1 SAMUEL 18 - Hakcipta - Biatah Bidayuh

¹ Saul ngga David muko kirakar. Ripas anŭ, Jonathan, anak Saul, mbŭh ruai titarik atin-i di David ka rindu ayŭh nimun rindu adŭp-i.

² Saul, so nganŭ, bada David rŭŭ ngga adŭp-i ka dŭh bada ayŭh mari ka ramin sama-i.

³ Jonathan bipayu adŭp-i bidingan tui ngga David sabab-i ruai rindu ayŭh.

⁴ Ayŭh kadi jipo-ambu adi-i nēn ka nggen-i di David, samŭn piraka perang-i, ka pedang-i, bawŭh panah, ngga abŭt kupong.

⁵ David mujur di barang kraja pingandai adi Saul pait ayŭh da ndai, ka Saul bada ayŭh jadi pingubak yŭn bara soldadu-i. Anŭ pimunos asŭng daya Saul samŭn bara pingubak soldadu adi bŭkŭn.

Saul Sina di David

⁶ Darŭm David pari ripas ko siŭ Goliath ka darŭm bara soldadu mari, bara dayung so barang kupo di Israel ruah di dapŭd Raja Saul. Ngara nang ragu gaŭn, bitanda, ka mambak tamburin ngga gambus.

⁷ Darŭm pawŭn bara dayung biragu, “Saul mbŭh siŭ biribu ribu naan pinganyu, pak David mbŭh siŭ bipuru-puru ribu naan pinganyu.”

⁸ Saul dŭh suka dingah, ka ayŭh jadi raru baji. Ayŭh nang, “Yŭn David ngara nang bipuru-puru ribu, pak yŭn ku ngara nang biribu ribu. Dŭh tui ngara re bada ayŭh jadi raja!”

⁹ So nganŭ meh ayŭh dŭh kana ngga David.

¹⁰ Andu anŭ ndi roh arap so Tapa tapŭ mandŭg di nguasa ayŭh, ka ayŭh gimaga darŭm ramin-i mun daya gira. David main kachapi-i, nimun adi barang andu-i main, ka Saul digŭng jarok.

¹¹ “Aku re nyigaru ayŭh bada rakat di sindung anŭ,” Saul nang darŭm asŭng-i, ka ayŭh nyigaru David ngga jarok-i piduwŭh kari; pak David ari rikas sigen adŭp-i.

¹² Saul taru David sabab TUHAN agi ngga ayŭh pak mbŭh tagan adŭp-i.

¹³ Jadi Saul pait ayŭh bada nguasa siribu soldadu. David nguru daya-i darŭm biperang

¹⁴ ka mbŭh mujur di sopŭrŭg kraja-i, sabab TUHAN agi ngga ayŭh.

¹⁵ Saul ngatin anŭ ka mbŭh rabis taru di ayŭh.

¹⁶ Pak barang naan daya di Israel ngga Judah rindu David sabab ayŭh pinguru adi pandai nguru ngara.

David Sawŭn Anak Dayung Saul

¹⁷ Komŭnŭ Saul nang di David, “Merab anak dayung ku. Aku re nggen ayŭh di kuu ndu sawŭn kambŭi kuu bituan di aku nimun soldadu adi pagan ka tŭtŭd, ka biperang yŭn TUHAN.” (Saul pikir darŭm ndai simŭnŭ daya Philistine re siŭ David, ka adŭp-i dŭhsah.)

¹⁸ David nam, “Asi aku ka ani rawang ku ka aku bisa jadi iban raja?”

¹⁹ Pak kan tipuh adi ngga Merab dog nggen di David, Merab dog nggen di ndi naan dari dŭn Adriel so Meholah.

²⁰ Anak Saul adi dŭn Michal, awang David, ka kan Saul dingah, ayŭh munos asŭng-i.

²¹ Ayŭh nang darŭm asŭng-i, “Aku re nggen Michal di David; aku re pakai ayŭh ngga kudog David, ka bada ayŭh dog siŭ daya Philistine.” Jadi mbŭh piduwŭh saba anŭ Saul nang di David, “Kuu re jadi iban ku.”

²² Ayŭh mritah pinurung pinurung-i da minyu darŭm bisukan ngga David, nang, “Raja munos asŭng-i di kuu ka sopŭrŭg pinurung-i rindu kuu; ati inŭh tika adi kana ngga mu sawŭn anak dayung-i.”

²³ Jadi ngara kidaan di David, ka-i nam, “Jadi iban raja inŭh kayuh adi raru bās, raru bās-i yŭn daya adi mun nŭŭh ati adi sirata ka dŭh biguna.”

²⁴ Bara pinurung anŭ kidaan di Saul kayuh adi David mbŭh nang,

²⁵ ka Saul mritah ngara da kidaan di David: “Kayuh adi raja raan ndu upah sawŭn anak-i inŭh kurit-tŭbŭn buat siratus naan daya Philistine adi mbŭh dog siŭ, adi ngga maras dendam di pinganyu-i.” (Simŭnŭ inŭh pusar Saul, aran ngga-i bada David dog siŭ daya Philistine.)

²⁶ Pinurung pinurung anŭ kidaan di David kayuh adi Saul nang, ka David mbŭh raru gaŭn amai re jadi iban raja. Diŭ so andu pinyisawan ngara,

²⁷ David ngga bara daya-i matak ka siŭ duwŭh ratus naan daya Philistine. Ayŭh taban kurit-tŭbŭn buat ngara ka yŭn raja ka mirang sopŭrŭg-i di sirung jawin raja, ngga-i bisa jadi iban-i. Jadi Saul bada anak dayung-i banan ngga David.

²⁸ Saul puan nang TUHAN agi ngga David ka anak dayung-i awang David.

²⁹ Jadi ayŭh jadi rabis taru di David ka mbŭh jadi pinganyu-i sitŭkŭd-i udip.

³⁰ Bara soldadu daya Philistine ari mandŭg di biperang, pak tiap kari ngara biperang David siraru dŭ manang so pingubak pingubak soldadu Saul adi bŭkŭn. Sabab anŭ meh David jadi timagah.