1 CORINTH 15 - Hakcipta - Biatah Bidayuh

Pinyimakat Kristus so Kabŭs

¹ Ka madin aku raan angān ingat, bara dingan ku, Agah Kana anŭ adi aku ko nyuse di angān, adi angān kambat, adi yŭn pinyabah ngan bidigŭng tagap.

² Anŭ inŭh Agah Kana, agah adi aku ko nggen di angān. Agah Kana anŭ re nyiramat angān kambŭi angān bidigŭng tagap dieh. Kambŭi dŭh, pinyabah ngan anŭ dŭh biyŭn guna.

³ Aku mbŭh nggen di angān kayuh adi aku ko kambat, adi mbŭh raru biguna: Kristus kabŭs yŭn dosa ta, nimun adi dog nuris di Surat-kudus;

⁴ Ayŭh dog kubur ka dog pakat udip bauh andu adi taruh, nimun adi dog nuris di Surat-kudus;

⁵ Ayŭh nandŭng di Peter ka komŭnŭ di sopŭrŭg bara pinyuruh adi simŭng-duwŭh naan.

⁶ Komŭnŭ Ayŭh nandŭng di bara pinunda-I adi rabis rimŭh ratus naan; batang sopŭrŭg ngara babŭ udip, sunggu agi adi mbŭh kabŭs.

⁷ Komŭnŭ ayŭh nandŭng di James, ka dinge di sopŭrŭg bara pinyuruh.

⁸ Sikasŭn-i Ayŭh nandŭng di aku, sunggu aku ati mbŭh keya ka daya dog biranak aset tipuh-i.

⁹ Amai aku ati adi mbŭh siabo kurang biguna di dupan bara pinyuruh; dŭh gŭh aku patut dog kadŭn pinyuruh, sabab aku ko kisiis eklisia Tapa.

¹⁰ Pak so ka pinyirasi-mandis Tapa aku mbŭh jadi adŭp ku adi madin, ka pinyirasi-mandis adi-I mbŭh nggen di aku dŭh-i jadi au-tarun. Pak gŭt-i aku adi rabis dŭ bandar nyiraja so bara pinyuruh adi bŭkŭn, sunggu-i dŭh inŭh pingandai adŭp ku, pak pinyirasi-mandis Tapa adi nyiraja ngga aku.

¹¹ Jadi meh, bait-i mandŭg so aku puan kah so ngara, anŭ inŭh kayuh adi sopŭrŭg kieh nyuse, ka anŭ inŭh kayuh adi angān sabah.

Pinyimakat ta so kabŭs

¹² Kieh nyuse agah pasar Kristus dog pakat so kabŭs, simuki kada so angān nang daya adi kabŭs dŭh re dog pakat udip bauh?

¹³ Kambŭi anŭ sawŭ, sirati-i Kristus dŭh gŭh dog pakat;

¹⁴ ka kambŭi Kristus dŭh dog pakat so kabŭs, kieh mating kayuh re ami nyuse, ka angān mating gŭh kayuh re ngan sabah.

¹⁵ Rabis so anŭ, kieh mbŭh keya ka pingadong nang Tapa pakat Kristus so kabŭs; pak kambŭi-i sawŭ daya adi kabŭs dŭh dog pakat udip bauh, Tapa dŭh gŭh meh pakat Kristus.

¹⁶ Amai kambŭi daya adi kabŭs dŭh dog pakat so kabŭs, Kristus dŭh gŭh dog pakat so kabŭs.

¹⁷ Ka kambŭi Kristus mating dog pakat so kabŭs, pinyabah ngan mbŭh keya ka pŭmŭh ka adŭp ngan babŭ manyap darŭm dosa.

¹⁸ Ka sirati-i gŭh bara adi sabah di Kristus adi mbŭh kabŭs mbŭh manyap.

¹⁹ Kambŭi pingarap ta di Kristus kaŭs-i kana yŭn pimudip ta di ong adŭ, taŭn-i mbŭh payah inŭh ata so tadŭ tadŭ daya bŭkŭn di ndi ong ong ati.

²⁰ Pak Kristus taŭn sawŭ dog pakat so kabŭs, jadi jamen ngara adi mbŭh kabŭs re sawŭ dog pakat gŭh.

²¹ Amai nimun pinyikabŭs mandŭg so ka ndi naan daya, simŭnŭ gŭh pinyimakat so kabŭs mandŭg so ka ndi naan daya.

²² Amai nimun sopŭrŭg daya kabŭs sabab ngara ndi ngga Adam, simŭnŭ gŭh sopŭrŭg daya re dog pakat udip bauh sabab ngara mbŭh ndi ngga Kristus.

²³ Pak barang naan re dog pakat nunda ka atur: Kristus, adi siabo diŭ; komŭnŭ, di tika pimandŭg-I, ngara adi-I dapu.

²⁴ Ripas anŭ sikasŭn tipuh re mandŭg; Kristus re ngarah sopŭrŭg pinyipritah, pinguasa ngga pinguru, ka re nyerah ka Tapa Sama kuasa-I nimun Raja.

²⁵ Amai Kristus dŭh siŭn dŭh mritah ndŭg ka Tapa mbŭh ngarah sopŭrŭg pinganyu ka na ngara di ribo kaja-I.

²⁶ Sikasŭn pinganyu adi re dog ngarah inŭh pinyikabŭs.

²⁷ Amai Surat-kudus agi nang, “Tapa na sopŭrŭg kayuh di ribo kaja-I.” Anŭ mbŭh timatŭk dŭh sirati-i Tapa adi na “sopŭrŭg kayuh” sua di ribo Kristus.

²⁸ Pak kan sopŭrŭg kayuh mbŭh dog na di ribo pritah Kristus, Ayŭh adi adŭp Anak re na adŭp-I di ribo Tapa, adi na sopŭrŭg kayuh di ribo-I; ka Tapa meh re mritah sopŭrŭg kayuh.

²⁹ Jadi munki meh ngara adi dog baptisa ngga ngarun ngara adi mbŭh kabŭs? Ani re ngara ndai? Kambŭi sawŭ, sak adi ko kada daya nang, daya adi mbŭh kabŭs dŭh re dog pakat udip bauh, mani meh ngara dog baptisa ngga ngarun ngara adi mbŭh kabŭs?

³⁰ Mun kieh ati, re ngga mani kieh tiap jam ari dŭm tadŭ re ruban asŭng ami?

³¹ Bara dingan ku, barang andu aku siraru dŭm tadŭ re kabŭs! Sabab aku mingangŭn di angān, darŭm pimudip ta adi ndi ngga Kristus Jesus Tuhan ta, aku nang sakanŭ.

³² Kambŭi aku birawan ngga “dāng dāng ganas” di Ephesus batur so ka pinyiraan manusia, ani utung-i di aku? Pak kambŭi daya adi mbŭh kabŭs dŭh dog pakat udip bauh, agi garang pinganang sakati, “Ja ata man nok, amai sipagi ata re kabŭs.”

³³ Dŭhnyah tibudō. “Dingan adi arap taŭn-i re pirusak angān.”

³⁴ Nakit bipikir ka dŭh tia bidosa. Angān patut mangŭh ngarun kada so angān dŭh puan Tapa.

Pŭrŭng Manusia adi mbŭh Udip Bauh

³⁵ Agi daya re nang, “Simuki daya adi mbŭh kabŭs re dog pakat udip bauh? Munki pŭrŭng ngara re?”

³⁶ Angān budo! Kan angān purun ruwang di tana, ayŭh dŭh re timbu kambŭi-i dŭh kabŭs.

³⁷ Anŭ adi angān purun batur-i ruwang, bait-i ruwang gandom puan kah ruwang kayuh bŭkŭn, dŭh-i tigŭrŭ tŭngŭn adi re timbu.

³⁸ Tapa nggen pŭrŭng di ruwang nanyam pinyiraan-I; Ayŭh nggen di tiap ruwang pŭrŭng nanyam patut.

³⁹ Ka isin pŭrŭng ngara adi udip dŭh-i samah; manusia biyŭn ndi masam isin, dāng ndi masam, manuk ndi masam, iken ndi masam.

⁴⁰ Anŭ adi di rangit biyŭn pŭrŭng ka anŭ adi di ong biyŭn pŭrŭng; pinyiramus pŭrŭng anŭ adi di rangit dŭh samah ngga pinyiramus pŭrŭng anŭ adi di ong.

⁴¹ Batŭh andu biyŭn pinyiramus adŭp-i, buran tung adŭp-i, bitang bitang tung adŭp-i; ka di dupan dudu bitang agi bagŭ masam gŭh pinyiramus.

⁴² Simŭnŭ inŭh kayuh re kan daya adi mbŭh kabŭs dog pakat udip bauh. Kan pŭrŭng dog kubur, ayŭh madam; kan dog pakat, ayŭh re udip adu adu.

⁴³ Kan dog kubur ayŭh dŭh ramus buang ramah; kan dog pakat, ayŭh re ramus buang bake.

⁴⁴ Kan dog kubur, anŭ pŭrŭng ong; kan dog pakat so kabŭs, anŭ pŭrŭng roh. Agi pŭrŭng ong manusia, re agi gŭh pŭrŭng roh.

⁴⁵ Amai Surat-kudus nang, “Manusia adi diŭ, Adam, dog napa jadi manusia”; pak Adam adi sundis inŭh Roh adi nggen udip.

⁴⁶ Dŭh-i kayuh roh adi mandŭg diŭ, pak kayuh ong, ka komŭnŭ kayuh roh.

⁴⁷ Adam adi diŭ, dog napa so tana, mandŭg so tana; Adam adi numbor duwŭh mandŭg so shorga.

⁴⁸ Ngara adi tung ong agi mun sianŭ adi dog napa so tana; ngara adi tung shorga agi mun sianŭ adi mandŭg so shorga.

⁴⁹ Nimun ata kasŭk gayŭn daya anŭ adi dog napa so tana, simŭnŭ gŭh ata re kasŭk gayŭn Daya anŭ adi mandŭg so shorga.

⁵⁰ Kayuh adi aku nang inŭh, bara dingan ku, kayuh adi jadi so isin ngga deya dŭh bisa sua dapu Pinyipritah Tapa, ka kayuh adi bisa kabŭs dŭh bisa dapu kayuh adi dŭh bisa kabŭs.

^51-52 Dingah meh rusia ati: dŭh sopŭrŭg ta re kabŭs, pak kan sikasŭn trompet dog mambak, sopŭrŭg ta re bitukar darŭm ndi kidap batŭh. Amai kan trompet anŭ dog mambak, daya adi kabŭs re dog pakat, dŭh re tia kabŭs, ka ata sopŭrŭg re bitukar.

⁵³ Amai kayuh adi bisa kabŭs ka madam dŭh siŭn dŭh bitukar jadi anŭ adi dŭh bisa kabŭs ka madam.

⁵⁴ Jadi kan kayuh anŭ jadi simŭnŭ, ka anŭ adi bisa kabŭs jadi anŭ adi dŭh bisa kabŭs, pinganang Surat-kudus re jadi bitŭtŭk: “Pinyikabŭs mbŭh dog kinating; pimanang mbŭh manŭn!”

⁵⁵ “Pinyikabŭs, diki pimanang mu? Pinyikabŭs, diki kuasa adi ngga mu kandam?”

⁵⁶ Pinyikabŭs dapŭd kuasa-i ngga kandam so dosa, ka dosa dapŭd kuasa-i so ukum-adat.

⁵⁷ Pak trima kaseh di Tapa adi nggen di ata pimanang so ka Tuhan ta Jesus Kristus!

⁵⁸ Jadi meh, angān adi aku rindu, mijog tagap ka dŭhnyah bada ani ani pigayo adŭp ngan. Na atin ngga pikir ngan di kraja Tuhan, amai angān puan sopŭrŭg kayuh adi angān ndai yŭn Tuhan dŭh-i au-tarun.