1 SAMUEL 10 - Hakcipta - Biatah Bidayuh

¹ Samuel tambit ndi anak gabuk adi brisi ngga inyo kanā, ka ren inyo anŭ di tunduh ubak Saul, sium ayŭh, ka nang, “TUHAN nginyo kuu bada jadi raja daya-I Israel. Kuu re mritah daya-I ka grindung ngara so sopŭrŭg pinganyu ngara. Ka ati inŭh tandā di kuu nang TUHAN mbŭh mien kuu bada jadi raja daya-I:

² kan kuu mbŭh tingge aku andu ati, kuu re bidapŭd ngga duwŭh naan daya sindŭk kubur Rachel di Zelzah di tarun tana Benjamin. Ngara re kidaan di kuu nang kaldi kaldi adi jiroh mu mbŭh dog dapŭd, ka sama mu dŭh tia gapang pasar-i pak gapang pasar kuu; ka ayŭh mbŭh pari pari siken, ‘Ani re ku ndai ngga aku bisa dapŭd anak ku?’

³ Kuu re pijuu panu so nŭ ndŭg ka kuu mandŭg di ndi tŭngŭn kayuh pirapu' di Tabor, di yŭn mu re dapŭd taruh naan daya aŭn panu di aran re di jugan sadis ka Tapa di Bethel. Ndi naan so ngara re taban taruh anak kambing, ka sianŭ ndi re taban taruh baru ruti, ka adi ndi dinge re taban bŭrŭh-kurit brisi ngga wain.

⁴ Ngara re tabi kuu ka nggen di kuu duwŭh baru ruti, adi kuu dŭh siŭn dŭh trima.

⁵ Komŭnŭ kuu re di ka Sandah Tapa di Gibeah; diginŭ agi bari daya Philistine. Di tiban mŭrŭt kupo kuu re bidapŭd ngga ndi tibaran nabi mūn so mija-sambah di tibung sandah, mambak kachapi, gendang, tirari ngga gambus. Ngara re birajang buang nyirais.

⁶ Ka gŭgŭh roh TUHAN re nguasa kuu, ka kuu re sua birajang ka nyirais ka re birubah, dŭh mun adŭp mu adi mbŭh.

⁷ Kan kayuh anŭ jadi, ndai tadŭ tadŭ kayuh adi Tapa bada kuu ndai.

⁸ Kuu re di ka Gilgal diŭ so aku. Diginŭ aku re bidapŭd ngga kuu ka jugan sadis badang ngga sadis bidingan. Kajŭn diginŭ ju andu ndŭg ka aku mandŭg ka kidaan di kuu kayuh adi kuu patut ndai.”

⁹ Kan Saul mbŭh re panu tingge Samuel, Tapa nggen di Saul tibiat adi bauh. Ka barang masam kayuh adi Samuel muko kidaan di ayŭh jadi bitŭtŭk di andu anŭ.

¹⁰ Kan Saul ngga daya gaji-i mandŭg di Gibeah, ndi tibaran nabi bidapŭd ngga ayŭh. Gŭgŭh meh roh Tapa nguasa ayŭh, ka ayŭh sua birajang ka nyirais ngga ngara.

¹¹ Kan daya adi taŭn puan ayŭh so dawŭ-i, kiris ayŭh sua ndai simŭnŭ, ngara bisiken dupan adŭp-i, “Ani mbŭh jadi di anak Kish? Ayŭh mbŭh jadi nabi kah?”

¹² Ndi naan daya adi rŭŭ di arong anŭ siken, “Bara nabi adi bŭkŭn anŭ — sŭn ngan nang, asi sama ngara?” Simŭnŭ inŭh meh ruru pinganang anŭ timbur, “Ndŭg ka Saul mbŭh jadi nabi gŭh kah?”

¹³ Kan Saul muko birajang ka nyirais, ayŭh di ka mija-sambah di tibung sandah.

¹⁴ Tua Saul kiris ayŭh ngga daya gaji-i, ka siken, “So ki angān?” “Jiroh kaldi kaldi adi manyap,” Saul nam. “Kan kieh dŭh tungang dapŭd, kieh di ka yŭn Samuel.”

¹⁵ “Ani nang-i di angān meh?” Tua Saul siken.

¹⁶ “Ayŭh kidaan di kieh nang dāng dāng anŭ mbŭh dog dapŭd.” Saul nam — pak ayŭh dŭh kidaan di tua-i kayuh adi Samuel muko kidaan pasar adŭp-i re jadi raja.

Saul dog Mien Jadi Raja

¹⁷ Samuel bagan daya bagŭ bada tikuruk di sirung jawin TUHAN di Mizpah,

¹⁸ ka nang di ngara, “TUHAN adi Tapa Israel, nang, ‘Aku mbŭh taban angān ruah so Egypt ka pirupas angān so bangsa Egypt ngga sopŭrŭg daya bangsa bŭkŭn adi kinanyuh angān.

¹⁹ Aku ati Tapa ngan, adi pirupas angān so sopŭrŭg susah ngga jera ngan, pak andu ati angān mbŭh tirawan Aku ka mbŭh mite Aku bada nggen raja di angān. Kana, nguruk garang adŭp ngan di sirung jawin TUHAN nanyam ka tibaran tibaran-asar ngga manak manak ngan.’ ”

²⁰ Komŭnŭ Samuel ngatur bada barang tibaran-asar mandŭg ka jawin, ka TUHAN mien tibaran-asar Benjamin.

²¹ Komŭnŭ Samuel bada bara rawang so tibaran-asar Benjamin mandŭg ka jawin, ka rawang Matri dog mien. Komŭnŭ bara dari so rawang Matri mandŭg ka jawin, ka Saul anak Kish dog mien. Ngara jiroh ayŭh, pak kan ngara dŭh tungang dapŭd ayŭh,

²² ngara siken so TUHAN, “Gibabŭ agi kah daya bŭkŭn?” TUHAN nam, “Saul agi dijeh, bisukan di dudu barang.”

²³ Jadi ngara bikaduh ka taban Saul ngga ruah ka yŭn daya bagŭ, ka ngara kiris ayŭh bigatung dŭ so daya bŭkŭn.

²⁴ Samuel nang di daya bagŭ, “Ta siati inŭh daya adi TUHAN muko mien! Mating daya bŭkŭn di ruang ta mun ayŭh.” Sopŭrŭg daya nyirais nang, “Siramat ambu umbur ka tuan raja!”

²⁵ Samuel kidaan di bara daya rati hak ngga kraja pingandai raja, ka nuris-i darŭm surat, adi nyikŭn-i di tarun yŭn adi kudus. Komŭnŭ ayŭh bada barang naan daya maad.

²⁶ Saul gŭh mari ka ramin adŭp-i di Gibeah. Kada bara dari adi bake, adi muko Tapa tama atin-i, sua ngga ayŭh.

²⁷ Pak kada daya adi dŭh biguna nang, “Ani bisa daya anŭ ndai yŭn ta?” Ngara ngamun Saul ka dŭh taban tadŭ mun pinganggen ka yŭn-i.