1 SAMUEL 30 - Hakcipta - Biatah Bidayuh

Biperang Rawan Daya Amalek

¹ Duwŭh andu ripas anŭ David ngga bara daya-i mandŭg ka Ziklag. Daya Amalek mbŭh mirupak di tura ka siratan Judah ka nyerang Ziklag. Ngara mbŭh sigot kupo Ziklag

² ka nakap sopŭrŭg dayung. Ngara dŭh siŭ barang naan daya, pak taban ngara ngga bu kan ngara bu tingge kupo anŭ.

³ Kan David ngga bara daya-i ndŭg nŭ, ngara dapŭd kupo mbŭh dog sigot ka bara sawŭn ngara, anak anak dari ngara, samŭn anak anak dayung ngara mbŭh dog taban ngga bu.

⁴ David ngga bara daya-i sien ka dŭh ko ko sien ndŭg ka ngara mbŭh raru kawŭk.

⁵ Duwŭh naan sawŭn David, Ahinoam ngga Abigail, mbŭh dog taban gŭh ngga bu.

⁶ David madin mbŭh dog pinyusah bās, sabab bara daya-i mbŭh baji di ayŭh amai anak anak ngara mbŭh mating, ka ngara mbŭh re an manjan ayŭh ngga batuh. Pak TUHAN Tapa nŭtŭd atin-i.

⁷ David nang di imam Abiathar adi anak Ahimelech, “Taban ka yŭn ku efod,” ka Abiathar taban-i ka yŭn-i.

⁸ David siken TUHAN, “Bisa kah aku tadak bara pirupak anŭ? Bisa kah aku nakap ngara?” Ayŭh nam, “Tadak ngara; kuu re nakap ngara ka nyiramat bara adi dog nakap.”

⁹ Jadi David ngga nŭm ratus daya-i matak, ka kan ngara mandŭg di Sungi Besor, kada so ngara rŭŭ diginŭ.

¹⁰ David pijuu pimanu-i ngga pat ratus naan daya-i. Duwŭh ratus naan adi bŭkŭn mbŭh raru kawŭk re mutas sungi, jadi ngara dŭh sua.

¹¹ Bara daya David dapŭd ndi naan daya Egypt di sapa tarun ka taban ayŭh ka yŭn David. Ngara nggen di ayŭh pinguman ngga piin,

¹² kada pisŭk buwa ara, ka duwŭh tundun pisŭk buwa anggor. Ripas ayŭh muko man, yang-i mbŭh pari ranyah, amai ayŭh mbŭh taruh andu dŭh man dŭh nok.

¹³ David siken ayŭh, “Asi tuan mu, ka so ki kuu mandŭg?” “Aku daya Egypt, urun daya Amalek,” ayŭh nam. “Tuan ku tagan aku taruh andu adi mbŭh ripas amai aku mandam?”

¹⁴ Kieh ko mirupak tarun tana daya Chereth di parad tura ka siratan Judah samŭn tarun tana manak Caleb, ka Ziklag kieh sigot.”

¹⁵ “An kah kuu nguru aku ka yŭn pirupak anŭ?” David siken ayŭh. Ayŭh nam, “Aku an kambŭi kaam bijanji ngga adŭn Tapa kaam dŭh re siŭ aku bait nyerah aku ka tuan ku.”

¹⁶ Ka ayŭh nguru David ka yŭn ngara. Bara pirupak anŭ mbŭh mingare guru, man, nok, pawŭn amai dudu kayuh adi ngara mbŭh sirapas so Philistia ngga Judah.

¹⁷ Ngga siri jawa andu jawa ndi David nyerang ngara ka bisaad ndŭg singumi andu. Ndi naan mating so ngara rupas kaŭs-i ngara adi pat ratus naan adi nunggang onta adŭ dapŭd bu.

¹⁸ David nyiramat barang naan daya ka sopŭrŭg kayuh adi daya Amalek muko sirapas, samŭn sawŭn-i adi duwŭh naan;

¹⁹ sopŭrŭg dog dapŭd. David tambit pari sopŭrŭg anak dari ngga anak dayung bara daya-i, samŭn sopŭrŭg kayuh adi daya Amalek muko sirapas.

²⁰ Ayŭh dapŭd gŭh pari sopŭrŭg biri ngga dāng kudip adi bŭkŭn. Bara daya-i bada dāng kudip panu diŭ di jawin ngara ka nang, “Ati tung David!”

²¹ Komŭnŭ David di pari ka yŭn duwŭh ratus naan daya-i adi dŭh sua matak ngga ayŭh amai mbŭh raru kawŭk ka adi kajŭn di Sungi Besor. Ngara di nyupat David ngga bara daya-i, ka David tudu ngara ka tabi ngara ngga sanang asŭng.

²² Pak agi adi arap ngga adi sibut adi muko matak ngga David nang, “Ngara mating sua ngga ata, ngga sabab anŭ ngara dŭh re dog nggen kayuh adi dog sirapas. Ngara bisa tambit sawŭn sawŭn ngara ngga anak anak ngara, ka bu.”

²³ Pak David nam, “Angān bara dingan ku, angān dŭh siŭn simŭnŭ ngga kayuh adi TUHAN mbŭh nggen di ata! Ayŭh grindung ata ka bada ata manang ngarah bara pirupak anŭ.

²⁴ Mating daya re situju ngga kayuh adi nang ngan! Sopŭrŭg dŭh siŭn dŭh dapŭd utung: sianŭ adi ningge ka jaga barang ta patut dapŭd utung adi brimun ngga tung sianŭ adi sua matak biperang.”

²⁵ David ndai atur anŭ, adi dog tunda di Israel so andu anŭ ndŭg madin.

²⁶ Kan David pari ka Ziklag, ayŭh pait kada so kayuh sirapas anŭ ka bara dingan-i, adi bara pinguru di Judah, ngga pinganang, “Ati inŭh pinganggen yŭn ngan so dudu kayuh sirapas adi kieh tambit so pinganyu TUHAN.”

²⁷ Ayŭh pait-i ka daya di Bethel, ka daya di Ramah di parad tura ka siratan Judah, ka daya di kupo kupo Jattir,

²⁸ Aroer, Siphmoth, Eshtemoa,

²⁹ ngga kupo Racal; ka manak Jerahmeel, ka daya Ken,

³⁰ ka daya di kupo kupo Hormah, Borashan, Athach,

³¹ ngga Hebron. Ayŭh pait-i ka barang yŭn adi ayŭh ngga bara daya-i muko yŭn bigandon.