1 RAJA 2 - Hakcipta - Biatah Bidayuh

Sikasŭn Pinganang David di Solomon

¹ Kan David mbŭh sindŭk re kabŭs, ayŭh bagan anak-i Solomon ka nggen di ayŭh sikasŭn ajar-i:

² “Tika adi ngga aku kabŭs mbŭh sindŭk. Kuu dŭh siŭn bada atin mu arot pak birani,

³ ka ndai kayuh adi TUHAN adi Tapa mu pesan kuu bada ndai. Tunda sopŭrŭg ukum-adat ngga pinyipesan-I, nimun adi mbŭh dog nuris darŭm Ukum-adat Moses, isa di barang yŭn kuu di, kuu mujur di barang masam kayuh adi ndai mu.

⁴ Kambŭi kuu tunda pinganang-I, TUHAN re sita janji adi-I ndai di tika Ayŭh kidaan di aku nang sesang ku re mritah Israel sitian ngara nakit tunda ngga tŭtŭd pinyipesan-I ngga siabo atin ka asŭng ngara.

⁵ “Agi ndi dinge. Kuu ingat kayuh adi Joab ndai di aku; ayŭh siŭ duwŭh naan pingibās bara soldadu Israel, Abner anak Ner ngga Amasa anak Jether. Kuu ingat munki ayŭh siŭ ngara di tika bamai ngga maras dendam yŭn pinyikabŭs adi ngara ndai di tika biperang. Ayŭh siŭ daya adi dŭh sarah ka madin aku inŭh adi dapu tanggong kayuh adi-i mbŭh ndai, ka aku gŭh adi sangsara.

⁶ Kuu puan ani patut kuu ndai; kuu dŭh siŭn bada ayŭh kabŭs sadi adŭp-i.

⁷ “Pak kiren mandis mu di bara anak Barzillai so Gilead ka nakit kingat ngara, sabab ngara mandis ngga aku di tika aku bu so jurud mu Absalom.

⁸ “Agi dinge ndi naan, Shimei anak Gera, so kupo Bahurim di tarun tana Benjamin. Ayŭh ko bandar bandar mangu aku di andu aku di ka Mahanaim, pak kan ayŭh bidapŭd ngga aku di Yang Jordan, aku bipayu di ayŭh ngga adŭn TUHAN nang aku dŭh re siŭ ayŭh.

⁹ Pak kuu dŭh siŭn tandah ayŭh dŭh dog ukum. Kuu puan ani patut kuu ndai, ka kuu dŭh siŭn dŭh nggen ukum kabŭs di ayŭh.”

David Kabŭs

¹⁰ David kabŭs ka dog kubur di Kupo David.

¹¹ Ayŭh jadi raja di Israel 40 sawa, mritah ju sawa di Hebron ka 33 sawa di Jerusalem.

¹² Solomon gati sama-i David jadi raja, ka kuasa-i jadi raja mbŭh nakit dog natu.

Adonijah Kabŭs

¹³ Komŭnŭ Adonijah, Haggith adi sindŭ-i, di ka Bathsheba, adi sindŭ Solomon. “Kuu muah ngga atin kana kah?” ayŭh siken. “Ngga atin kana,” ayŭh nam,

¹⁴ ka komŭnŭ ayŭh nang, “Aku agi kayuh an ku mite so kaam.” “Ani anŭ?” ayŭh siken.

¹⁵ Ayŭh nam, “Kaam puan nang aku patut jadi raja ka sopŭrŭg daya di Israel mbŭh puan. Pak gŭt-i dŭh jadi simŭnŭ, ka jurud ku inŭh adi mbŭh jadi raja, sabab-i pinyiraan TUHAN.

¹⁶ Ka madin aku biyŭn ndi pimite; turung dŭhnyah turak pimite ku.” “Ani anŭ?” Bathsheba siken.

¹⁷ Ayŭh nam, “Turung bada raja Solomon — aku puan ayŭh dŭh re turak pimite mai — isa-i nyibandar aku tambit Abishag, dayung so Shunem, ndu ku sawŭn.”

¹⁸ “Bisa,” ayŭh nam. “Aku re minyu ngga raja yŭn mu.”

¹⁹ Jadi Bathsheba di ka yŭn raja di minyu ngga ayŭh yŭn Adonijah. Raja mijog kambat sindŭ-i ka mutu ubak-i ka ayŭh. Komŭnŭ ayŭh guru di takta-i ka bada ndi dinge takta adi bŭkŭn dog taban mŭrŭt adi yŭn sindŭ-i guru tura ka tauh-i.

²⁰ Ayŭh nang, “Aku agi ndi pimite adi sŭ; turung dŭhnyah turak pimite ku.” “Ani anŭ, sindŭ?” ayŭh siken. “Aku dŭh re turak pimite mai.”

²¹ Ayŭh nam, “Bada jurud mu Adonijah tambit Abishag ndu sawŭn.”

²² “Mani kaam mite aku nggen Abishag di ayŭh?” raja siken. “Mbŭh kana dŭ kaam mite aku nggen takta gŭh di ayŭh. Mŭnŭ kaka ku gŭh ayŭh, ka Abiathar adi imam ngga Joab mbŭh di parad-i gŭh!”

²³ Komŭnŭ Solomon bipayu ngga adŭn TUHAN, “Isa-i Tapa siŭ aku kambŭi aku dŭh bada Adonijah bayar ngga asŭng-i amai pimite-i anŭ!

²⁴ TUHAN mbŭh nakit piguru aku di takta sama ku David; ayŭh mbŭh ingat janji-I ka mbŭh nggen pritah-i di aku ka di bara sesang ku. Aku bipayu ngga adŭn TUHAN, Adonijah re dog siŭ andu ati!”

²⁵ Jadi Raja Solomon nggen pinganang-i di Benaiah, adi ruah ka siŭ Adonijah.

Abiathar dog Taran so Kraja ka Joab dog Siŭ

²⁶ Komŭnŭ Raja Solomon nang di Abiathar adi imam, “Di ka kupo adŭp mu di Anathoth. Kuu patut dog nggen ukum kabŭs, pak aku dŭh re siŭ kuu madin, amai kuu tukang jaga Pati Simanya TUHAN sitadŭn kuu agi ngga sama ku David, ka sua kinyam sopŭrŭg pinyusah-i.”

²⁷ Komŭnŭ Solomon pirupas ayŭh so kraja-i adi jadi imam TUHAN, ka ngga simŭnŭ ayŭh bada jadi bitŭtŭk kayuh adi TUHAN mbŭh nang di Shiloh pasar imam Eli ngga bara sesang-i.

²⁸ Joab dingah kayuh adi mbŭh jadi. (Ayŭh mbŭh batu Adonijah, pak dŭh Absalom.) Jadi ayŭh bu di ka Bari TUHAN ka bidigŭng di sikuh mija-sambah.

²⁹ Kan agah anŭ mbŭh ndŭg Raja Solomon nang Joab mbŭh bu di ka Bari TUHAN ka mbŭh di mija-sambah, Solomon pait daya ka Joab bada siken mani ayŭh bu di ka mija-sambah. Joab nam nang ayŭh bu di ka TUHAN sabab ayŭh taru Solomon. Jadi Raja Solomon pait Benaiah bada di siŭ Joab.

³⁰ Ayŭh di ka Bari TUHAN ka nang di Joab, “Raja bada kuu ruah.” “Abah,” Joab nam. “Aku raan kabŭs digiti.” Benaiah pari ka yŭn raja ka kidaan di ayŭh kayuh adi Joab mbŭh nang.

³¹ “Ndai nimun adi mbŭh Joab nang,” Solomon nam. “Siŭ ayŭh ka kubur ayŭh. Simŭnŭ aku, puan kah tadŭ tadŭ so sesang David re dŭh tia dapu tanggong di kraja pingandai Joab adi muko siŭ daya adi dŭh sarah.

³² TUHAN re ngukum Joab amai pingandai-i anŭ adi siŭ daya dŭh so pinyipuan sama ku David. Joab siŭ duwŭh naan daya adi dŭh sarah adi kana dŭ so adŭp-i: Abner, pingibās bara soldadu Israel, ka Amasa, pingibās bara soldadu Judah.

³³ Ukum amai duwŭh naan ngara adi dog siŭ anŭ re adu adu nyatŭk Joab ngga bara sesang-i. Pak TUHAN re ari bada sesang sesang David adi guru di takta-i mujur.”

³⁴ Jadi Benaiah di ka Bari TUHAN ka siŭ Joab. Joab dog kubur sindŭk ramin-i di sapa kupo.

³⁵ Raja bada Benaiah jadi pingibās bara soldadu-i ngga gati Joab ka bada Zadok adi imam gati Abiathar.

Shimei Kabŭs

³⁶ Komŭnŭ raja bagan Shimei ka nang di ayŭh, “Pijog ndi ramin yŭn adŭp mu digiti di Jerusalem. Rŭŭ dieh ka dŭhnyah bu so kupo.

³⁷ Kambŭi kuu bu ka mutas sungi Kidron, kuu re manŭn dog siŭ — ka adŭp mu dapu tanggong di pinyikabŭs mu.”

³⁸ “Bisa, Tuan Raja,” Shimei nam. “Aku re ndai nimun adi kaam bada.” Jadi ayŭh rŭŭ tui di Jerusalem.

³⁹ Pak taruh sawa ripas anŭ, duwŭh naan urun Shimei bu di ka yŭn raja Gath, Achish anak Maacah. Kan Shimei dingah ngara di Gath,

⁴⁰ ayŭh na tapas-pinyiguru di tunduh kaldi-i ka di ka yŭn Raja Achish di Gath, di jiroh urun urun-i anŭ. Ayŭh dapŭd ngara ka taban ngara ngga mari.

⁴¹ Kan Solomon dingah kayuh adi Shimei mbŭh ndai,

⁴² ayŭh bagan ayŭh ka nang, “Aku bada kuu bijanji ngga adŭn TUHAN adŭp mu dŭh re ruah so Jerusalem. Ka aku bakan kuu nang kambŭi kuu ruah, kuu manŭn re dog siŭ. Dŭh kah kuu ko situju ka nang adŭp mu re tunda pinganang ku?

⁴³ Mani, meh, kuu dŭh tunda janji mu ka nyibireu pesan ku?

⁴⁴ Kuu puan sopŭrŭg sarah adi kuu mbŭh ndai di tunduh sama ku. TUHAN re ngukum kuu amai pingandai mu anŭ.

⁴⁵ Pak Ayŭh re nyiberkat aku ka bada pritah David adu adu pagŭng.”

⁴⁶ Komŭnŭ raja nggen pinganang-i di Benaiah bada di siŭ Shimei. Solomon madin mbŭh sukup bikuasa darŭm pritah-i.