1 SAMUEL 16 - Hakcipta - Biatah Bidayuh

David Dog Nginyo Jadi Raja

¹ TUHAN nang di Samuel, “Ndŭg sinde kuu re susah pasar Saul? Aku mbŭh tirawan ayŭh jadi raja Israel. Madin di tambit inyo kanā ka di ka Bethlehem, ka yŭn ndi naan daya dŭn Jesse, sabab aku mbŭh mien ndi naan so anak anak dari-i bada jadi raja.”

² “Simuki aku re ndai simŭnŭ?” Samuel siken. “Kambŭi Saul puan, tatu ayŭh re siŭ aku!” TUHAN nam, “Taban anak sapi ka kidaan nang kuu agi diginŭ amai an jugan sadis ka TUHAN.

³ Bagan Jesse bada sua ka yŭn jugan sadis anŭ, ka Aku re kidaan di kuu kayuh adi re mu ndai. Kuu re nginyo bada jadi raja daya adi aku kidaan di kuu.”

⁴ Samuel ndai nanyam adi TUHAN mbŭh kidaan di ayŭh, ka di ka Bethlehem di yŭn bara pinguru kupo bidapŭd ngga ayŭh. Buang kimŭtŭr taru ngara siken, “Taban damai kah pimandŭg mai ati, sitingga?”

⁵ Samuel nam, “Taban damai. Aku mandŭg di jugan sadis ka TUHAN. Pibisig adŭp ngan ka sua ngga aku.” Ayŭh kidaan gŭh bada Jesse ngga bara anak dari-i pibisig adŭp ngara. Ka-i bagan ngara bada sua di ka yŭn jugan sadis.

⁶ Kan ngara mbŭh ndŭg, Samuel kiris anak dari Jesse adi dŭn Eliab ka nang darŭm asŭng-i, “Dari ati adi mijog digiti di sirung jawin TUHAN inŭh tatu adi TUHAN mbŭh mien.”

⁷ Pak TUHAN nang di Samuel, “Dŭhnyah piduri ayŭh bigatung bait ramus. Aku dŭh raan ayŭh, amai Aku dŭh mien mun manusia mien. Manusia tingga sapa pŭrŭng ganan, pak Aku tingga darŭm atin daya.”

⁸ Komŭnŭ, Jesse bagan anak-i Abinadab ka taban ayŭh ka yŭn Samuel. Pak Samuel nang, “Dŭh. Ayŭh dŭh gŭh TUHAN mien.”

⁹ Komŭnŭ Jesse taban anak-i Shammah, ka Samuel nang, “Ayŭh dŭh gŭh TUHAN mien.”

¹⁰ Simŭnŭ inŭh Jesse mbŭh taban ju madis anak dari-i ka yŭn Samuel. Ka Samuel nang di ayŭh, “Dŭh, mating katŭn so ngara ati adi TUHAN mien.”

¹¹ Komŭnŭ Samuel siken di ayŭh, “Agi kah anak dari mu adi bŭkŭn?” Jesse nam, “Dŭm adi sibusu, pak ayŭh aŭn kingat biri.” Samuel nang, “Bada ayŭh mandŭg kamati. Ata gi-dŭh re jugan sadis kambŭi ayŭh gibayuh mandŭg.”

¹² Jadi Jesse bagan ayŭh. Ayŭh bujang dari adi ramus buang tiranah, ka batŭh-i ramus. TUHAN nang di Samuel, “Yŭh inŭh siati - nginyo ayŭh!”

¹³ Samuel tambit inyo kanā ka nginyo David di sirung jawin bara jurud dari-i. Rasu roh TUHAN nguasa David so andu anŭ. Komŭnŭ Samuel pari ka Ramah.

David di Darŭm Istana Saul

¹⁴ Roh TUHAN bu so Saul, ka roh arap adi dog pait TUHAN mito ayŭh.

¹⁵ Bara daya gaji-i nang di ayŭh, “Kieh puan nang roh arap adi mbŭh dog pait Tapa agi mandŭg mito kaam.

¹⁶ Kidaan di kieh, tuan, isa-i kieh di jiroh daya adi pandai main kachapi. Ka kan roh arap anŭ mŭrŭt kaam, daya anŭ bisa main kachapi-i, ka kaam bisa jadi sanang dinge.”

¹⁷ Saul nang di ngara, “Panu garang di jiroh daya adi pandai ka taban ayŭh ka yŭn ku.”

¹⁸ Ndi naan so daya gaji-i nang, “Jesse, so kupo Bethlehem adi biyŭn ndi anak dari adi pandai main musik. Ayŭh inŭh dari adi ramus buang pagan, soldadu adi kana, buang-i siradik gŭh minyu. TUHAN agi ngga ayŭh.”

¹⁹ Sawŭ meh Saul pait pinyisung ka yŭn Jesse, bada nang, “Pait ka yŭn ku anak mu David, sianŭ adi kingat biri.”

²⁰ Jesse pait David bada di ka yŭn Saul taban ndi kambing adi gi-mara, ndi kaldi kabis ruti ngga ndi bŭrŭh-kurit adi puno ngga wain.

²¹ David mandŭg ka yŭn Saul ka rasu nyiraja yŭn-i. Saul raru rindu ayŭh ka mien ayŭh bada jadi tukang taban sinyata-i.

²² Komŭnŭ, Saul pait pinganang ka Jesse: “Aku rindu David. Bada ayŭh rŭŭ digiti ka nyiraja yŭn ku.”

²³ So nganŭ meh, kan roh arap adi mbŭh dog pait Tapa mandŭg di mito Saul, David tambit kachapi-i, ka main-i ngga piramŭn Saul, ka roh arap bu, ka Saul rasu dapŭd sanang dinge.