1 CORINTH 6 - Hakcipta - Biatah Bidayuh

Taban Dingan ngga Bisara

¹ Kan agi so angān bikaii ngga dingan ngan adi samah Kristen, patut kah angān di ka akim daya adi dŭh puan Tapa, dŭh di ka bara daya adi Tapa mbŭh mien da ngatur-i yŭn ngan?

² Dŭh kah angān puan nang bara daya adi Tapa mbŭh mien re kidaan arap kana ong ati? Kambŭi angān tungang kidaan arap kana ong ati, tatu angān re rabis tungang kidaan arap kana kayuh adi siit?

³ Dŭh kah angān puan nang ata re nggen bisara di bara malaikat? Jung ka rabis-i kayuh ong ati!

⁴ Kambŭi kayuh adi mun anŭ timbur, angān re taban-i da dog ngatur daya adi dŭh dog stabi daya eklisia kah?

⁵ Nggen mangŭh adŭ! Tatu agi sikurang kurang-i ndi naan daya adi bijak so tibaran ngan adi tungang ngatur kaii adi timbur di dupan adŭp ngan adi samah Kristen.

⁶ Gŭt-i agi so angān adi samah Kristen taban dingan-i ngga bisara ka bada daya adi dŭh Kristen ngatur har-i!

⁷ Sibandar-i, darŭm angān taban dingan ngan ka yŭn bisara angān mbŭh kiren adŭp ngan dŭh udip nanyam ka ajar Kristus. Dŭh kah mbŭh kana dŭ angān dog mirupak bait dog nipu daya.

⁸ Pak gŭt-i angān mbŭh mirupak nipu dingan ngan, ndŭg ka jurud adŭp ngan ani!

⁹ Angān tatu puan nang daya adi ginaka dŭh re kinyam Pinyipritah Tapa. Dŭhnyah nyibudo adŭp ngan; daya adi dŭh tatu pimudip-i, puan kah adi nyambah tibudo, puan kah adi tanggah, puan kah adi ndai pingandai kais dupan adŭp-i adi samah dari,

¹⁰ adi naku, puan kah adi tama, puan kah adi pimabuk, puan kah adi an napŭ dingan-i, puan kah pirupak; mating katŭn so ngara anŭ re kinyam Pinyipritah Tapa.

¹¹ Agi kada so angān ko mun anŭ. Pak angān mbŭh dog pibisig so dosa; angān mbŭh dog trima Tapa jadi daya-I; angān mbŭh dapŭd bamai ngga Tapa da Tuhan Jesus Kristus ka da Roh Tapa ta.

Pakai Pŭrŭng ngan ngga Nyibragah Tapa

¹² Agi daya re nang, “Aku bisa ndai ani ani aku raan.” Sawŭ; pak dŭh sopŭrŭg kayuh kana yŭn ngan. Aku bisa nang aku bisa ndai ani ani aku raan, pak aku dŭh re bada adŭp ku jadi urun tadŭ kayuh.

¹³ Adi bŭkŭn agi re nang, “Pinguman yŭn tain, ka tain yŭn pinguman.” Sawŭ; pak Tapa re pirabur soduwŭh-i. Pŭrŭng manusia dŭh-i yŭn pimudip adi dŭh tatu darŭm pingandai kais, pak ngga ndai pinyiraan Tuhan; ka Tuhan inŭh adi nggen di pŭrŭng kayuh adi-i biguna.

¹⁴ Tapa pakat Tuhan so kabŭs, ka ngga kuasa-I anŭ gŭh Ayŭh re pakat ata.

¹⁵ Angān puan nang pŭrŭng ngan mbŭh bara sakap pŭrŭng Kristus. Bisa kah aku tambit ndi so sakap pŭrŭng Kristus ka bada-i jadi pŭrŭng dayung sundar? Manŭn dŭh bisa!

¹⁶ Angān dŭh puan kani daya adi tubu adŭp-i ngga dayung sundar mbŭh jadi ndi pŭrŭng ngga ayŭh? Surat-kudus agi nakit kidaan, “Ngara duwŭh re jadi ndi pŭrŭng.”

¹⁷ Pak sianŭ adi tubu adŭp-i ngga Tuhan mbŭh jadi ndi ngga Ayŭh darŭm roh.

¹⁸ Pijo adŭp ngan so pimudip adi dŭh tatu darŭm pingandai kais. Dosa adi bŭkŭn adi daya ndai dŭh dog pŭrŭng-i; pak daya adi udip ngga pingandai kais ndai dosa di tunduh pŭrŭng adŭp-i.

¹⁹ Dŭh kah angān puan pŭrŭng ngan inŭh yŭn pinyirŭŭ Roh Kudus; Ayŭh adi Tapa ko nggen di angān ka adi mbŭh rŭŭ darŭm angān? Angān dŭh yŭn adŭp ngan pak mbŭh yŭn Tapa;

²⁰ Tapa ko miris angān ngga rega bās. Jadi pakai meh pŭrŭng ngan ngga nyibragah Tapa.