1 SAMUEL 21 - Hakcipta - Biatah Bidayuh

David Bu Mangān Saul

¹ David di ka yŭn imam Ahimelech di Nob. Ahimelech kimŭtŭr buang-i ruah di dapŭd ayŭh ka siken, “Mani kuu mandŭg kamati sadi adŭp mu?”

² “Aku mandŭg so pinyibada raja,” David nam. “Ayŭh bada aku dŭh kidaan di tadŭ tadŭ daya pingandu ku. Aku mbŭh kidaan di bara daya ku bada bidapŭd ngga aku di ndi yŭn.

³ Ka madin, ani pinguman biyŭn mu? Nggen di aku rimŭh baru ruti puan kah tadŭ tadŭ kayuh adi kuu biyŭn.”

⁴ Imam anŭ nam, “Aku dŭh biyŭn ruti biasa, adŭ-i ruti kudus; kuu bisa tambit kambŭi daya mu gi-mating nyibŭŭs ngga dayung bauh bauh ati.”

⁵ “Taŭn ngara gi-mating nyibŭŭs ngga dayung,” David nam. “Daya ku ari bada adŭp ngara bisig nanyam ka adat, ka di tika ngara panu ndai kraja biasa ani. Jung meh madin amai matak di ndai kraja adi raru raru biguna, kieh pijo adŭp ami so dayung!”

⁶ Jadi imam anŭ nggen di David ruti kudus anŭ, sabab ruti adi-i biyŭn kaŭs-i ruti adi dog jugan ka Tapa, adi muko dog kadi so mija kudus ka dog gati ngga tibŭn ruti. (

⁷ Pingubak pingingat dāng Saul, adi mandŭg so Edom, tipia agi gŭh diginŭ andu anŭ, re pijadi kraja pingandai adat adi dŭh siŭn dŭh dog ndai.)

⁸ David nang di Ahimelech, “Agi kah jarok bait pedang adi tungang kuu nggen di aku? Raja mritah aku bada rikas panu ndŭg ka aku dŭh sipŭt tambit pedang bait sinyata ku adi bŭkŭn.”

⁹ Ahimelech nam, “Aku biyŭn pedang Goliath daya Philistine, adi kuu ko siŭ di ruban Elah. Pedang anŭ agi di punok efod ajeh, dog marut ngga banang. Kambŭi kuu raan, kuu bisa tambit-i — anŭ adŭ sinyata adi agi digiti!” “Nggen-i di aku,” David nang, “Mating pedang bŭkŭn adi re rabis kana so anŭ.”

¹⁰ David rasu bu, mangān Saul, ka di ka Raja Achish di Gath.

¹¹ Pinurung raja nang di Achish, “Dŭh kah ati David, raja di rais adŭp-i? Pasar siati inŭh bara dayung biragu, buang ngara bitanda, ‘Saul mbŭh siŭ biribu ribu naan pinganyu, pak David mbŭh siŭ bipuru-puru ribu naan pinganyu.’ ”

¹² Pinganang ngara mŭrŭt atin David, ngga bada ayŭh raru taru di Raja Achish.

¹³ Jadi kan ngara mbŭh di arong anŭ, David ngakar jadi daya adi dŭh tirase atŭk-i, ka ngakar mun daya gira kan ngara suba bitan ayŭh. Ayŭh nyuteng tiban tiban-bās kupo ka rayang-i aman di gagap-i.

¹⁴ Jadi Achish nang di bara pinurung-i, “Tingga! Daya anŭ gira! Mani taban ayŭh ka yun ku?

¹⁵ Dŭh ka aku mbŭh biyŭn bagŭ daya gira? Mani taban adi bŭkŭn dinge bada nyusah aku ngga urah-i adi mun anŭ di ramin ku?”