1 SAMUEL 23 - Hakcipta - Biatah Bidayuh

David Nyiramat Kupo Keilah

¹ David dingah daya Philistine nyerang kupo Keilah ka mbŭh naku gandom adi bauh ko dog ngatŭm.

² Jadi ayŭh siken TUHAN, “Bisa kah aku di nyerang daya Philistine?” “Bisa,” TUHAN nam. “Nyerang ngara ka nyiramat Keilah.”

³ Pak daya David nang di ayŭh, “Digiti di Judah mbŭh sadang gŭh kayuh adi ata taru. Re rabis mandam kambŭi ata di ka Keilah ka nyerang bara soldadu daya Philistine!”

⁴ Jadi David siken di TUHAN dinge, ka TUHAN nang di ayŭh, “Panu di nyerang Keilah, sabab Aku re nggen di kuu pimanang ngarah daya Philistine.”

⁵ Jadi David ngga daya-i di ka Keilah ka nyerang daya Philistine; ngara siŭ bagŭ daya Philistine ka tambit dāng kudip ngara. Ka simŭnŭ inŭh David nyiramat kupo anŭ.

⁶ Di andu Abiathar anak Ahimelech bu ka tunda David di Keilah, ayŭh taban efod.

⁷ Saul agi dog kidaan nang David mbŭh di ka Keilah, ka-i nang, “Tapa mbŭh na ayŭh ka darŭm tangan ku. David mbŭh tikapung amai mŭrŭt kupo adi bikuta, ka tiban-i adi bisa dog ngabŭt.”

⁸ Jadi Saul taban bara soldadu-i ngga matak di nyerang Keilah ka nyikapung David ngga daya-i.

⁹ Kan David dingah Saul re nyerang adŭp-i, ayŭh nang di imam Abiathar, “Taban efod ngga kamati.”

¹⁰ Komŭnŭ David nang, “TUHAN, adi Tapa Israel, aku mbŭh dingah Saul re mandŭg ka Keilah ka pirubuh-i sitagar aku adi urun Mai.

¹¹ Re daya kupo Keilah nyerah kah aku ka Saul? Re sawŭ mandŭg ka Saul, sak adi dingah ku? TUHAN, adi Tapa Israel, aku mite Kaam nam aku!” TUHAN nam, “Saul sawŭ re mandŭg.”

¹² “Re daya Keilah nyerah kah aku ngga daya ku ka Saul?” David siken dinge. “Ngara re nyerah,” TUHAN nam.

¹³ Jadi David ngga daya-i, adi agi kurang rabis nŭm ratus naan sopŭrŭg ngara, rasu bu so Keilah ka adu adu panu tambus tarun ndi ka tarun andi. Kan Saul dingah David mbŭh bu so Keilah, ayŭh dŭh jadi kamanŭ.

David di Rais Tarun Tana Sandah

¹⁴ David bisukan di tarun tana sandah, di tarun tana-pajam sindŭk Ziph. Saul taŭn ari raan dapŭd ayŭh, pak Tapa dŭh nyerah ayŭh ka darŭm tangan-i.

¹⁵ David taru amai Saul mbŭh bigŭtŭ an siŭ ayŭh. David agi di Horesh, di tarun tana-pajam sindŭk Ziph.

¹⁶ Jonathan di ka yŭn-i diginŭ ka natu ngga ayŭh pinyigrindung Tapa,

¹⁷ nang-i di ayŭh, “Dŭhnyah taru. Sama ku Saul dŭh re tungang ida ida ngga kuu. Ayŭh puan nang kuu inŭh adi re jadi raja Israel ka aku ati adi re darŭm pangkat numbor duwŭh di ribo mu.”

¹⁸ Ngara duwŭh ndai janji kudus re ari tŭtŭd ngga dingan-i. David rŭŭ di Horesh, ka Jonathan mari ka ramin-i.

¹⁹ Agi kada daya so Ziph di ka yŭn Saul di Gibeah ka nang, “David agi bisukan di tarun tana ami di Horesh di darŭd Hachilah, di parad siratan tarun tana-pajam Judea.

²⁰ Kieh puan, Tuan Raja garis an nakap ayŭh; mandŭg ka tarun tana ami, ka kieh re turung kaam nakap ayŭh.”

²¹ Saul nam, “Isa-i TUHAN nyiberkat angān amai angān mandis ngga aku!

²² Panu dinge dŭm ndi sidah, ka natu tarun yŭn-i ka asi adi mbŭh kiris ayŭh diginŭ. Aku dingah ayŭh anŭ ruai nang pitar.

²³ Jiroh sopŭrŭg tarun yŭn-i bisukan ka rasu pari di kidaan di aku. Komŭnŭ aku re di ngga angān, ka kambŭi ayŭh gibabŭ di abong anŭ, aku re jiroh ayŭh, singadu aku kasau ndi tarun tana Judah.”

²⁴ Jadi ngara bu ka pari ka Ziph diŭ so Saul. David ngga daya-i agi di tarun tana-pajam Maon, di rubān adi pajam di parad tura ka siratan tarun tana-pajam Judea.

²⁵ Saul ngga daya-i matak di jiroh David, pak David agi dingah ka bu di ka sandah pibatuh di tarun tana-pajam Maon ka rŭŭ diginŭ. Kan Saul dingah, ayŭh di nudug David.

²⁶ Saul ngga daya-i di ndi parad sandah anŭ, sidŭrŭ so yŭn David ngga daya-i adi di parad mandi sandah anŭ. Ngara mbŭh bigaut bu so Saul ngga daya-i, adi mbŭh sindŭk re nyandat ka nakap ngara.

²⁷ Nganŭ gŭh ndi naan pinyisung mandŭg ka nang di Saul, “Rikas mari! Daya Philistine nyerang rais ta!”

²⁸ Jadi Saul dŭh tia tadak David ka mari di rawan daya Philistine. Ngapŭi meh tarun anŭ dog kadŭn Sandah Sidŭrŭ.

²⁹ David bu di ka tarun tana Engedi, di yŭn-i rŭŭ bisukan.