1 PETER 3 - Hakcipta - Biatah Bidayuh

Banŭh ngga Sawŭn

¹ Simŭnŭ gŭh angān adi mbŭh banan dŭh siŭn dŭh an nundok di banŭh ngan, isa kambŭi agi so ngara adi dŭh sabah di pinganang Tapa, gaya pimudip ngan bisa tarik ngara da sabah. Dŭhsah angān nang ani ani di ngara,

² sabab ngara bisa kiris aran pimudip ngan adi bisig buang stabi di Tapa.

³ Dŭhnyah bisangan di kayuh adi tungang dog kiris yŭn pinyiramus ngan, mun udat ubok, pimakai mas, puan kah piraka adi angān nēn.

⁴ Pinyiramus ngan inŭh patut so tura ka darŭm, pimudip adi dŭh bidudu buang adi duduh. Pinyiramus adi mun anŭ tan tui, ka mbŭh brega dŭ di batŭh Tapa.

⁵ Amai jah-i, bara dayung adi nyambah Tapa, adi na pingarap-i di Tapa ari ngudat adŭp-i ngga atin nundok di banŭh.

⁶ Mun anŭ gŭh Sarah; ayŭh dingah pinganang Abraham ka kadŭn ayŭh tuan-i. Madin angān mbŭh bara anak dayung Sarah kambŭi angān ndai pingandai kana ka dŭh taru di tadŭ kayuh.

⁷ Simŭnŭ gŭh angān adi mbŭh sawan, dŭh siŭn dŭh an mirati sawŭn ngan adi taŭn rumuh dŭ so angān adi dari. Stabi di ngara, sabab ngara re sua gŭh ngga angān kambat pimudip adi pinganggen so Tapa. Ndai simŭnŭ, isa kayuh dŭh mito simayang ngan.

Sangsara Sitagar Pingandai adi Batur

⁸ Sikasŭn-i, sopŭrŭg ngan dŭh siŭn dŭh an ndi atin; rindu buang mandis ngga dingan ngan ngga atin tŭkŭn, keya ka bijurud.

⁹ Dŭhnyah maras arap ngga arap, puan kah maras pangu ngga pangu; pak maras ngga berkat, sabab berkat inŭh adi Tapa bijanji an nggen di angān di andu Ayŭh bagan angān.

¹⁰ Sak adi nang Surat-kudus, “Kambŭi angān raan pirami adŭp ngan ka raan kiris tipuh adi kana, angān dŭh siŭn piruah pinganang adi arap, buang dŭh tia kadong daya.

¹¹ Angān dŭh siŭn dŭh pasan pingandai arap ka ndai pingandai kana; angān dŭh siŭn dŭh an gruwŭn damai ngga siabo atin ngan.

¹² Amai Tuhan nguan daya adi tŭnggŭn buang dingah dua ngara; pak Ayŭh rawan daya adi ndai arap.”

¹³ Asi re kandam angān kambŭi angān graŭh an ndai kayuh kana?

¹⁴ Pak sunggu angān patut kinyam sangsara bait kani sitagar pingandai kana ngan, Tapa re mandis ngga angān! Dŭhnyah taru tadŭ tadŭ daya, ka dŭhnyah susah.

¹⁵ Pak stabi di Kristus darŭm atin ngan, ka kibās Ayŭh nimun Tuhan. Ari sidia nggen pinyinam di tadŭ daya adi mite angān kidaan rati pingarap adi angān biyŭn.

¹⁶ Pak nam ngara ngga duduh ngga stabi. Bada pikir-kira atin ngan bisig, isa kan angān dog pimangŭh, ngara adi kinarap urah-rakah ngan adi kana adi tunda Kristus, re mangŭh ngarun kayuh adi adŭp ngara ko nang.

¹⁷ Amai kana dŭ inŭh nŭŭh sangsara sitagar pingandai kana, kambŭi-i pinyiraan Tapa, so nŭŭh ndai pingandai arap.

¹⁸ Amai Kristus kabŭs ndi sidah yŭn adu adu ngga ngarun daya adi bidosa. Ayŭh dŭh biyŭn sarah pak kabŭs yŭn daya adi sarah, siŭn-I dapŭd nguru angān ka Tapa. Ayŭh dog ukum kabŭs nunda ka gaya pŭrŭng, pak dog kudip nunda ka gaya roh;

¹⁹ ka darŭm roh Ayŭh di nyuse agah so Tapa di roh roh adi dog jer,

²⁰ anŭ inŭh roh roh daya adi dŭh tunda pinganang Tapa di andu Ayŭh kajŭn ngga sabar di tipuh Noah ndai batra-i. Ngara adi darŭm batra, kaŭs-i mai naan, ka dog nyiramat da piin uba anŭ,

²¹ adi taŭn tandā pinatŭng baptisa adi nyiramat angān madin. Baptisa ati dŭh-i ngga ngu pŭrŭng ganan so kais rŭnŭk, pak-i janji ngan ka Tapa adi dog ndai so pikir-kira atin adi kana. Baptisa ati nyiramat angān so ka pinyimakat Jesus Kristus so kabŭs,

²² adi mbŭh di ka shorga ka mbŭh tura ka tauh Tapa, mritah sopŭrŭg malaikat, pinguasa ka pinyibake di rangit.