1 KRONIKEL 16 - Hakcipta - Biatah Bidayuh

¹ Ngara na Pati Simanya anŭ di darŭm bari adi David muko sidia. Komŭnŭ ngara jugan sadis ngga sadis bidingan ka Tapa.

² Ripas David muko jugan dudu sadis anŭ, ayŭh nyiberkat bara daya ngga adŭn TUHAN

³ ka kutung pinguman di sopŭrŭg ngara. Ayŭh nggen di barang naan, dari ngga dayung, di Israel ndi baru ruti, ndi pire asak dagin; ka kada buwa anggor adi pisŭk.

⁴ David tijuan kudu kudu naan daya Levi bada nguru bara daya simayang nyambah TUHAN, adi Tapa Israel, di jawin Pati Simanya, buang biragu ka muji Ayŭh.

⁵ Asaph dog tijuan jadi pinguru, ngga Zechariah adi pinurung-i. Jeiel, Shemiramoth, Jehiel, Mattithiah, Eliab, Benaiah, Obed Edom, ngga Jeiel tukang main kachapi. Asaph tukang mambak sigager,

⁶ ka duwŭh imam, Benaiah ngga Jahaziel, tukang mambak trompet barang andu di jawin Pati Simanya.

⁷ Ka nganŭ inŭh sibungas David bada Asaph ngga bara dingan-i adi samah daya Levi jadi daya tukang nang ragu puji ka TUHAN.

Ragu Puji

⁸ Nggen trima kaseh ka TUHAN, ka piagah bās-I; kidaan di barang bangsa kayuh adi mbŭh-I ndai.

⁹ Nang ragu puji ka TUHAN; kidaan kayuh saruh adi mbŭh-I ndai.

¹⁰ Gaŭn amai ata mbŭh tung jangi; sopŭrŭg adi nyambah Ayŭh patut gaŭn!

¹¹ Di ka TUHAN yŭn mite turung, ka nyambah Ayŭh adu adu.

^12-13 Angān bara sesang Jacob, urun Tapa, bara sesang Israel, adi Tapa mien, ingat pingandai-nginga adi Tapa ndai ngga pinyipatŭd itong adi-I nggen.

¹⁴ TUHAN inŭh Tapa ta; pinyipesan-I inŭh yŭn ndi ong ong.

¹⁵ Dŭhnyah kambŭt simanya Tapa, adi-I bada tan adu adu,

¹⁶ simanya adi-I ndai ngga Abraham, janji adi-I ndai ngga Isaac.

¹⁷ TUHAN ndai simanya ngga Jacob, simanya adi re tan adu adu.

¹⁸ “Aku re nggen di kuu tana Canaan,” Ayŭh nang. “Tana anŭ re jadi bisaka yŭn mu.”

¹⁹ Daya Tapa dŭh bagŭ, ngara daya saruh di tana Canaan.

²⁰ Ngara bigandon so rais ndi ka rais andi, so pritah ndi ka pritah andi.

²¹ Pak Tapa dŭh bada daya kinanyuh ngara; an grindung ngara, Ayŭh bakan bara raja:

²² “Dŭhnyah ida ida ngga bara urun adi mbŭh Aku mien; dŭhnyah bada bara nabi Ku kinaman.”

²³ Nang ragu yŭn TUHAN, sopŭrŭg daya di ong! Piagah barang andu agah kana pasar Ayŭh mbŭh nyiramat ata.

²⁴ Piagah bragah-I di bangsa bangsa, pingandai bās-I di sopŭrŭg daya.

²⁵ TUHAN inŭh bās ka adi rabis patut dog muji; Ayŭh dŭh siŭn dŭh dog stabi rabis so sopŭrŭg tapa adi bŭkŭn.

²⁶ Bara tapa sopŭrŭg bangsa inŭh tibudo adŭ, pak TUHAN napa rangit bās.

²⁷ Bragah ngga pinyibake kirurung Ayŭh, kuasa ngga pawŭn ngisi yŭn pinyirŭŭ-I.

²⁸ Muji meh TUHAN, sopŭrŭg daya di ong, muji bragah-I ka pinyibake-I.

²⁹ Muji meh adŭn TUHAN adi bibragah; taban pinganggen ngga mŭrŭt yŭn pinyirŭŭ-I. Mutu ubak ngan ka Ayŭh adi Kudus kan Ayŭh nandŭng;

³⁰ kimŭtŭr di sirung jawin-I, sopŭrŭg ong! Ong mbŭh dog bada tagap ka dŭh dapŭd dog ngugoh.

³¹ Gaŭn meh, ong ngga rangit! Kidaan di bangsa bangsa TUHAN inŭh raja.

³² Magā meh, rawŭt, ngga barang masam dāng darŭm kuu; gaŭn meh, ŭmŭh, ngga barang masam pimuruh darŭm kuu!

³³ Tŭngŭn tŭngŭn kayuh di tarun re nyirais ngga gaŭn kan TUHAN mandŭg di mritah ong.

³⁴ Nggen trima kaseh ka TUHAN, sabab Ayŭh inŭh kana; pinyirindu-I tan adu adu.

³⁵ Nang di Ayŭh, “Nyiramat kieh, O Tapa adi pinyikudip ami; nguruk kieh; pirupas kieh so kuasa bangsa bangsa, isa kieh bisa nggen trima kaseh ka muji adŭn Mai adi kudus.”

³⁶ Puji ka TUHAN, adi Tapa Israel! Muji meh Ayŭh madin ngga ndŭg situi tui! Komŭnŭ sopŭrŭg daya nang, “Amen”, ka muji TUHAN.

Sambah di Jerusalem ngga di Gibeon

³⁷ Raja David tijuan Asaph ngga bara dingan-i adi samah daya Levi bada tukang nguasa simayang adi dog ndai di tarun yŭn Pati Simanya dog nyikŭn. Ngara an ndai kraja ngara diginŭ barang andu.

³⁸ Obed Edom anak Jeduthun ngga 68 naan daya manak adŭp-i turung ayŭh. Hosah ngga Obed Edom tukang nguasa bara adi tukang jaga tiban buwang.

³⁹ Zadok adi imam ngga bara dingan-i adi bara imam, inŭh tukang nguasa simayang nyambah TUHAN di tarun yŭn bisambah di Gibeon.

⁴⁰ Barang isan ngga singumi andu ngara badang sadis di tunduh mija-sambah nanyam ka atur adi mbŭh dog nuris darŭm Ukum-adat adi TUHAN nggen di Israel.

⁴¹ Diginŭ ayō ngara inŭh Heman ngga Jeduthun ngga bara adi bŭkŭn adi mbŭh dog mien bada nang ragu puji ka TUHAN amai pinyirindu-I adi tan adu adu.

⁴² Heman ngga Jeduthun gŭh tukang ngatur trompet ngga sigager ka pingakas pingakas musik adi bŭkŭn adi dog mambak kan ragu puji dog nang. Bara so manak Jeduthun tukang jaga tiban tiban buwang.

⁴³ Komŭnŭ barang naan mari ka ramin adŭp-i, ka David mari ka ramin adŭp-i yŭn re rŭŭ mua tian-i ngga rawang adŭp-i.