1 SAMUEL 14 - Hakcipta - Biatah Bidayuh

Pinyipagan Jonathan

¹ Ndi andu Jonathan nang di bujang dari adi tukang taban sinyata-i, “Ja ata di ka bari daya Philistine.” Pak Jonathan dŭh nggen puan di sama-i Saul,

² adi bibari di ribo tŭngŭn delima di Migron, dŭh jo so Gibeah; agi nŭm ratus naan daya ayō ayŭh.

³ (Imam adi taban efod inŭh Ahijah, anak Ahitub adi jurud Ichabod, adi anak Phinehas ka sukuh Eli, adi imam TUHAN di Shiloh.) Daya dŭh puan Jonathan mbŭh bu so nŭ.

⁴ Di ateng Michmash, adi Jonathan re mutas siŭn-i dapŭd ndŭg bari daya Philistine, diginŭ agi duwŭh tibande batuh adi rasing, ndi mijog di so-duwŭh parad ateng anŭ: ndi dog kadŭn Bozez ka anŭ ndi Seneh.

⁵ Ndi tura ka utara ateng anŭ, nura Michmash, ka anŭ ndi tura ka siratan, nura Geba.

⁶ Jonathan nang di bujang dari anŭ, “Ja ata di ka bari daya Philistine, daya adi dŭh puan Tapa. Kadŭ TUHAN re turung ata; kambŭi Ayŭh turung, Ayŭh re nggen di ata pimanang, nisŭ bait kani bara ta.”

⁷ Bujang dari anŭ nam, “Sŭn adŭp mai nang, aku agi ngga kaam.”

⁸ “Ja garang,” Jonathan nam. “Ata di mutas ka bada daya Philistine kiris ata.

⁹ Kambŭi ngara bada ata kajŭn ngara mandŭg ka yŭn ta, ata bisa dŭhsah mutas.

¹⁰ Pak kambŭi ngara bada ata tudu ngara, ata di, sabab anŭ tandā TUHAN mbŭh nggen di ata pimanang ngarah ngara.”

¹¹ Jadi ngara bada daya Philistine kiris ngara, ka daya Philistine nang, “Tingga! Kada daya Hebrew mandŭg so rubang adi yŭn ngara bisukan!”

¹² Komŭnŭ ngara nyirais nang di Jonathan ngga bujang dari anŭ, “Mandŭg kamati! Agi kayuh raan ami kidaan di angān!” Jonathan nang di bujang dari anŭ, “Tunda aku. TUHAN mbŭh nggen di Israel pimanang ngarah ngara.”

¹³ Jonathan sigawang maad ateng anŭ, ka bujang dari anŭ tunda ayŭh. Jonathan nyerang daya daya Philistine anŭ ka ngara tumbang dog pukong-i, ka bujang dari anŭ siŭ ngara.

¹⁴ Di sibungas bisaad anŭ Jonathan ngga bujang dari anŭ siŭ kurang rabis duwŭh puru naan daya di tarun yŭn adi kurang rabis sitangah hektar bayah-i.

¹⁵ Sopŭrŭg daya Philistine di sapa rais mbŭh taru; bara adi tukang mirupak ngga bara soldadu di tarun yŭn bibari mbŭh kimŭtŭr taru; tana bigugoh, ka sopŭrŭg mbŭh kandang-kandŭ.

Daya Philistine dog Ngarah

¹⁶ Daya Saul adi bijaga di Gibeah di tarun tana Benjamin kiris bara daya Philistine mbŭh kandang-kandŭ bikaduh.

¹⁷ Jadi Saul nang di daya-i, “Mirang bara soldadu yŭn tingga asi adi mating.” Ngara mirang ka puan Jonathan ngga bujang dari adi tukang taban sinyata-i mating diginŭ.

¹⁸ “Taban efod kamati,” Saul nang di imam Ahijah. (Di andu anŭ imam Ahijah taban-i di jawin daya Israel.)

¹⁹ Sitadŭn Saul minyu di imam anŭ, daya Philistine mbŭh makin rabis kandang-kandŭ, ka Saul nang di ayŭh, “Mbŭh dŭh ata sipŭt bisiken ngga TUHAN!”

²⁰ Komŭnŭ ayŭh ngga bara daya-i masang ka yŭn bisaad anŭ. Diginŭ ngara kiris daya Philistine mbŭh bana kandang-kandŭ ka mbŭh bisaad dupan adŭp-i.

²¹ Kada daya Hebrew, adi rŭŭ bigaur ngga daya Philistine ka mbŭh sua matak biperang ayō ngara, pari mŭrŭt tibaran Saul ngga Jonathan.

²² Daya daya Israel adi bisukan di arong sandah Ephraim, dingah daya Philistine mbŭh bu, ka ngara sua gŭh nyerang daya Philistine,

²³ bisaad ndi aran aran jeh ndŭg Bethaven. TUHAN nyiramat Israel di andu anŭ.

Kayuh adi Jadi Ripas Biperang

²⁴ Daya Israel ramah amai sibŭrŭk andu anŭ, sabab Saul, ngga payu, ko mritah: “Pangu re nyatŭk daya adi man andu ati, sibayuh aku maras pinganyu ku.” Ndi andu andu anŭ mating daya man ani ani.

²⁵ Sopŭrŭg ngara mandŭg ka tarun yŭn adi bagŭ tŭngŭn kayuh dieh ka dapŭd ju banyis di barang yŭn.

²⁶ Di tarun yŭn anŭ bagŭ ju banyis, pak mating daya man-i amai taru pangu Saul.

²⁷ Pak Jonathan mating dingah sama-i pirawan daya bagŭ ngga pangu; ngapŭi ayŭh pakai sikud adi taban-i, tabŭk mara banyis anŭ ka ngga sikud anŭ ayŭh tambit ka man-i. Ayŭh rasu kinyam yang-i raru ranyah buang bitambah bake.

²⁸ Pak ndi naan so bara daya-i nang, “Sopŭrŭg kieh ramah amai sibŭrŭk, pak sama mu pirawan kieh, ‘Pangu re nyatŭk daya adi man tadŭ tadŭ kayuh andu ati.’ ”

²⁹ Jonathan nam, “Mbŭh raru sipŭ inŭh kayuh adi sama ku ndai di bara daya ta! Tingga munki masam ranyah-i aku amai aku muko man ju banyis!

³⁰ Munki masam kana-i kambŭi di andu ati daya ta man pinguman adi ngara taban kan ngara ngarah pinganyu. Suba kira munki masam bagŭ-i daya Philistine ngara dapŭd siŭ!”

³¹ Di andu anŭ daya Israel ngarah daya Philistine, bisaad ndi aran aran so Michmash ndŭg Aijalon. Nganŭ meh daya Israel mbŭh raru ramah amai sibŭrŭk,

³² jadi ngara bigaut ka yŭn kayuh adi ngara muko sirapas so pinganyu, tambit biri ka sapi, simareh diginŭ gŭh ka man dagin anŭ gibabŭ bideya.

³³ Saul dog kidaan, “Tingga, bara daya mbŭh bidosa rawan TUHAN. Ngara man dagin adi gibabŭ agi deya dieh.” “Angān dŭh tŭtŭd di TUHAN!” Saul nang ngga sirŭŭn bana. “Biraring tibande batuh kamati ka yŭn ku.”

³⁴ Komŭnŭ ayŭh nang, “Di ka yŭn bara daya ka kidaan di ngara bada taban sapi ngga biri ngara kamati; Ngara dŭh siŭn dŭh simareh-i ka man-i digiti. Ngara dŭh siŭn bidosa rawan TUHAN, anŭ inŭh man dagin adi gibabŭ agi deya dieh.” Jadi ngarŭm anŭ sopŭrŭg ngara taban dāng adi ngara ko sirapas ka simareh-i diginŭ.

³⁵ Saul pijog ndi mija-sambah yŭn TUHAN, adi sibungas-i pijog.

³⁶ Saul nang di bara daya-i, “Ja di mūn ka nyerang daya Philistine singarŭm, mirupak ngara ndŭg isan isan, ka siŭ sopŭrŭg ngara.” “Ndai anŭ adi kaam pikir kana ka patut,” ngara nam. Pak imam nam, “Ja ata di bisiken ngga TUHAN diŭ.”

³⁷ Jadi Saul siken Tapa, “Bisa aku nyerang daya Philistine? Re Mai nggen kah di kieh pimanang?” Pak Tapa dŭh nam di andu anŭ.

³⁸ Komŭnŭ Saul nang di bara pinguru daya-i, “Mandŭg kamati ka jiroh ani dosa adi ko dog ndai andu ati.

³⁹ Aku bijanji ngga adŭn TUHAN adi udip, adi nggen pimanang di Israel, sianŭ adi sarah re dog nggen ukum kabŭs, sunggu bait kani ayŭh anak ku Jonathan.” Pak mating daya nang ani ani.

⁴⁰ Komŭnŭ Saul nang di ngara, “Sopŭrŭg ngan mijog diginŭ, ka Jonathan ngga aku mijog digiti.” “Ndai adŭ nanyam pinyiraan mai,” ngara nam.

⁴¹ Saul nang di TUHAN, adi Tapa Israel, “TUHAN, mani Kaam dŭh nam aku andu ati? TUHAN, Tapa Israel, nam aku ngga adŭn batuh kudus. Kambŭi Jonathan puan kah aku adi sarah, nam ngga batuh Urim; pak kambŭi daya Mai Israel adi sarah, nam ngga batuh Thummim.” Pinyinam TUHAN kiren Jonathan ngga Saul adi sarah, ka daya Israel dŭh sarah.

⁴² Komŭnŭ Saul nang, “Asi so anak ku Jonathan ngga aku adi sarah.” Ka pinyinam kiren Jonathan adi sarah.

⁴³ Komŭnŭ Saul siken Jonathan, “Ani anŭ mbŭh mu ndai?” Jonathan nam, “Aku agi kija nisit ju banyis ngga sikud adi digŭng ku ati. Aku mbŭh sidia an kabŭs.”

⁴⁴ Saul nang di ayŭh, “Isa-i Tapa ngukum aku kambŭi kuu dŭh dog nggen ukum kabŭs!”

⁴⁵ Pak bara daya nang di Saul, “Patut kah Jonathan dog nggen ukum kabŭs? Dŭh ka ayŭh adi bada Israel dapŭd pimanang bās ati? Kieh bipayu ngga adŭn TUHAN ndi sirah ubok-i dŭh gŭh re tikadi so ubak-i. Kayuh adi-i ndai andu ati inŭh so pinurung Tapa.” Jadi bara daya nyiramat Jonathan so ukum kabŭs.

⁴⁶ Ripas anŭ, Saul dŭh tia tadak daya Philistine, ka ngara pari ka tarun tana adŭp ngara.

Pinyipritah Saul ngga Rawang-I

⁴⁷ Kan Saul jadi raja Israel, ayŭh biperang ngga sopŭrŭg pinganyu-i di barang yŭn: daya Moab, daya Ammon, ka daya Edom, raja raja so Zobah, ka daya Philistine. Kan ayŭh biperang ayŭh manang.

⁴⁸ Ayŭh biperang ngga birani ka ngarah daya Amalek ani. Ayŭh nyiramat daya Israel so sopŭrŭg serang.

⁴⁹ Anak Saul inŭh Jonathan, Ishvi, ngga Malchishua. Anak pinuai dayung-i Merab, ka sianŭ adi mara Michal.

⁵⁰ Sawŭn-i Ahinoam, anak Ahimaaz; pingibās soldadu-i inŭh Abner adi bitungar-i, adi anak sude sama-i Ner.

⁵¹ Kish adi sama Saul ngga Ner adi sama Abner inŭh anak Abiel.

⁵² Sitŭkŭd ayŭh udip, Saul bandar bandar biperang ngga daya Philistine. Ngapŭi kan ayŭh dapŭd daya adi bake buang birani, ayŭh tambit daya anŭ bada sua ngga bara soldadu-i.