1 SAMUEL 7 - Hakcipta - Biatah Bidayuh

¹ Jadi daya di Kiriath Jearim tambit Pati Simanya TUHAN ka taban-i ka ramin ndi naan daya dŭn Abinadab adi rŭŭ di tibung sandah. Ngara nyikudus anak dari-i Eleazar ka bada ayŭh jadi tukang jaga Pati Simanya.

Samuel Mritah Israel

² Pati Simanya TUHAN anŭ agi di Kiriath Jearim mua tian-i, kurang rabis duwŭh puru sawa. Sitadŭn anŭ sopŭrŭg daya Israel bagan mite turung so TUHAN.

³ Samuel nang di daya Israel, “Kambŭi angān an pari ka TUHAN ngga siabo atin ngan, angān dŭh siŭn dŭh taran sopŭrŭg tapa saruh ngga gayŭn gayŭn tapa Astart. Nitah adŭp ngan ngga sipuno puno-i ka TUHAN ka nyambah Ayŭh sadi adŭ, ka Ayŭh re piruah angān so kuasa daya Philistine.”

⁴ Jadi bara daya Israel taran sopŭrŭg tibudo Baal ngga Astart, ka nyambah TUHAN sadi adŭ.

⁵ Komŭnŭ Samuel bagan sopŭrŭg daya Israel bada tikuruk di Mizpah, nang, “Aku re bidua ka TUHAN yŭn ngan diginŭ.”

⁶ Jadi sopŭrŭg ngara tikuruk di Mizpah. Ngara pēn piin ka ren-i ndu sadis pinganggen ka TUHAN ka bipusa ndi andu andu anŭ. Ngara nang “Ata mbŭh bidosa rawan TUHAN.” (Mizpah inŭh tarun adi yŭn Samuel nyirase kaii daya Israel.)

⁷ Kan daya Philistine dingah daya Israel mbŭh tikuruk di Mizpah, raja daya Philistine adi rimŭh naan makat ngga bara daya ngara an di nyerang daya Israel. Bara daya Israel dingah ka jadi taru,

⁸ ka nang di Samuel, “Adu adu bidua ka TUHAN adi Tapa ta bada nyiramat ata so daya Philistine.”

⁹ Samuel siŭ ndi anak biri ka mŭrŭng badang-i ndu sadis ka TUHAN. Komŭnŭ ayŭh bidua ka TUHAN bada turung Israel, ka TUHAN nam pimite-i.

¹⁰ Sitadŭn Samuel jugan sadis anŭ, bara daya Philistine piguru nyerang ngara; pak nganŭ gŭh TUHAN bidudū so rangit rawan ngara. Bara daya Philistine mbŭh sukup riruk buang kandang-kandŭ babak bu taru.

¹¹ Bara soldadu daya Israel masang so Mizpah ka tadak daya Philistine batang re jeh ndŭg Bethcar, buang siŭ ngara ndi aran aran.

¹² Jadi Samuel tambit ndi batuh, pijog-i di asah Mizpah ngga Shen, ka nang, “TUHAN mbŭh ngga siabo asŭng-I turung ata” — ka kadŭn batuh anŭ “Batuh Pinurung.”

¹³ Jadi daya Philistine mbŭh dog ngarah, ka TUHAN bada ngara dŭh tungang nyerang tarun tana Israel sitadŭn Samuel udip.

¹⁴ Sopŭrŭg kupo adi daya Philistine ko sirabut di asah Ekron ngga Gath mbŭh dog pari ka Israel; ka Israel meh mbŭh pari biyŭn sopŭrŭg tarun tana-i. Ka bara daya Israel ngga bara daya Canaan gŭh mbŭh udip bamai.

¹⁵ Samuel mritah Israel sitŭkŭd umbur-i.

¹⁶ Barang sawa ayŭh panu ka Bethel, Gilgal, ngga Mizpah, ka diginŭ ayŭh ari nyirase kaii daya.

¹⁷ Komŭnŭ ayŭh ari pari ka ramin adŭp-i di Ramah, di yŭn-i ndai kraja-i jadi akim. Di Ramah ayŭh pijog ndi mija-sambah ka TUHAN.