1 JOHN 3 - Hakcipta - Biatah Bidayuh

Ata Anak Tapa

¹ Tingga, munki masam bās-i pinyirindu Tapa di ata! Pinyirindu-I raru bās ndŭg ka ata mbŭh dog kadŭn anak Tapa. Anŭ taŭn-i sawŭ, ngapŭi ong dŭh puan ata, sabab-i dŭh puan Tapa.

² Angān adi aku rindu, madin ata mbŭh bara anak Tapa, pak gibayuh ata puan ani re ta jadi. Pak ata puan nang kan Kristus nandŭng, ata re mun Ayŭh, sabab ata re kiris munki Ayŭh sibandar-i.

³ Barang naan ata adi biyŭn pingarap ati di Kristus bada adŭp ta bisig, nimun Kristus inŭh bisig.

⁴ Asi asi adi bidosa taŭn mbŭh miranggar ukum-adat Tapa, sabab dosa taŭn-i miranggar ukum-adat.

⁵ Angān puan nang Kristus ko nandŭng sabab an taran dosa. Di adŭp-I mating dosa.

⁶ Jadi barang naan daya adi udip ndi ngga Kristus dŭh tia bidosa; pak asi asi adi babŭ ndai dosa bŭn kiris Ayŭh ka dŭh gŭh puan Ayŭh.

⁷ Dŭhnyah bada daya nyibudo angān, bara anak ku! Daya adi ndai kayuh adi batur agi tŭnggŭn, nimun Kristus agi tŭnggŭn.

⁸ Daya adi babŭ bidosa taŭn-i dog dapu Siarap, sabab Siarap taŭn mbŭh bidosa so sibungas-i. Anak Tapa ko nandŭng sitagar kayuh ati, di pirabur kayuh adi Siarap ko ndai.

⁹ Ngara adi anak Tapa dŭh re tia bidosa, amai adŭp tibiat Tapa agi darŭm ngara; ka sabab Tapa mbŭh Sama ngara, ngara dŭh re tia bidosa.

¹⁰ Simuti inŭh angān bisa ngatŭn aki ndi anak Tapa ka aki ndi anak Siarap: ngara adi dŭh puan kayuh adi batur, puan kah adi dŭh rindu dingan-i dŭh-i anak Tapa.

Rindu Dingan Ta

¹¹ Agah adi angān ko dingah so sibungas-i agi sakati: ata dŭh siŭn dŭh an rindu dingan ta.

¹² Ata dŭh siŭn mun Cain; ayŭh dog dapu Siarap ka mbŭh siŭ sude adŭp-i Abel. Mani Cain siŭ ayŭh? Sabab kayuh adi adŭp-i ndai agi sarah, ka kayuh adi sude-i ndai agi batur.

¹³ Jadi dŭhnyah meh gŭgŭh, bara dingan ku, kambŭi daya di ong tiru di angān.

¹⁴ Ata puan adŭp ta udip, mbŭh ruah so pinyikabŭs, sabab ata rindu dingan ta. Ngara adi dŭh rindu gibabŭ di ribo kuasa pinyikabŭs.

¹⁵ Ngara adi tiru di dingan-i inŭh pinyiŭ, ka angān puan nang pinyiŭ dŭh biyŭn udip adi sawŭ adi tan adu adu darŭm ngara.

¹⁶ Simuti ata puan ani sibandar-i pinyirindu: Kristus ko nggen asŭng-I yŭn ta. Ata gŭh, patut nggen asŭng ta yŭn dingan ta!

¹⁷ Kambŭi ata kaya ka kiris dingan ta sutok, pak dŭh piduri ngara, simuki meh ata re patut nang adŭp ta rindu Tapa?

¹⁸ Bara anak ku, pinyirindu dŭh-i patut di baba adŭ; ayŭh dŭh siŭn dŭh pinyirindu adi sawŭ, adi tatŭng darŭm pingandai.

Atin Pus di Sirung Jawin Tapa

¹⁹ Simŭnŭ inŭh ata puan adŭp ta mbŭh anak Tapa adi sawŭ, ka dŭh re taru di sirung jawin-I.

²⁰ Kambŭi pikir-kira atin ta nyarah ata, ata puan Tapa agi bās dŭ so pikir-kira atin ta; Ayŭh puan sopŭrŭg kayuh.

²¹ Ngapŭi meh, angān adi aku rindu, kambŭi pikir-kira atin ta dŭh nyarah ata, ata biyŭn atin pus di sirung jawin Tapa.

²² Ata kambat so Ayŭh tadŭ tadŭ kayuh adi ata mite, sabab ata sita pinyipesan-I ka ndai kayuh adi pimunos asŭng-I.

²³ Kayuh adi-I pesan inŭh ata sabah di Anak-I Jesus Kristus ka rindu dingan ta, nimun Kristus ko pesan di ata.

²⁴ Ngara adi sita pinyipesan Tapa udip ndi ngga Tapa ka Tapa udip ndi ngga ngara. Ka sabab Roh adi Tapa ko nggen di ata, ata puan adŭp ta mbŭh udip ndi ngga Ayŭh.