1 SAMUEL 15 - Hakcipta - Biatah Bidayuh

Biperang Rawan Daya Amalek

¹ Samuel nang di Saul, “Aku inŭh adi TUHAN pait bada nginyo kuu jadi raja daya-I Israel. Madin dingah kayuh adi TUHAN Bisa-pŭrŭg nang.

² Ayŭh re ngukum daya Amalek amai tayung-babuk ngara nyerang daya Israel di tika ngara ruah so Egypt.

³ Panu di nyerang daya Amalek ka pirusak sopŭrŭg kayuh adi ngara biyŭn. Dŭhnyah kidŭm ani ani; siŭ sopŭrŭg dari, dayung, anak-anya, anak pira, sapi, biri, onta, ka kaldi ngara.”

⁴ Saul bagan bada tikuruk bara soldadu-i ka pirasa ngara di Telem: agi 200,000 naan soldadu so Israel ka 10,000 naan so Judah.

⁵ Komŭnŭ ayŭh ngga bara daya-i di ka kupo daya Amalek ka tuman di sungi adi mbŭh badŭh.

⁶ Ayŭh pait pinganang pinyibakan ka daya Ken, daya adi kana tayung babuk-i ngga daya Israel di tika ngara ruah so Egypt: “Panu ka tingge daya Amalek, isa angān dŭh dog siŭ samah ngga ngara.” Jadi daya Ken bu.

⁷ Saul ngarah daya Amalek, bisaad ndi aran aran so Havilah ndŭg Shur, tura ka timor Egypt;

⁸ ayŭh nakap Raja Agag, raja daya Amalek ka siŭ sopŭrŭg daya Amalek.

⁹ Pak Saul ngga daya-i dŭh siŭ Agag, ka dŭh siŭ biri ngga sapi adi gamu, ngga anak sapi ngga anak biri adi gamu, puan kah tadŭ kayuh adi kana; ngara pirabur adi dŭh biguna ngga adi dŭh brega.

Saul Dog Tirawan jadi Raja

¹⁰ TUHAN nang di Samuel,

¹¹ “Aku nyesar aku bada Saul jadi raja; ayŭh nyipunok aku ka mbŭh nyibireu pesan ku.” Samuel baji ka ndi ngarŭm ngarŭm ayŭh bidua ka TUHAN.

¹² Awar isan isan andu jawa ndi ayŭh di jiroh Saul. Ayŭh dingah Saul mbŭh di ka kupo Carmel, di yŭn-i muko pijog batuh-pingingat yŭn adŭp-i, ka komŭnŭ mbŭh di ka Gilgal.

¹³ Samuel di ka Saul, adi tabi ayŭh, nang, “TUHAN agi ngga kaam, Samuel! Aku mbŭh tunda pesan TUHAN.”

¹⁴ Samuel siken, “Mani meh, aku dingah sapi pira-muu adŭp-i ka biri pira-m|e adŭp-i?”

¹⁵ Saul nam, “Daya ku tambit-i so daya Amalek. Ngara mbŭh tambit biri ngga sapi adi gamu yŭn re jugan ndu sadis ka TUHAN adi Tapa mai, ka adi bŭkŭn kieh mbŭh kubo pirabur.”

¹⁶ “Kajŭn dawŭ,” Samuel nang, “aku re kidaan di kuu kayuh adi TUHAN kidaan di aku singumi.” “Kidaan di aku,” Saul nang.

¹⁷ Samuel nam, “Sunggu kuu nyirundeng adŭp mu dŭh biguna, kuu inŭh pinguru tibaran tibaran-asar Israel. TUHAN nginyo kuu jadi raja Israel,

¹⁸ ka Ayŭh mritah kuu bada di pirabur daya Amalek adi ginaka anŭ. Ayŭh bada kuu biperang ngga ngara ndŭg ka kuu mbŭh siŭ sopŭrŭg ngara.

¹⁹ Mani meh, kuu dŭh tunda pinganang-I? Mani kuu bigaut di sirapas rata ngara, ka ndai kayuh adi dŭh pimunos asŭng TUHAN?”

²⁰ “Aku agi tunda pinganang TUHAN,” Saul nam. “Aku matak nimun adi muko-I kidaan di aku, taban Raja Agag ngga pari, ka siŭ sopŭrŭg daya Amalek.

²¹ Pak daya ku dŭh siŭ sopŭrŭg dāng kudip; ngara mbŭh mien biri ngga sapi adi gamu ka taban-i ka Gilgal an ngara jugan ndu sadis ka TUHAN adi Tapa mai.”

²² Samuel nang, “Aki ndi TUHAN raan: nurut pinganang TUHAN kah pinganggen ngga sadis? Kana dŭ nurut pinganang-I so nŭŭh jugan biri adi gamu ka Ayŭh.

²³ Rawan Ayŭh inŭh brinyam arap-i ngga pingandai siher; ka pinyigambung inŭh dosa, brinyam ngga nyambah tibudo. Sabab kuu tirawan pesan TUHAN, Ayŭh mbŭh tirawan kuu jadi raja.”

²⁴ “Sawŭ, aku mbŭh bidosa,” Saul nam. “Aku mbŭh nyibireu pesan TUHAN samŭn atur adat-I. Aku taru daya ku ka mbŭh ndai kayuh adi ngara raan.

²⁵ Pak madin aku mite, apun dosa ku ka pari ngga aku, isa aku dapŭd nyambah TUHAN.”

²⁶ “Aku dŭh re pari ngga kuu,” Samuel nam. “Kuu tirawan pesan TUHAN, ka Ayŭh mbŭh tirawan kuu jadi raja Israel.”

²⁷ Komŭnŭ Samuel bigiring ka bu, pak Saul nakap jipo-i, ka-i tiratak.

²⁸ Samuel nang di ayŭh, “TUHAN mbŭh nyiratak pritah Israel so kuu andu ati ka nggen-i di daya bŭkŭn adi rabis kana so kuu.

²⁹ Tapa bās Israel dŭh kadong bait ka nukar pikir-I. Ayŭh dŭh manusia — Ayŭh dŭh nukar pikir-I.”

³⁰ “Aku mbŭh bidosa,” Saul nam. “Pak piji ka kiren stabi di aku di sirung jawin bara pinguru daya ku ka di sirung jawin sopŭrŭg Israel. Pari ngga aku isa aku dapŭd nyambah TUHAN adi Tapa mai.”

³¹ Jadi Samuel pari ngga ayŭh, ka Saul nyambah TUHAN.

³² “Taban Agag ka yŭn ku,” nang Samuel. Agag mandŭg, kimŭtŭr taru, nang darŭm asŭng-i, “Raru pa'it kayuh dŭn kabŭs!”

³³ Samuel nang, “Nimun pedang mu mbŭh bada bagŭ sindŭ daya dŭh biyŭn anak, simŭnŭ inŭh sindŭ mu madin re dŭh biyŭn anak.” Ka ayŭh japa Agag bada prisupek di jawin mija-sambah di Gilgal.

³⁴ Komŭnŭ Samuel di ka Ramah, ka Raja Saul mari ka ramin adŭp-i di Gilgal.

³⁵ Sitŭkŭd Samuel udip, ayŭh bŭn tia kiris Saul; ayŭh susah amai TUHAN nyesar ko bada Saul jadi raja Israel.