ mbŭh sadang.

⁹ Pak ngara adi an jadi kaya mbŭh rabu ka darŭm pinyisuba ka mbŭh dog mirakap pinyiraan adi arap adi bisa nyirubuh ka pirusak ngara.

¹⁰ Amai pinyiawang duit pijadi bagŭ masam arap. Agi daya adi mbŭh gruwŭn an biyŭn-i ndŭg ka mbŭh miriseu so pinyabah ngara ka mbŭh pijadi bagŭ masam andam di adŭp-i.

Paul Pitayan Timothy

¹¹ Pak kuu, daya Tapa, pijo adŭp mu so sopŭrŭg kayuh adi mun anŭ. Kuu patut gruwŭn: pinŭnggŭn, udip nimun ka pinyiraan Tapa, sabah di Kristus, rindu dingan, biyŭn pinyitŭtŭd atin di tika sangsara, ka atin duduh ngga daya.

¹² Birumba darŭm rumba pinyabah, ka dapŭd upah yŭn adŭp mu, anŭ inŭh udip adi sawŭ adi tan adu adu; amai yŭn anŭ inŭh Tapa mbŭh bagan kuu darŭm kuu ngaku pinyabah mu di sirung jawin bara saksi.

¹³ Di sirung jawin Tapa, adi kudip sopŭrŭg kayuh, ka di sirung jawin Kristus Jesus, adi ko ngaku pinyabah-I di sirung jawin Pontius Pilate, aku bada kuu

¹⁴ ndai sopŭrŭg kayuh adi aku tijuan kuu ndai darŭm atin tŭtŭd ndŭg Andu anŭ adi ngga Tuhan Jesus Kristus nandŭng!

¹⁵ Pinandŭng-I re di tika adi so ka pingatur adŭp Tapa, ndi naan Pinguasa adi biberkat, Raja adi tunduh sopŭrŭg raja ka Tuhan adi tunduh sopŭrŭg tuhan.

¹⁶ Ayŭh sadi adi udip adu adu; Ayŭh agi darŭm jawa adi mating daya tungang nyindŭk. Gi-mating daya tungang kiris Ayŭh. Di Ayŭh inŭh stabi ngga kuasa adi tan adu adu! Amen.

¹⁷ Nakit ngajar ngara adi kaya di kayuh ong siŭn dŭh jadi gambung, pak na pingarap ngara, dŭh di kayuh adi dŭh tan tui mun pinyikaya, pak di Tapa, adi ngga pinyikana-I mbŭh nggen sopŭrŭg kayuh di ata yŭn udip sanang.

¹⁸ Ngajar ngara da ndai kayuh kana, da jadi kaya darŭm kraja kana, da dŭh bidagis buang sidia an samah kayuh ngga daya bŭkŭn.

¹⁹ Simuti ngara re nguruk yŭn adŭp-i rata adi re jadi pimŭnŭs adi tagap yŭn tipuh adi re mandŭg. Mun anŭ ngara re dapŭd upah, anŭ inŭh udip adi sawŭ adi tan adu adu.

²⁰ Timothy, nakit jaga kayuh adi mbŭh dog mbas pasan ka darŭm tangan mu. Pijo adŭp mu so piminyu pinganang adi dŭh biguna samŭn karit adi sipadin adi daya kadŭn “Pinyipuan.”

²¹ Amai agi mbŭh ngaku adŭp-i biyŭn-i, ka sitagar anŭ ngara mbŭh miriseu so aran pinyabah. Pinyirasi-mandis Tapa agi ngga angān sopŭrŭg.