1 SAMUEL 2 - Hakcipta - Biatah Bidayuh

Dua Hannah

¹ Hannah bidua, “TUHAN mbŭh bada atin ku gaŭn; munki raru gaŭn aku amai kayuh adi Ayŭh mbŭh ndai! Aku tawŭh pinganyu ku; munki raru gaŭn atin ku amai Tapa mbŭh turung aku!

² “Mating adi bŭkŭn re kudus mun TUHAN, mating adi bŭkŭn mun Ayŭh, Tapa ta sadi adŭ tungang grindung ata.

³ Pirŭŭ pinganang miruap ngan; bada pajam pinganang sambuh ngan. amai TUHAN inŭh Tapa adi puan, ka Ayŭh tingga arap kana di sopŭrŭg kraja pingandai daya.

⁴ Dudu bawŭh panah bara soldadu adi bake mbŭh pata, pak daya adi dŭh sinunuh jadi makin bake,

⁵ Daya adi muko ari bisoh man madin mbŭh bikuri jiroh man, pak adi sibŭrŭk mbŭh dŭh tia sibŭrŭk, dayung adi aboh mbŭh biranak ju madis anak, pak sindŭ adi biyŭn bagŭ anak mbŭh piasi adŭp-i sadi, dŭh biyŭn anak.

⁶ TUHAN siŭ ka Ayŭh gŭh adi pari kudip; Ayŭh pait daya ka ong daya adi mbŭh kabŭs ka taban ngara ngga pari dinge.

⁷ Ayŭh bada kada daya sirata ka adi bŭkŭn Ayŭh bada kaya; Ayŭh pirapat kada daya ka adi bŭkŭn Ayŭh bada bās.

⁸ Ayŭh pakat daya sirata so dabu runas ka katuh adi dog ngamun so sangsara ngara. Ayŭh bada ngara jadi dingan bara raja ka piguru ngara di tarun yŭn adi dog stabi. Pinagap-rasan ong ati inŭh TUHAN dapu; di tunduh-i Ayŭh mbŭh pijog ong.

⁹ “Ayŭh grindung pimudip daya-I adi tŭtŭd, pak adi ginaka miyap darŭm karŭm; manusia dŭh-i mujur bada pinyibake adŭp-i.

¹⁰ Pinganyu TUHAN re dog pirabur; Ayŭh re bidudū rawan ngara so rangit. TUHAN inŭh arang yŭn ndi ong ong; Ayŭh re nggen kuasa ka raja-I. Ayŭh re nggen pimanang di raja adi-I mien.”

¹¹ Komŭnŭ Elkanah pari mari ka Ramah, pak anak dari anŭ Samuel tingge di Shiloh ka bituan di TUHAN di ribo Imam Eli.

Anak Anak Eli

¹² Anak anak Eli inŭh daya adi ginaka. Ngara dŭh piduri TUHAN,

¹³ bait atur-adat pasar kayuh adi bisa imam mite so daya bagŭ. Gŭt-i kan daya jugan sadis, daya-gaji imam ari mandŭg taban sirapang adi bisakap taruh. Sitadŭn dagin anŭ gi-aŭn dog tanŭk,

¹⁴ ayŭh ari kujok sirapang anŭ ka darŭm priok, ka ani bait ani adi rakat di sirapang anŭ kan-i dog tarik so priok mbŭh jadi utung adi dog dapu imam. Sopŭrŭg daya Israel adi mandŭg ka Shiloh di jugan sadis mbŭh dog ndai simŭnŭ.

¹⁵ Nambah ka anŭ, diŭ so ramak dog kadi ka dog badang, daya-gaji imam ari mandŭg ka nang di sianŭ adi jugan sadis, “Nggen di aku kada dagin re imam manggang. Ayŭh dŭh trima dagin adi muko dog tanŭk ngga piin so kuu, ayŭh raan ata-i adŭ.”

¹⁶ Kambŭi daya anŭ nam, “Bada kieh ndai anŭ adi batur ka badang ramak anŭ diŭ; komŭnŭ, kuu bisa tambit anŭ adi raan mu,” daya-gaji imam ari nang, “Dŭh! Nggen-i di aku madin! Kambŭi kuu dŭh, aku re sirapas-i so kuu!”

¹⁷ Dosa anak anak Eli mbŭh raru sipŭ di batŭh TUHAN, sabab ngara dŭh stabi di sadis adi dog jugan ka TUHAN.

Samuel di Shiloh

¹⁸ Sitadŭn tipuh anŭ, Samuel pijuu bituan di TUHAN, nēn efod adi dog ndai so banang linen.

¹⁹ Barang sawa, sindŭ-i ndai anak jipo-ambu ka taban ka yŭn-i di tika ayŭh tunda banŭh-i di jugan sadis sawa.

²⁰ Komŭnŭ Eli ari nyiberkat Elkanah ngga sawŭn-i, ka nang di Elkanah, “Isa-i TUHAN nggen di kuu anak anak adi bŭkŭn so sawŭn mu ati ngga gati sianŭ adi angān mbŭh nitah ka TUHAN.” Ripas anŭ, ngara pari ka Ramah.

²¹ TUHAN nyiberkat Hannah, ka ayŭh biranak taruh madis anak dari dinge ka duwŭh madis anak dayung. Samuel masang baga bigatung sitadŭn ayŭh bituan di TUHAN.

Eli ngga anak anak-I

²² Eli madin mbŭh raru minyamba. Ayŭh mbŭh dŭh ko ko dingah pasar barang masam kayuh adi bara anak dari-i ndai di tunduh daya daya Israel, ka ngara gŭh agi bŭŭs ngga bara dayung adi nyiraja di rawa tiban Bari TUHAN.

²³ Jadi ayŭh nang di ngara, “Mani angān ndai kayuh adi mun anŭ? Barang naan daya kidaan di aku pasar pingandai arap ngan.

²⁴ Dŭh tia, nak! Mbŭh raru sipŭ-i kayuh adi daya TUHAN mbŭh nyidundan pasar angān.

²⁵ Kambŭi daya bidosa rawan dingan-i, Tapa bisa grindung sianŭ adi sarah; pak asi bisa grindung daya adi bidosa rawan TUHAN?” Pak ngara dŭh raan dingah pinganang sama-i, amai TUHAN mbŭh natu re siŭ ngara.

²⁶ Anak anŭ Samuel masang baga ka dog rindu TUHAN ngga daya bagŭ.

Pinganang-Binabi Pasar Rawang Eli

²⁷ Ndi naan nabi mandŭg tudu Eli taban pinganang ati so TUHAN. “Di tika babuk ngan Aaron ngga rawang-i jadi urun raja Egypt, Aku pinandŭng adŭp Ku di Aaron.

²⁸ So sopŭrŭg tibaran-asar Israel, Aku mbŭh mien rawang-i bada jadi bara imam Ku da ndai kraja di mija-sambah, badang kimanyan, ka nēn efod kan bisiken pasar kayuh ngga Aku. Ka Aku nggen di ngara hak tambit utung ngara so sadis sadis adi dog badang di mija-sambah.

²⁹ Ngga mani meh angān ripong kiris sadis ngga pinganggen adi daya Ku jugan ka Aku? Mani, Eli, kuu stabi dŭ di anak anak mu so kuu stabi di Aku darŭm kuu tandah ngara pigamu adŭp-i ngga tatad tatad adi siabo kana so sopŭrŭg sadis adi daya Ku jugan ka Aku?”

³⁰ Aku, adi TUHAN Tapa Israel, muko bijanji jah nang rawang mu ngga manak mu re adu adu jadi imam yŭn Ku. Pak madin Aku nang Aku dŭh tia raan-i simŭnŭ! Aku re stabi di sinadan daya adi stabi di Aku, ka ngara adi ngamun Aku re dog ngamun.

³¹ Dingah, tipuh re mandŭg adi ngga Aku re siŭ sopŭrŭg dari adi gi-mara di rawang ngga manak mu, isa mating dari di rawang mu re udip ndŭg ka nyamba-i.

³² Kuu re jadi susah, ka tingga ngga sina di sopŭrŭg berkat adi Aku re nggen di daya Israel adi bŭkŭn, pak ndi naan mating gŭh darŭm rawang mu re udip ndŭg ka nyamba-i.

³³ Sunggu mŭnŭ, Aku re kidŭm ndi naan so sesang mu bada udip, ka ayŭh re nyiraja jadi imam yŭn Ku. Pak ayŭh re karak ka mating tia pingarap-i, ka sopŭrŭg sesang mu adi bŭkŭn re dog pijera ndŭg kabŭs.

³⁴ Di tika anak dari mu Hophni ngga Phinehas samah kabŭs darŭm ndi andu, anŭ re kiren di kuu nang sopŭrŭg kayuh adi Aku muko nang re jadi bitŭtŭk,

³⁵ Aku re mien ndi naan imam adi re tŭtŭd di Aku ka adi re ndai sopŭrŭg kayuh adi Aku bada ayŭh ndai. Aku re nggen di ayŭh sesang sesang adi re nyiraja jadi imam yŭn raja adi Aku mien.

³⁶ Tadŭ tadŭ so sesang mu adi gibabŭ udip re tudu imam anŭ ka mite duit ngga pinguman so ayŭh, ka mite adŭp-i turung bara imam, ramŭn gŭh ngga dapŭd pinguman.”