1 KRONIKEL 17 - Hakcipta - Biatah Bidayuh

Agah so Nathan yŭn David

¹ Raja David madin mbŭh rŭŭ di istana-i. Ndi andu ayŭh bagan nabi Nathan ka nang di ayŭh, “Ta digiti aku rŭŭ di ramin dog ndai so kayuh sedar, pak Pati Simanya TUHAN dog nyikŭn darŭm bari!”

² Nathan nam, “Ndai adŭ kayuh adi kuu raan, amai Tapa agi ngga kuu.”

³ Pak ngarŭm anŭ Tapa nang di Nathan,

⁴ “Panu ka kidaan di urun Ku David nang Aku nang di ayŭh, ‘Dŭh-i kuu adi re pijog ramin yŭn Ku.

⁵ So andu Aku pirupas daya Israel so Egypt ndŭg madin, Aku gi-bŭn rŭŭ di ramin; Aku ari rŭŭ di bari ka bipindah so tarun ndi di ka tarun andi.

⁶ Sitadŭn aku bigandon ngga daya Israel Aku bŭn siken di tadŭ tadŭ pinguru adi Aku mbŭh tijuan mani ngara dŭh pijog ramin yŭn Ku so kayuh sedar.’

⁷ “Jadi kidaan meh di urun Ku David nang Aku, adi TUHAN Bisa-pŭrŭg, nang di ayŭh, ‘Aku tambit kuu so yŭn mu nguan biri di tarun tana kupai ka bada kuu jadi pimritah daya Ku Israel.

⁸ Aku agi ngga kuu di barang yŭn mu panu, ka Aku muko ngarah sopŭrŭg pinganyu mu darŭm kuu masang panu. Aku re bada kuu timagah mun bara pinguru adi bās di ong.

^9-10 Aku mbŭh mien ndi tana yŭn daya Ku Israel ka mbŭh bada ngara rŭŭ diginŭ, di yŭn ngara re rŭŭ buang dŭh tia dog kinanyuh. So jaman ngara mŭrŭt tarun tana anŭ ngara ari dog nyerang daya di ganas, pak-i dŭh re tia simŭnŭ. Aku bijanji re ngarah sopŭrŭg pinganyu mu ka re nggen di kuu sesang.

¹¹ Kan kuu kabŭs ka dog kubur ngga tayung-babuk mu, Aku re bada ndi so bara anak mu jadi raja ka re bada pritah-i tagap.

¹² Ayŭh inŭh adi re pijog ramin yŭn Ku, ka aku re natu takta-i re tan adu adu yŭn barang turap sesang-i.

¹³ Aku re jadi sama-i ka ayŭh re jadi anak Ku. Aku dŭh re ko batu ayŭh mun Aku ko batu Saul, adi Aku kadi isa kuu dapŭd jadi raja.

¹⁴ Aku re bada ayŭh nguasa daya Ku ngga pritah Ku ndŭg situi tui. Takta-i re tan adu adu yŭn barang turap sesang-i.’ ”

¹⁵ Nathan kidaan di David sopŭrŭg kayuh adi Tapa mbŭh pinandŭng di ayŭh.

Dua Trima Kaseh David

¹⁶ Komŭnŭ Raja David mŭrŭt Bari TUHAN, guru ka bidua, “Aku ati ngga rawang ku dŭh inŭh sukup kana yŭn kayuh adi Kaam mbŭh ndai yŭn ku, TUHAN Tapa.

¹⁷ Ka Kaam tanŭ ka mbŭh ndai adi rabis kana so anŭ; Kaam mbŭh bijanji pasar bara sesang ku yŭn sawa sawa adi re, ka Kaam, TUHAN Tapa, mbŭh ndai aku bada mun daya adi bās.

¹⁸ Ani dinge bisa aku nang di Kaam! Kaam puan sopŭrŭg kayuh pasar aku, pak Kaam mbŭh nggen stabi di aku, adi urun Mai.

¹⁹ Anŭ mbŭh so ka pinyiraan ngga pinŭtŭn Mai Kaam ndai simuti yŭn ku ka kiren munki masam bās ku di jaman adi re.

²⁰ TUHAN, mating inŭh adi bŭkŭn re mun Kaam; kieh taŭn mbŭh puan nang Kaam sadi adŭ Tapa.

²¹ Mating bangsa bŭkŭn di ong mun Israel, adi Kaam pirupas so jadi urun siŭn jadi daya Mai. Kayuh bās ngga kayuh saruh adi Kaam mbŭh ndai yŭn ngara mbŭh bada adŭn Mai timagah di ndi ong ong. Kaam pirupas daya Mai so Egypt ka pibu bangsa bangsa bŭkŭn darŭm daya Mai masang darŭm pimanu ngara.

²² Kaam mbŭh bada daya Israel adu adu jadi daya adŭp Mai, ka Kaam, TUHAN, mbŭh jadi Tapa ngara.

²³ “Ka madin, O TUHAN, pijadi yŭn adu adu janji Mai pasar aku ka pasar sesang ku, ka ndai kayuh anŭ adi Kaam nang adŭp Mai re ndai.

²⁴ Adŭn Mai re jadi bās, ka daya re adu adu nang, ‘TUHAN Bisa-pŭrŭg inŭh Tapa Israel.’ Ka Kaam re bada takta ku tan adu adu yŭn barang turap sesang ku.

²⁵ Aku birani bidua sakanŭ ka Kaam, Tapa ku, sabab Kaam mbŭh pinandŭng sopŭrŭg kayuh anŭ di aku, adi urun Mai, ka mbŭh kidaan di aku Kaam re bada bara sesang ku jadi raja.

²⁶ Kaam, TUHAN, inŭh Tapa, ka Kaam mbŭh bijanji kayuh adi grua ati yŭn ku.

²⁷ Aku mite Kaam nyiberkat bara sesang ku isa ngara bisa adu adu kinyam pinyirasi Mai. Kaam, TUHAN, mbŭh nyiberkat ngara, ka berkat Mai re agi ngga ngara ndŭg situi tui.”