1 SAMUEL 13 - Hakcipta - Biatah Bidayuh

Biperang Rawan Daya Philistine

² Saul mien 3,000 naan daya Israel, 2,000 naan so ngara rŭŭ ngga ayŭh di Michmash samŭn di rais tarun tana sandah Bethel. Ayŭh pait 1,000 naan ayō anak-i Jonathan ka Gibeah, di tarun tana tibaran-asar Benjamin. Adi bŭkŭn Saul bada mari.

³ Jonathan siŭ pingibās soldadu daya Philistine di Geba, ka sopŭrŭg daya Philistine mbŭh dingah kayuh adi mbŭh jadi. Komŭnŭ Saul pait pinyisung bada mambak trompet di ndi tarun tarun tana rais ngga bagan bara daya Hebrew bada matak biperang.

⁴ Sopŭrŭg daya Israel dog kidaan nang Saul agi siŭ pingibās soldadu daya Philistine ka daya Philistine mbŭh tiru di ngara. Jadi bara daya makat ka sua ngga Saul di Gilgal.

⁵ Daya Philistine tikuruk re rawan daya Israel; ngara biyŭn 30,000 krita kuda perang, 6,000 soldadu pinunggang kuda, ka dudu soldadu kiang sirah sumat di pang rawŭt. Ngara matak ka Michmash, tura ka timor Bethaven, ka bibari diginŭ.

⁶ Komŭnŭ ngara nyerang daya Israel, serang bās adi bada daya Israel dŭh bigaya. Kada daya Israel bisukan di tang ka di rubang batuh di darŭd, di arong batuh, di rubang ka darŭm prigi;

⁷ adi bŭkŭn mutas Yang Jordan di ka tarun tana Gad ngga Gilead. Saul babŭ di Gilgal, ka daya adi agi ngga ayŭh mbŭh kimŭtŭr taru.

⁸ Ayŭh kajŭn Samuel ju andu, nanyam ka pingatur Samuel ngga ayŭh, pak Samuel babŭ gŭh dŭh mandŭg ka Gilgal. Daya mbŭh piguru tagan Saul,

⁹ ka ayŭh nang di ngara, “Taban ka yŭn ku sadis badang ngga sadis bidingan.” Ayŭh jugan sadis badang,

¹⁰ ka kan-i mbŭh re kamas, Samuel mandŭg. Saul di tudu ayŭh ka kambat ayŭh,

¹¹ pak Samuel nang, “Ani anŭ ndai mu?” Saul nam, “Bara daya mbŭh bu tangan aku, ka kaam mating gŭh mandŭg di tika kaam nang adŭp mai re mandŭg; ka nambah anŭ, daya Philistine mbŭh tikuruk di Michmash.

¹² Jadi aku pikir, ‘Daya Philistine re nyerang aku digiti di Gilgal, ka aku mating jugan sadis ngga mite turung so TUHAN.’ Ngapŭi aku takan adŭp ku jugan sadis ati.”

¹³ “Anŭ mbŭh kraja budo,” Samuel nam. “Kuu dŭh tunda pesan TUHAN adi Tapa mu mbŭh nggen di kuu. Kambŭi kuu tunda, tatu Ayŭh mbŭh bada kuu ngga bara sesang mu mritah Israel adu adu.

¹⁴ Pak madin pinyipritah mu dŭh re tan tui. Sabab kuu tirawan Ayŭh, TUHAN re jiroh ndi naan daya adi-I raan ka bada ayŭh jadi pimritah daya-I.”

¹⁵ Samuel bu so Gilgal di pijuu pimanu-i. Bara adi bŭkŭn tunda Saul sua ngga bara soldadu-i. Ngara matak so Gilgal di ka Gibeah di tarun tana Benjamin. Saul pirasa bara soldadu-i; agi 600 naan sopŭrŭg-i.

¹⁶ Saul, anak-i Jonathan, ngga bara-i bibari di Geba di tarun tana Benjamin; daya Philistine bibari di Michmash.

¹⁷ Soldadu daya Philistine matak di mirupak so tarun yŭn ngara bibari ngga taruh tibaran: ndi tibaran matak nuju Ophrah di tarun tana Shual,

¹⁸ anŭ ndi matak nuju Beth Horon, ka adi ndi matak nuju baat adi nura Rubān Zeboim ngga tarun tana-pajam.

¹⁹ Di jaman anŭ mating tukang basi di Israel sabab daya Philistine dŭh nyibandar daya Hebrew ndai pedang ka jarok.

²⁰ (Siraru-i daya Israel di ka daya Philistine kambŭi ngara an ngasa sinda bajak, sakor, kapak, ka gayang;

²¹ ndi anak kiping duit yŭn upah ngasa kapak ka yŭn upah ndai basi adi ngga nguru sapi, ka duwŭh kiping yŭn upah ngasa sinda bajak puan kah sakor.)

²² Ka di andu biperang, bara soldadu Israel dŭh biyŭn pedang puan kah jarok, kaŭs-i adŭp Saul ngga anak-i Jonathan adŭ biyŭn.

²³ Daya Philistine pait ndi tibaran soldadu bada jaga ateng Michmash.