1 CORINTH 14 - Hakcipta - Biatah Bidayuh

Pasar Pinganggen Roh Kudus

¹ Pinyirindu inŭh adi angān patut gruwŭn. Na atin ngan di pinganggen roh, rabis-i pinganggen piagah agah so Tapa.

² Ngara adi minyu darŭm piminyu saruh dŭh minyu di daya pak di Tapa, sabab mating daya mirati kayuh adi ngara nang. Ngara minyu pasar kayuh adi bisukan adi Roh Kudus sadi adŭ puan.

³ Pak ngara adi piagah agah so Tapa minyu di daya ka nggen pinurung di daya, ngatat, ka nyaduh daya.

⁴ Ngara adi minyu darŭm piminyu saruh kaŭs-i turung adŭp-i, pak ngara adi piagah agah so Tapa turung sopŭrŭg daya darŭm eklisia.

⁵ Aku raan angān minyu darŭm piminyu saruh; pak aku raan dŭ angān biyŭn pinganggen piagah agah so Tapa. Amai daya adi piagah agah so Tapa agi biguna dŭ so daya adi minyu piminyu saruh, anŭ inŭh, kambŭi mating daya diginŭ adi tukang kidaan rati pinganang piminyu saruh anŭ, ngga turung sopŭrŭg daya eklisia.

⁶ Jadi kan aku mandŭg ka angān, bara dingan ku, ani kana ku di angān kambŭi aku minyu darŭm piminyu saruh? Taŭn mating guna-i, adŭ kambŭi aku taban ka angān pinandŭng so Tapa, puan kah pinyipuan, puan kah agah so Tapa, puan kah ajar.

⁷ Mbit ndu suto tirari puan kah kachapi, kambŭi-i dŭh dog mambak ngga biruru, asi re bisa puan ragu-i?

⁸ Ka kambŭi sianŭ adi digen trompet dŭh mambak-i ngga biruru, asi meh re sidia yŭn biperang?

⁹ Simŭnŭ gŭh, asi meh re mirati kayuh adi angān nang kambŭi agah adi angān nggen darŭm piminyu saruh dŭh tarang? Pinganang ngan anŭ re miyap mun sabak!

¹⁰ Agi bagŭ masam piminyu darŭm ong, pak mating adi dŭh biyŭn rati-i.

¹¹ Pak kambŭi aku dŭh puan piminyu anŭ adi dog pakai, ngara adi minyu-i mbŭh keya ka daya tami di aku, ka aku daya tami di ngara.

¹² Amai angān graŭh an biyŭn pinganggen roh, angān dŭh siŭn dŭh rabis so kayuh bŭkŭn an pakai anŭ adi biguna dŭ ngga turung pijog eklisia.

¹³ Sianŭ adi minyu piminyu saruh dŭh siŭn dŭh an simayang mite pinganggen anŭ ndi adi kidaan rati kayuh adi dog nang.

¹⁴ Amai kambŭi aku bidua simŭnŭ, roh ku sawŭ bidua, pak pikir ku dŭh sua.

¹⁵ Ani re ku ndai garang? Aku re bidua ngga roh ku, pak aku re bidua gŭh ngga pikir ku; aku re biragu ngga roh ku, pak aku re biragu gŭh ngga pikir ku.

¹⁶ Kan angān nggen trima kaseh darŭm roh, simuki daya biasa adi sua simayang re nang “Amen” yŭn dua trima kaseh ngan? Ngara dŭh puan kayuh adi angān nang.

¹⁷ Sunggu-i kana bait kani dua trima kaseh ngan ka Tapa, daya bŭkŭn adi sua guru diginŭ taŭn mbŭh dŭh dog turung.

¹⁸ Aku nggen trima kaseh di Tapa amai aku pakai piminyu saruh rabis so angān.

¹⁹ Pak di tika daya eklisia tikuruk simayang aku an dŭ minyu pakai rimŭh bang piminyu adi daya mirati, ngga ngajar daya, so ku pakai biribu ribu bang piminyu darŭm piminyu saruh.

²⁰ Dŭhnyah bipikir mun anak daya, bara dingan ku. Angān patut keya ka anak-anya jeja ka kayuh adi arap, pak jadi daya tuuh darŭm pikir ngan.

²¹ Darŭm Surat-kudus agi dog nuris, “Ngga daya tami adi pakai piminyu saruh Aku re minyu ngga daya Ku, Tuhan nang. Aku re minyu so baba daya tami pak babŭ gŭh daya Ku dŭh an dingah Aku.”

²² Ngapŭi meh, pinganggen minyu darŭm piminyu saruh mbŭh tandā yŭn daya adi dŭh sabah di Kristus, dŭh-i yŭn daya adi sabah; pinganggen piagah agah so Tapa mbŭh tandā yŭn daya adi sabah di Kristus, dŭh-i yŭn daya adi dŭh sabah.

²³ Jadi kambŭi sopŭrŭg daya eklisia tikuruk ka sopŭrŭg piguru minyu darŭm piminyu saruh, ka kambŭi agi kada daya biasa puan kah daya adi dŭh sabah di Kristus mŭrŭt, dŭh kah ngara re nang sopŭrŭg ngan gira?

²⁴ Pak kambŭi barang naan piagah agah so Tapa kan kada daya adi dŭh sabah di Kristus puan kah daya biasa mŭrŭt, ngara anŭ re rada adŭp-i daya bidosa ka raan ngubah adŭp-i sabab kayuh adi ngara dingah.

²⁵ Pikir-kira ngara adi bisukan re tatŭng, ka ngara re sidikang ka nyambah Tapa buang ngaku, “Sawŭ Tapa agi digiti ngga angān!”

Atur di Tika Tikuruk Simayang

²⁶ Ati inŭh kayuh adi aku nang, bara dingan ku. Kan angān tikuruk simayang, agi tukang nyanyi, agi tukang ngajar, agi tukang nggen pinandŭng so Tapa, agi tukang piagah agah so Tapa darŭm piminyu saruh, ka agi tukang kidaan rati kayuh adi dog nang. Sopŭrŭg kayuh dŭh siŭn dŭh ngga turung eklisia.

²⁷ Kambŭi agi daya an minyu darŭm piminyu saruh, siabo bagŭ-i duwŭh puan kah taruh naan patut minyu, bikires, ka daya bŭkŭn dŭh siŭn dŭh an kidaan rati kayuh adi dog nang.

²⁸ Pak kambŭi mating daya diginŭ adi bisa kidaan rati-i, sianŭ adi minyu darŭm piminyu saruh dŭh siŭn dŭh an pirŭŭ adŭp-i pak minyu di adŭp-i sadi ngga di Tapa.

²⁹ Duwŭh puan kah taruh naan adi mbŭh dog nggen agah so Tapa patut piagah-i, darŭm adi bŭkŭn ngatin kayuh adi dog nang.

³⁰ Pak kambŭi agi daya di dupan bara adi mbŭh tikuruk kambat agah so Tapa, sianŭ adi minyu patut ko minyu.

³¹ Sopŭrŭg ngan bisa piagah agah so Tapa, ndi ngga ndi, isa barang naan dapŭd birajar ka dog ngatat.

³² Pinganggen piagah agah so Tapa an nakit dog jaga sianŭ adi tukang piagah,

³³ sabab Tapa dŭh raan ata udip darŭm pito, pak raan ata udip tunda atur ka damai. Nimun adi mbŭh jadi di sopŭrŭg eklisia Tapa,

³⁴ bara dayung patut pirŭŭ adŭp-i di tika tikuruk. Ngara dŭh siŭn minyu; sak adi nang Ukum-adat Jahudi, ngara patut pirŭŭ adŭp-i pak nyiringa kayuh adi dog nang.

³⁵ Kambŭi ngara raan puan kayuh, ngara patut siken di banŭh ngara di arŭn. Taŭn-i nggen mangŭh dayung minyu di tika eklisia tikuruk.

³⁶ Pinganang Tapa dŭh mandŭg so angān, ka dŭh-i sabab angān sadi adŭ pinganang Tapa mandŭg?

³⁷ Kambŭi agi daya pikir adŭp-i pinyisung Tapa puan kah biyŭn pinganggen roh, ayŭh dŭh siŭn dŭh rada kayuh adi aku nuris ka angān mbŭh pinyipesan Tuhan.

³⁸ Pak kambŭi ayŭh dŭh piduri kayuh anŭ, dŭhnyah piduri ayŭh.

³⁹ Jadi meh, bara dingan ku, na atin ngan di kraja pingandai adi piagah agah so Tapa, pak dŭhnyah nagah daya minyu darŭm piminyu saruh.

⁴⁰ Sopŭrŭg kayuh dŭh siŭn dŭh dog ndai ngga nakit ka ngga biruru.