1 SAMUEL 22 - Hakcipta - Biatah Bidayuh

Bara Imam dog Siŭ

¹ David bu so kupo Gath, di ka tāng sindŭk anak kupo Adullam. Kan bara jurud dari-i ngga bara adi bŭkŭn so rawang-i dingah ayŭh diginŭ, ngara tudu ayŭh.

² Daya adi dog kinanyuh, adi birutang, puan kah adi dŭh munos asŭng-i, di ka yŭn-i. Agi pat ratus naan sopŭrŭg ngara, ka ayŭh jadi pinguru ngara.

³ David pijuu pimanu-i so nŭ di ka Mizpah di Moab ka nang di raja so Moab, “Turung bada sindŭ sama ku mandŭg ka rŭŭ ngga kaam ndŭg ka aku mbŭh puan ani re Tapa ndai yŭn ku.”

⁴ Jadi David tingge sindŭ sama-i di yŭn raja di Moab, ka ngara rŭŭ diginŭ sitŭkŭd David bisukan di tāng.

⁵ Komŭnŭ nabi Gad mandŭg ka yŭn David ka nang, “Dŭhnyah rŭŭ digiti; rikas bu di ka tarun tana Judah.” Ka David bu di ka tuān Hereth.

⁶ Ndi andu Saul agi di Gibeah, guru di ribo tŭngŭn kayuh tamarisk di sandah; jarok di tangan-i, ka sopŭrŭg pingubak soldadu-i mijog maning ayŭh. Ayŭh agi dog kidaan nang David ngga bara daya-i mbŭh dog kiris,

⁷ ka-i nang di bara pingubak soldadu-i, “Dingah, angān daya Benjamin! Di pikir ngan, re David nggen kah dŭh tarun tana ŭmŭh ngga teya anggor di sopŭrŭg ngan, ka bada angān jadi pingubak soldadu yŭn bara soldadu-i?

⁸ Anŭ kah sabab angān bipekat rawan aku? Ndi mating gŭh angān kidaan di aku nang anak adŭp ku mbŭh bipambit ngga David. Mating angān piduri aku ka kidaan di aku nang David, adi ndi so daya ku, madin jiroh aran an siŭ aku, ka anak adŭp ku mbŭh ngatat ayŭh!”

⁹ Doeg agi mijog diginŭ ngga pingubak pingubak soldadu Saul, “Aku agi kiris David di andu ayŭh di ka Ahimelech anak Ahitub di Nob.

¹⁰ Ahimelech siken TUHAN kayuh adi David patut ndai, ka komŭnŭ ayŭh nggen di David pinguman ngga pedang Goliath daya Philistine.”

¹¹ Jadi Raja Saul bada daya kidaan di Ahimelech samŭn sopŭrŭg madis-i, adi jadi imam di Nob, da mandŭg tudu adŭp-i.

¹² Saul nang di Ahimelech, “Dingah, Ahimelech!” “Ani tuan,” ayŭh nam.

¹³ Saul siken ayŭh, “Mani kuu ngga David bipekat rawan aku? Mani kuu nggen di David pinguman ngga pedang, ka bisiken ngga Tapa yŭn-i? Madin ayŭh mbŭh kajŭn pluang ngga siŭ aku!”

¹⁴ Ahimelech nam, “David inŭh adi siabo tŭtŭd pingubak soldadu adi kaam biyŭn! Ayŭh iban adŭp mai, pingubak bara pingibān mai, ka dog stabi barang naan daya di istana.

¹⁵ Sawŭ, aku bisiken ngga Tapa yŭn-i, ka anŭ dŭh-i muran-i. Jeja ka bipekat rawan kaam, Tuan Raja dŭh siŭn nyarah aku puan kah tadŭ tadŭ daya di rawang ku. Aku dŭh puan har anŭ!”

¹⁶ Raja nang, “Ahimelech, kuu ngga sopŭrŭg madis mu dŭh siŭn dŭh kabŭs.”

¹⁷ Komŭnŭ ayŭh nang di pingubak soldadu adi mijog sindŭk ayŭh, “Siŭ imam imam TUHAN! Ngara mbŭh bipekat ngga David ka dŭh kidaan di aku nang ayŭh mbŭh bu, pŭn ka ngara puan.” Pak bara pingubak anŭ abah pakat tangan ngara siŭ imam imam TUHAN.

¹⁸ Jadi Saul nang di Doeg, “Kuu siŭ ngara!” — ka Doeg siŭ sopŭrŭg ngara. Di andu anŭ ayŭh siŭ mai puru-rimŭh naan imam adi tibirang taban efod.

¹⁹ Saul mritah gŭh bada sopŭrŭg adi rŭŭ di Nob, kupo bara imam, dog siŭ: bara dari ngga dayung, anak-anya ngga anak pira, sapi, kaldi, samŭn biri — sopŭrŭg dog siŭ.

²⁰ Pak Abiathar, ndi naan so anak Ahimelech, tungang pirupas adŭp-i, ka di ka yŭn David.

²¹ Ayŭh kidaan munki Saul siŭ bara imam TUHAN.

²² David nang di ayŭh, “Kan aku kiris Doeg andu anŭ, aku puan nang ayŭh taŭn re kidaan di Saul. Jadi aku inŭh adi dapu tanggong di pinyikabŭs sopŭrŭg madis mu.

²³ Rŭŭ ngga aku ka dŭhnyah taru. Saul raan siŭ so-duwŭh ta, pak kuu re siramat ayō aku digiti.”