1 TIMOTHY 5 - Hakcipta - Biatah Bidayuh

Pinanggong di bara Daya adi Sabah

¹ Dŭhnyah nang nyamba dari, pak minyu ngga ayŭh keya ka minyu ngga sama adŭp mu. Bara dari adi babŭ mara kuu patut bada keya ka bara jurud adŭp mu,

² bara dayung adi mbŭh tuuh kuu patut bada keya ka sindŭ adŭp mu, ka ngga atin bisig kuu patut bada bara dayung adi mara keya ka jurud dayung adŭp mu.

³ Kiren stabi di dayung uban adi taŭn mbŭh sawŭ udip sadi.

⁴ Pak kambŭi dayung uban biyŭn bara anak puan kah bara sukuh, ngara patut diŭ so kayuh bŭkŭn birajar ndai kayuh adi patut ngara ndai yŭn rawang ngara nanyam ka adat. Ka darŭm ndai simŭnŭ ngara maras budi pimas, simbuk ka babai ngara. Pingandai adi mun ati pimunos asŭng Tapa.

⁵ Dayung uban adi mbŭh rŭŭ sadi, dŭh biyŭn daya adi tukang jaga ayŭh, mbŭh na pingarap-i di Tapa buang adu adu simayang mite turung so Ayŭh sandu singarŭm.

⁶ Pak dayung uban adi sayŭp ngga pinyirami mbŭh kabŭs, sunggu darŭm pŭrŭng ayŭh udip.

⁷ Nggen di ngara pinyitayan ati, isa mating daya kinarap ngara.

⁸ Kambŭi agi daya dŭh nyiran madis-i, rabis-i bara so rawang adŭp-i, ngara mbŭh miman pinyabah ka mbŭh arap dŭ so daya adi dŭh puan Tapa.

⁹ Dŭhnyah pibŭrŭt dŭn dayung uban di susud dŭn bara dayung uban kambŭi ayŭh gibayuh rabis so nŭm puru sawa umbur-i. Nambah anŭ, ayŭh dŭh siŭn dŭh daya adi ko banan ndi sidah adŭ.

¹⁰ Ayŭh patut dayung adi traŭn darŭm pingandai kana: dayung adi ko nakit nyiran bara anak-i, ko pisadang bara pinami, ko turung dingan-i adi samah Kristen, ko turung daya adi dog pinyusah, ka ko marar ndai kraja kana.

¹¹ Dŭhnyah pibŭrŭt dŭn dayung dayung uban adi gibabŭ mara di susud dŭn bara dayung uban; sabab kan ngara mbŭh an banan, ngara kambŭt Kristus,

¹² ka mbŭh sarah amai kadong janji adi ngara ko ndai ngga Kristus.

¹³ Ngara mbŭh kanyet saat jam mŭrŭt ramin ndi ndŭg ramin andi. Adi rabis arap-i, ngara mbŭh kanyet ngitong daya ka bipito di har daya bŭkŭn, nang kayuh adi ngara dŭh patut nang.

¹⁴ Jadi sŭn ku nang, kana dŭ bara dayung uban adi gi-mara banan, mira, ka jaga ramin arŭn ngara, isa pinganyu ta dŭh biyŭn aran ngga kinarap ata.

¹⁵ Amai agi kada dayung uban adi mbŭh manyap, di tunda Shetan.

¹⁶ Pak kambŭi agi dayung adi Kristen adi biyŭn bara dayung uban di rawang-i, ayŭh dŭh siŭn dŭh sita ngara, so-i nyusah eklisia da jaga ngara. Simŭnŭ eklisia bisa jaga dayung uban adi mbŭh sawŭ udip sadi.

¹⁷ Bara nyamba eklisia adi ndai kraja kana darŭm ngara kingat eklisia patut trima duwŭh rupet gaji, rabis-i ngara adi bandar nyiraja tura ka nyuse pinganang Tapa ka ngajar.

¹⁸ Amai Surat-kudus agi nang, “Dŭhnyah na kayuh di baba sapi bada-i dŭh bisa man darŭm kuu pakai-i da ngiik” ka “Daya adi nyiraja patut dog nggen gaji-i.”

¹⁹ Dŭhnyah dingah pinganang daya adi nyarah nyamba eklisia kambŭi-i dŭh so duwŭh puan kah taruh naan saksi.

²⁰ Ngajar di sirung jawin daya bagŭ sopŭrŭg ngara adi ndai dosa, isa adi bŭkŭn taru.

²¹ Di sirung jawin Tapa ka di sirung jawin Kristus Jesus ka di sirung jawin bara malaikat kudus aku mite kuu tunda pinyitayan ati ngga atin kana adi dŭh mien daya darŭm sopŭrŭg pingandai mu.

²² Dŭhnyah bigaut na tangan di tunduh ubak daya ngga ngara ayŭh yŭn kraja Tuhan. Dŭhnyah ndai dosa sabab daya bŭkŭn mbŭh bidosa; bada adŭp mu bisig.

²³ Dŭhnyah nok piin adŭ, pak nok nisit wain yŭn kana tain mu, amai kuu siraru mudar.

²⁴ Dosa kada daya tungang dog kiris, ka ngara mbŭh diŭ kinyam sarah diŭ so ngara dog bisara; pak dosa daya bŭkŭn rambat tatŭng.

²⁵ Simŭnŭ gŭh pingandai kana granan tatŭng; ka anŭ adi dŭh paŭh tatŭng dŭh gŭh bisa dog sukan.