1 SAMUEL 1 - Hakcipta - Biatah Bidayuh

Elkanah Ngga Rawang-i di Shiloh

¹ Agi ndi naan daya dŭn Elkanah, adi so tibaran-asar Ephraim. Ayŭh rŭŭ di kupo Ramah di rais tarun tana sandah Ephraim. Ayŭh inŭh anak dari Jeroham ka sukuh Elihu, so rawang Tohu kada manak Zuph.

² Elkanah biyŭn duwŭh sawŭn, Hannah ngga Peninnah. Peninnah biyŭn anak, pak Hannah dŭh.

³ Barang sawa Elkanah matak so Ramah di nyambah ka jugan sadis ka TUHAN Bisa-pŭrŭg di Shiloh, adi yŭn Hophni ngga Phinehas, anak Eli adi duwŭh madis jadi imam TUHAN.

⁴ Barang saba Elkanah jugan sadis-i, ayŭh nggen ndi utung so dagin sadis anŭ ka Peninnah, ka ndi utung ka barang naan bara anak-i.

⁵ Ka sunggu ayŭh raru rindu Hannah ayŭh nggen ndi utung adŭ di ayŭh, sabab TUHAN mbŭh bitan ayŭh biyŭn anak.

⁶ Peninnah adi sawŭn Elkanah anŭ ndi, ari nyusah ka pimangŭh ayŭh, amai TUHAN bitan ayŭh biyŭn anak.

⁷ Kayuh anŭ simŭnŭ bisawa sawa; ka kan di tika ngara di ka ramin TUHAN, Peninnah ari kinuas Hannah ndŭg ka ayŭh sien ka dŭh an man ani ani.

⁸ Banŭh-i Elkanah siken ayŭh, “Hannah, mani kuu sien? Mani kuu abah man? Mani kuu ari susah? Dŭh kah aku ati mbŭh nyam ka adi rabis so simŭng anak dari di kuu?”

Hannah ngga Eli

^9-10 Ndi andu, ripas ngara muko man di ramin TUHAN di Shiloh, Hannah makat. Ayŭh mbŭh raru susah, ka ayŭh bandar bandar sien buang-i bidua ka TUHAN. Di tika anŭ, Eli adi imam agi guru di yŭn adŭp-i sindŭk tiban.

¹¹ Hannah bipayu nang, “O TUHAN adi Bisa-pŭrŭg, tingga aku ati adi urun Mai! Tingga pinyusah ku ka ingat aku! Dŭhnyah kambŭt aku! Kambŭi Kaam nggen anak dari di aku, aku bijanji aku re nitah ayŭh ka Kaam sitŭkŭd umbur-i ka ayŭh re bŭn kapŭg ubok-i.”

¹² Mua tian-i Hannah bidua ka TUHAN, ka Eli ngatin bibis-i.

¹³ Hannah pirŭngŭt bidua; bibis-i biguyut, pak sirŭŭn-i dŭh dog dingah. Jadi Eli pikir ayŭh mabuk,

¹⁴ ka nang di ayŭh, “Dŭhnyah kuu mabuk digiti! Dŭh tia nok ka nakit ngga adŭp mu!”

¹⁵ “Dŭh, aku dŭh mabuk, tuan,” ayŭh nam. “Mating aku nok! Aku susah, ka aku bidua, kidaan pinyusah ku ka TUHAN.

¹⁶ Dŭhnyah pikir aku ati dayung adi dŭh biguna. Aku bidua mun ati sabab aku mbŭh raru susah.”

¹⁷ Eli nang di ayŭh, “Kambŭi sakanŭ, maad kuu darŭm damai, ka isa-i Tapa Israel nggen di kuu kayuh adi mite mu so Ayŭh.”

¹⁸ “Isa-i kaam ari bipikir kana pasar aku,” Hannah nam. Komŭnŭ ayŭh bu, mbŭh an man, ngga dŭh tia susah.

Samuel dog Biranak ka dog Nitah ka TUHAN

¹⁹ Isan isan andu jawa ndi, Elkanah ngga rawang-i awar makat, ka kan muko nyambah TUHAN, ngara mari ka Ramah. Elkanah nyibŭŭs ngga sawŭn-i Hannah, ka TUHAN nam dua-i.

²⁰ Sawŭ meh Hannah bite, ka biranak ndi anak dari. Ayŭh kadŭn anak-i anŭ Samuel, ka kidaan rati-i, “Aku mite ayŭh so TUHAN.”

²¹ Tipuh mbŭh mandŭg dinge adi ngga Elkanah ngga rawang-i patut di ka Shiloh ka jugan sadis sawa ka TUHAN ngga sadis adi grua adi ayŭh muko bijanji an jugan.

²² Pak saba anŭ Hannah dŭh sua. Ayŭh kidaan di banŭh-i, “Kan anak ta ati mbŭh dŭh tia nyisuh, aku re taban ayŭh ka ramin TUHAN, di yŭn-i re rŭŭ sitŭkŭd umbur-i.”

²³ Elkanah nam, “Kana gŭh, ndai nanyam patut sŭn adŭp mu nang. Rŭŭ di arŭn ka sita ayŭh ndŭg ka ayŭh mbŭh dŭh tia nyisuh. Ka isa-i TUHAN bada janji mu jadi bitŭtŭk.” Jadi Hannah rŭŭ di arŭn ka sita anak-i.

²⁴ Kan anak anŭ mbŭh dŭh tia nyisuh, Hannah taban-i ngga di ka Shiloh, samŭn ndi pŭrŭng dari sapi adi gi-taruh sawa umbur-i, simŭng kilogram tibaduk, ngga ndi bŭrŭh-kurit puno ngga wain. Ayŭh taban Samuel, adi gibabŭ sŭ, di ka ramin TUHAN di Shiloh.

²⁵ Ripas ngara muko siŭ dari sapi anŭ, ngara taban anak anŭ ka yŭn Eli.

²⁶ Hannah nang di Eli, “Tuan, ingat mai kah aku? Aku inŭh dayung anŭ adi kiris mai mijog digiti, bidua ka TUHAN.

²⁷ Aku mite anak ati so Ayŭh, ka Ayŭh mbŭh nggen di aku kayuh adi aku mite.

²⁸ Jadi aku nyerah ayŭh ka TUHAN. Sitŭkŭd umbur-i ayŭh re dog dapu TUHAN.” Komŭnŭ ngara nyambah TUHAN diginŭ.