1 SAMUEL 11 - Hakcipta - Biatah Bidayuh

Saul Ngarah Daya Ammon

¹ Atur ndi buran ripas anŭ Raja Nahash so Ammon nguru bara soldadu-i nyerang kupo Jabesh di tarun tana Gilead ka nyikapung-i. Bara daya Jabesh nang di Nahash, “Ndai pekat-damai ngga kieh, ka kieh bisa trima kaam jadi pimritah ami.”

² Nahash nam, “Aku bisa ndai pekat-damai ngga angān adŭ-i kambŭi aku tuket ruwang batŭh tauh barang naan daya ngga pimangŭh sopŭrŭg Israel.”

³ Bara pinguru Jabesh nang, “Nggen di kieh ju andu ngga ami pait pinyisung di ndi tarun tana Israel. Kambŭi mating daya turung kieh, kieh re nyerah adŭp ami ka kaam.”

⁴ Bara pinyisung mandŭg ka Gibeah, di yŭn Saul rŭŭ, ka kan ngara kidaan agah anŭ, bara daya rasu sien ka muās.

⁵ Saul bauh mandŭg so ŭmŭh taban dari sapi-i, ka siken, “Ani har? Mani sopŭrŭg daya sien?” Ngara kidaan di ayŭh kayuh adi bara pinyisung so Jabesh mbŭh kidaan.

⁶ Kan Saul dingah kayuh anŭ, roh Tapa nguasa ayŭh, ka ayŭh mbŭh raru bangok.

⁷ Ayŭh tambit duwŭh dari sapi, natad-i, ka pait bara pinyisung da taban dudu tatad anŭ ka ndi tarun tana Israel ngga pinyibakan sakati: “Asi asi adi dŭh tunda Saul ngga Samuel matak biperang re dog ndai simuti dari sapi-i!” Daya Israel taru kayuh adi TUHAN re ndai, ka sopŭrŭg ngara, dŭh kira ani ani, mandŭg di tikuruk.

⁸ Saul bada ngara tikuruk di Bezek: 300,000 so Israel ka 30,000 so Judah.

⁹ Ngara nang di bara pinyisung so Jabesh, “Kidaan di daya ngan diŭ so kumbeng sipagi ngara re dog nyiramat.” Kan daya Jabesh kambat pinganang anŭ, ngara mbŭh raru gaŭn

¹⁰ ka nang di Nahash, “Sipagi kieh re nyerah adŭp ami ka kaam, ka kaam bisa ndai barang ka mun kaam raan ngga kieh.”

¹¹ Ngarŭm anŭ Saul kutung daya-i da jadi taruh tibaran, ka ngga siri jawa ngara rasu di ka tarun yŭn daya Ammon bibari ka nyerang ngara. Ngga arong kumbeng ngara siŭ ngara. Adi babŭ udip mingare di barang yŭn, barang naan bu sadi adŭp-i.

¹² Komŭnŭ daya Israel nang di Samuel, “Diki ngara adi nang Saul dŭh siŭn jadi raja ta? Nyerah ngara ka kieh isa kieh siŭ ngara!”

¹³ Pak Saul nang, “Mating daya siŭn dog siŭ andu ati, amai andu ati TUHAN nyiramat daya Israel.”

¹⁴ Ka Samuel nang di ngara, “Ja sopŭrŭg ta di ka Gilgal ka natu Saul ati raja ta.”

¹⁵ Jadi sopŭrŭg ngara di ka Gilgal, ka diginŭ di yŭn kudus ngara natu Saul raja ngara. Ngara jugan sadis bidingan, ka Saul ngga sopŭrŭg daya Israel bigawai man siramat yŭn pingandai ngara andu anŭ.