1 CORINTH 4 - Hakcipta - Biatah Bidayuh

Bara Pinyuruh Kristus

¹ Angān patut nyirundeng kieh keya ka bara urun Kristus, adi dog tijuan da jaga atur-pinyiraan Tapa adi gibayuh ong puan.

² Ndi kayuh adi dŭh siŭn dŭh di bara urun adi mun anŭ, anŭ inŭh ngara an tŭtŭd di tuan ngara.

³ Aku dŭh mbit bat pasar ani di pikir ngan pasar adŭp ku, puan kah ani di pikir daya pasar adŭp ku. Ani di pikir ku pasar adŭp ku, anŭ dŭh gŭh biguna.

⁴ Pikir-kira atin ku agi bisig, pak dŭh sirati-i aku ati batur. Adŭp Tuhan inŭh adi bisa natu sarah kah dŭh aku.

⁵ Ngapŭi angān dŭh patut nang daya sarah bait dŭh sarah diŭ so tipuh-i. Itong dŭh siŭn patŭd sibayuh Tuhan mandŭg; Ayŭh re bada tatŭng sopŭrŭg rusia adi dog sukan darŭm karŭm samŭn pinŭtŭn atin manusia adi bisukan. Ka komŭnŭ barang naan daya re trima puji-i so Tapa nanyam patut.

⁶ Sabab angān, bara dingan ku, aku mbŭh bada adŭp ku ngga Apollos jadi suto danding yŭn ngan, isa angān birajar ani rati ati, “Tunda atur adi mbŭh agi.” Angān dŭh siŭn mingangŭn pasar ndi naan daya ka ngamun adi bŭkŭn.

⁷ Asi bada angān rabis kana so daya bŭkŭn? Dŭh kah Tapa ko nggen di angān sopŭrŭg kayuh adi angān biguna? Mani meh angān mingangŭn, mun ani kayuh adi angān biyŭn dŭh pinganggen?

⁸ Angān mbŭh biyŭn kah sopŭrŭg kayuh adi angān biguna? Angān mbŭh kaya kah? Angān mbŭh jadi raja kah darŭm kieh jadi daya au-tarun? Batang ku an bada angān sawŭ mbŭh jadi raja, isa kieh bisa jadi raja ngga angān.

⁹ Amai di kinyam ku Tapa mbŭh nggen di kieh adi bara pinyuruh kayuh adi siabo arap, keya ka daya adi dog nunggu bada kambat ukum kabŭs di sirung jawin daya bagŭ ngga pirami bara malaikat samŭn manusia di ong ati.

¹⁰ Amai Kristus kieh mbŭh daya budo; pak angān mbŭh daya bijak amai Kristus! Kieh ati ramah, pak angān bake! Kieh dog ngamun, pak angān dog stabi!

¹¹ Ndŭg madin tong-i kieh sibŭrŭk ngga badŭh asŭng; kieh pakai jamut ndu piraka; kieh dog pukong; kieh bigandon di tarun ndi ndŭg tarun andi;

¹² kieh bandar kraja ngga tangan adŭp ami. Kan kieh dog mangu, kieh nggen berkat; kan kieh dog kisiis, kieh sabar;

¹³ kan dog pimangŭh, kieh nam ngga pinganang adi mandis. Di daya, kieh ati dŭh kurang so adām sapok di ong; kieh mbŭh daya adi dŭh biguna di ong ndŭg ka andu ati!

¹⁴ Aku nuris surat ati ka angān, dŭh ngga aku pimangŭh angān, pak ngga pitayan angān nimun bara anak adŭp ku.

¹⁵ Amai sunggu angān biyŭn bait kani simŭng ribu naan gurū darŭm pimudip Kristen ngan, angān biyŭn ndi sama adŭ. Amai darŭm pimudip ngan adi ndi ngga Kristus Jesus, aku mbŭh jadi sama ngan darŭm aku taban Agah Kana ka angān.

¹⁶ Ngapŭi meh aku mite angān tunda suto danding ku.

¹⁷ Sabab anŭ aku pait Timothy ka angān, adi keya ka anak adŭp ku adi aku rindu ka adi tŭtŭd darŭm pimudip Kristen. Ayŭh re kidaan isa angān dŭh kambŭt aran pimudip ku darŭm Kristus, kayuh adi aku ngajar di sopŭrŭg eklisia di barang yŭn.

¹⁸ Agi so angān mbŭh mingangŭn sabab angān pikir aku dŭh re munan angān.

¹⁹ Kambŭi Tuhan raan, aku re rikas munan angān, ka nganŭ adŭp ku re puan sawŭ ngga dŭh-i kuasa ngara anŭ adi sambuh; dŭhnyah-i kayuh adi ngara nang adŭ.

²⁰ Amai Pinyipritah Tapa dŭh-i piminyu adŭ pak kuasa.

²¹ Aki ndi angān raan? An kah angān aku mandŭg ka angān taban pasut, puan kah ngga pinyirindu ngga duduh?