1 TIMOTHY 4 - Hakcipta - Biatah Bidayuh

Bara Gurū Kadong

¹ Roh Kudus nakit kidaan nang di andu sikasŭn kada daya re pasan pinyabah ngara; ngara re bituan di roh adi kadong ka tunda ajar umot.

² Ajar adi mun anŭ mbŭh dog pikambang bara pingadong, adi dŭh piduri pikir-kira atin-i adi kana.

³ Ngara anŭ ngajar nang daya banan sawan sarah; ngara gŭh ngajar nang agi kada pinguman adi dŭh siŭn daya man. Pak Tapa napa pinguman anŭ yŭn dog man bara adi sabah adi mbŭh puan ajar adi sawŭ, ripas ko nggen dua trima kaseh.

⁴ Sopŭrŭg kayuh adi Tapa ko napa agi kana; ndi mating gŭh siŭn dog nang dŭh kana, pak sopŭrŭg-i siŭn dog trima ngga dua trima kaseh,

⁵ sabab pinganang Tapa ngga dua anŭ mbŭh bada-i bisa dog man.

Urun Kristus Jesus adi Kana

⁶ Kambŭi kuu nggen pinyitayan ati di bara adi sabah, kuu re jadi urun Kristus Jesus adi kana, darŭm kuu paan adŭp mu darŭm roh ngga pinganang pinyabah ka ngga ajar adi sawŭ adi kuu mbŭh tunda.

⁷ Pak pijo adŭp mu so dundan dundan au-tarun, adi dŭh patut dog kidaan. Pikanyet adŭp mu udip darŭm adat.

⁸ Pigagah pŭrŭng agi kana-i, pak pigagah darŭm roh bagŭ yŭn-i kana, sabab-i natu pimudip adi madin ngga adi jŭ.

⁹ Ati inŭh pinganang adi sawŭ, an batur batur dog trima ka dog sabah.

¹⁰ Ata bandar bandar nyiraja, sabab ata mbŭh na pingarap ta di Tapa adi udip, adi Pinyikudip sopŭrŭg, rabis-i daya adi sabah.

¹¹ Nggen pinyitayan ka ajar anŭ di ngara.

¹² Dŭhnyah daya ngamun kuu sabab kuu gibabŭ mara, pak jadi suto danding yŭn sopŭrŭg adi sabah darŭm piminyu mu, darŭm urah-rakah mu, darŭm pinyirindu mu, darŭm pinyabah mu, ka darŭm aran pimudip bisig mu.

¹³ Ndŭg ka aku mbŭh mandŭg, kuu an ari basa Surat-kudus di tika simayang ka an ari nyuse pinganang Tapa ka ngajar daya.

¹⁴ Dŭhnyah dŭh pakai pinganggen roh adi agi darŭm kuu, adi ko dog nggen di kuu kan bara nabi minyu pasar kuu ka bara nyamba eklisia na tangan ngara di tunduh ubak mu.

¹⁵ Ndai sopŭrŭg kayuh anŭ ka na pikir mu dieh, siŭn kraja mu tatŭng mujur di sirung jawin sopŭrŭg daya.

¹⁶ Jaga adŭp mu ka ingat ani anŭ adi kuu ngajar. Adu adu ndai simŭnŭ, ka kuu re nyiramat dŭh-i adŭp mu adŭ, pak sopŭrŭg daya adi dingah kuu.