1 SAMUEL 27 - Hakcipta - Biatah Bidayuh

David di Dupan Daya Philistine

¹ David nang darŭm asŭng-i, “Ndi andu Saul re siŭ aku. Kana dŭ aku bu ka Philistia. Komŭnŭ Saul re dŭh tia jiroh aku di Israel, ka aku re siramat.”

² Jadi David ngga bara daya-i adi nŭm ratus naan bigaut di ka yŭn Achish anak Maoch, adi raja di Gath.

³ David ngga bara daya-i rŭŭ diginŭ di Gath ngga rawang ngara. David taban duwŭh naan sawŭn-i, Ahinoam so Jezreel, ngga Abigail, uban Nabal, so Carmel.

⁴ Kan Saul dingah David mbŭh bu ka Gath, ayŭh dŭh tia jiroh ayŭh.

⁵ David nang di Achish, “Kambŭi kaam jerā ku, bada aku biyŭn ndi kupo yŭn aku rŭŭ. Dŭhsah aku rŭŭ ngga kaam di sindŭ kupo, tuan.”

⁶ Jadi Achish nggen di ayŭh kupo Ziklag, ka sabab anŭ meh Ziklag dog dapu raja raja Judah so andu anŭ.

⁷ David rŭŭ di Philistia sitŭkŭd simŭng nŭm buran.

⁸ Di tipuh anŭ, siraru-i David ngga bara daya-i di nyerang daya Geshur, daya Girzi, ka daya Amalek, adi taŭn mbŭh raru tui rŭŭ di abong anŭ. Ayŭh mŭrŭt tarun tana ngara jeh ndŭg Shur, ndi abong abong tarun ndŭg Egypt,

⁹ siŭ sopŭrŭg dari ngga dayung ka sirapas biri, sapi, kaldi, onta; ndŭg ka piraka dog sirapas gŭh. Komŭnŭ, siraru-i, ayŭh pari ka Achish,

¹⁰ adi an siken, “Diki kuu mirupak kari ati?” ka David nam ka kidaan nang ayŭh di ka parad tura ka siratan Judah, puan kah di ka tarun tana manak Jerahmeel, puan kah di ka tarun tana adi yŭn daya Ken rŭŭ.

¹¹ David siŭ barang naan daya, dari dayung, isa mating daya adi tungang pari ka Gath ka kidaan ani sibandar-i kayuh adi David ngga bara daya-i mbŭh ndai. Anŭ inŭh kayuh adi David ndai sitŭkŭd ayŭh rŭŭ di Philistia.

¹² Pak Achish sabah di David ka nang darŭm asŭng-i, “David ruai dog tiru daya Israel adi daya adŭp-i, ngga bada ayŭh re bituan di aku sitŭkŭd umbur-i.”