1 RAJA 3 - Hakcipta - Biatah Bidayuh

Solomon Bidua Mite Pinyibijak

¹ Solomon ndai pambit ngga raja Egypt darŭm-i tambit anak dayung-i ndu sawŭn. Ayŭh taban dayung anŭ ngga rŭŭ di Kupo David ndŭg ka ayŭh mbŭh ngamas pijog istana-i, Ramin TUHAN, ka sindung maning Jerusalem.

² Ramin TUHAN gibayuh dog pijog yŭn TUHAN, ka sabab anŭ daya gibabŭ jugan sadis di barang mija-sambah di barang yŭn-i agi.

³ Solomon rindu TUHAN ka tunda ajar sama-i David, pak ayŭh gŭh simareh bagŭ dāng ka jugan-i ndu sadis di barang ka mun mija-sambah.

⁴ Agi ndi sidah ayŭh di ka Gibeon di jugan sadis sabab diginŭ agi ndi mija-sambah adi siabo timagah. Dawŭ-i ayŭh muko jugan bagŭ sadis badang diginŭ.

⁵ Ngarŭm anŭ TUHAN nandŭng di ayŭh darŭm pŭmŭh ka siken ayŭh, “Ani raan mu Aku nggen di kuu?”

⁶ Solomon nam, “Kaam ari kiren pinyirindu bās di sama ku David, adi urun Mai, ka ayŭh kana, tŭtŭd, ka tŭnggŭn ngga Kaam. Ka Kaam mbŭh adu adu kiren di ayŭh pinyirindu mai adi bās adi dŭh bisa birubah darŭm Kaam nggen di ayŭh anak adi andu ati mritah gati ayŭh.

⁷ O TUHAN Tapa, Kaam mbŭh bada aku gati sama ku jadi raja, sunggu aku gi-raru mara ka dŭh puan simuki nŭŭh mritah.

⁸ Ta aku di dupan daya adi Kaam mbŭh mien jadi daya Mai, daya adi raru bagŭ ndŭg ka dŭh tungang dog mirang.

⁹ Ngapŭi nggen di aku pinyibijak adi aku biguna ngga mritah daya Mai ngga pinyitŭnggŭn ka ngga ngatŭn kayuh adi kana ngga adi arap. Kambŭi dŭh, simuki aku re bisa mritah daya Mai adi bās ati?”

¹⁰ TUHAN munos asŭng-I di Solomon amai-i mite kayuh anŭ,

¹¹ ngapŭi Ayŭh nang di ayŭh, “Sabab kuu mbŭh mite pinyibijak pakai mu mritah ngga pinyitŭnggŭn, ka dŭh mite udip tui yŭn adŭp mu, puan kah pinyikaya, puan kah pinyikabŭs pinganyu mu,

¹² Aku re nggen pimite mu. Aku re nggen di kuu bagŭ dŭ pinyibijak ngga pinyimirati so tung daya adi mbŭh ka so tung ngara adi re.

¹³ Aku gŭh re nggen di kuu kayuh adi kuu dŭh mite: sitŭkŭd kuu udip kuu re biyŭn pinyikaya ngga stabi, rabis so anŭ adi raja bŭkŭn biyŭn.

¹⁴ Ka kambŭi kuu tunda pinganang Ku ka sita ukum ukum-adat Ku ka pesan Ku, mun Sama mu David, Aku re bada umbur mu ambu.”

¹⁵ Solomon burah ka rada Tapa mbŭh minyu ngga adŭp-i darŭm pŭmŭh. Komŭnŭ ayŭh di ka Jerusalem ka mijog di jawin Pati Simanya TUHAN ka jugan sadis badang ngga sadis bidingan ka TUHAN. Ripas anŭ ayŭh ndai gawai yŭn bara pinurung-i.

Solomon Guru Nggen Bisara

¹⁶ Ndi andu duwŭh naan dayung sundar mandŭg di bidapŭd ngga raja Solomon.

¹⁷ Ndi naan so ngara nang, “Tuan Raja, aku ngga dayung ati samah rŭŭ darŭm ndi ramin, ka aku biranak ndi anak dari sitadŭn ayŭh agi diginŭ.

¹⁸ Duwŭh andu ripas anak ku mbŭh dog ruwan, ayŭh biranak gŭh janji ndi anak dari. Kaŭs-i kieh duwŭh adŭ di ramin — mating daya bŭkŭn.

¹⁹ Jadi ndi ngarŭm di tika bŭŭs ayŭh ngga dŭh singaja bigiring ka maret anak-i, ka-i kabŭs.

²⁰ Ayŭh makat ngarŭm anŭ, tambit anak ku so yŭn ku darŭm aku aŭn bŭŭs, ka taban-i ka ambok adŭp-i; komŭnŭ ayŭh na anak adŭp-i adi mbŭh kabŭs di ambok ku.

²¹ Ngga isan isan, kan aku burah ka re paan anak ku, aku kiris-i kabŭs. Aku nakit tingga ka kiris-i dŭh anak ku.”

²² Pak dayung anŭ ndi nang, “Dŭh! Anak anŭ adi udip inŭh tung jaku, ka anŭ adi kabŭs inŭh tung jamu!” Dayung anŭ adi diŭ tejah nam, “Dŭh! Anak anŭ adi kabŭs inŭh jamu, ka anŭ adi udip inŭh jaku!” Ka ngara mbŭh bikarit di sirung jawin raja.

²³ Komŭnŭ Raja Solomon nang, “Barang naan so angān duwŭh nang anak anŭ adi udip tung adŭp-i, ka anak anŭ adi mbŭh kabŭs dŭh tung adŭp-i.”

²⁴ Ayŭh mite pedang, ka kan pedang anŭ mbŭh dog nggen di ayŭh,

²⁵ ayŭh nang, “Mire anak anŭ adi udip nyinuwŭh ka kutung pire-i di barang naan dayung anŭ.”

²⁶ Ka sindŭ anŭ adi sawŭ dapu anak anŭ adi udip, amai atin-i puno ngga pinyirindu di anak-i, nang di raja, “Turung, Tuan Raja, dŭhnyah siŭ anak anŭ! Nggen adŭ di dayung anŭ.” Pak dayung anŭ ndi nang, “Dŭhnyah nggen anak anŭ di tadŭ tadŭ kieh; Mire nyinuwŭh adŭ anak anŭ.”

²⁷ Komŭnŭ Solomon nang, “Dŭhnyah siŭ anak anŭ! Nggen-i di dayung adi diŭ tejah — ayŭh inŭh adi sawŭ sindŭ anak anŭ.”

²⁸ Kan daya Israel dingah gaya Solomon matŭd itong, sopŭrŭg ngara mbŭh puno ngga stabi di ayŭh, amai ngara puan nang Tapa mbŭh nggen di ayŭh pinyibijak ngga nyirase kaii daya ngga tŭnggŭn.