1 TIMOTHY 3 - Hakcipta - Biatah Bidayuh

Bara Nyamba Eklisia

¹ Sawŭ pinganang ati: Daya adi graŭh an jadi nyamba eklisia, taŭn-i gruwŭn kraja adi raru kana.

² Nyamba eklisia dŭh siŭn biyŭn sarah; ayŭh dŭh siŭn dŭh an biyŭn ndi adŭ sawŭn, Ayŭh dŭh siŭn dŭh an tuuh tuuh darŭm aran pimudip-i, an pandai jaga adŭp-i so pinyiripong adi sarah, buang pakit. Ayŭh dŭh siŭn dŭh an kambat pinami di ramin arŭn-i; ayŭh an pandai ngajar;

³ ayŭh dŭh siŭn daya adi pimabuk puan kah daya adi mangah, pak duduh buang dŭh pinyikaii; ayŭh dŭh siŭn gira duit;

⁴ ayŭh dŭh siŭn dŭh an pandai ngatur rawang adŭp-i, ka bada bara anak-i nundok ka stabi di adŭp-i.

⁵ Amai kambŭi daya dŭh pandai ngatur rawang adŭp-i, simuki meh ayŭh re bisa jaga eklisia Tapa?

⁶ Ayŭh dŭh siŭn daya adi muran mŭrŭt jadi Kristen, siŭn ayŭh dŭh bakak ka gambung ka dog nunggu, nimun Siarap.

⁷ Ayŭh patut daya adi dog stabi daya adi dŭh Kristen, siŭn ayŭh dŭh dog pimangŭh ka rabu darŭm pirakap Siarap.

Bara Pinurung di Eklisia

⁸ Pinurung eklisia dŭh siŭn dŭh gŭh an daya adi kana urah rakah-i buang an daya adi tŭnggŭn atin-i; ngara dŭh siŭn daras nok wain puan kah gira duit;

⁹ ngara patut bidigŭng tagap ngga pikir-kira atin adi bisig di ajar pinyabah Kristen adi Tapa mbŭh kiren.

¹⁰ Ngara an diŭ dog suba, komŭnŭ, kambŭi tungang kiren adŭp-i sukup kana, yŭn bisa dog tambit jadi pinurung.

¹¹ Sawŭn ngara gŭh dŭh siŭn dŭh an daya adi kana urah-i, dŭh daya adi pingitong; ngara dŭh siŭn dŭh an pandai jaga adŭp-i, ka taban atin-tŭnggŭn darŭm sopŭrŭg kayuh.

¹² Sianŭ adi jadi pinurung eklisia dŭh siŭn dŭh an biyŭn ndi sawŭn adŭ, ka an pandai ngatur bara anak ka rawang-i.

¹³ Bara pinurung adi pandai ndai kraja ngara re dog stabi ka re tungang minyu ngga atin birani pasar pinyabah ngara di Kristus Jesus.

Rusia Bās

¹⁴ Darŭm aku nuris surat ati ka kuu, aku harap aku re rikas bidapŭd ngga kuu.

¹⁵ Pak kambŭi aku rambat, surat ati re kiren di kuu munki ata patut ngatur urah ta darŭm rawang Tapa, adi eklisia Tapa adi udip, tiang ngga pinagap ajar adi sawŭ pasar Tapa.

¹⁶ Mating daya tungang miman munki masam bās-i rusia adat ta: Ayŭh mandŭg darŭm gayŭn manusia, mbŭh Roh Kudus kiren nang pimunos asŭng Tapa, ka dog kiris bara malaikat. Ayŭh dog nyuse di barang bangsa, ka ndi ong ong mbŭh sabah di Ayŭh, ka Ayŭh mbŭh dog pakat ka shorga.