1 CORINTH 11 - Hakcipta - Biatah Bidayuh

¹ Tunda suto danding ku, nimun aku tunda suto danding Kristus.

Nutu Ubak di tika Simayang

² Aku muji angān sabab angān siraru ingat aku ka tunda sopŭrŭg ajar adi aku ko nggen di angān.

³ Pak aku raan angān puan nang Kristus inŭh ubak yŭn barang naan dari, banŭh inŭh ubak yŭn sawŭn-i, ka Tapa inŭh ubak yŭn Kristus.

⁴ Jadi dari adi simayang puan kah adi piagah agah so Tapa di tika simayang ngga ubak-i dog nutu nggen mangŭh di Kristus.

⁵ Ka dayung adi simayang puan kah adi piagah agah so Tapa di tika simayang dŭh nutu ubak-i nggen mangŭh di banŭh-i; mating bŭkŭn-i ayŭh ngga dayung adi ko nundo ubak-i.

⁶ Kambŭi dayung dŭh nutu ubak-i, kana dŭ ayŭh gutin ubok-i. Jadi amai-i dŭh kana dayung nundo ubak-i puan kah gutin ubok-i, ayŭh patut nutu ubak-i.

⁷ Dari dŭhsah nutu ubak-i, sabab ayŭh nyiramin gayŭn ngga bragah Tapa. Pak dayung nyiramin bragah dari;

⁸ amai dari dŭh dog napa so dayung, pak dayung so dari.

⁹ Dŭh gŭh dari dog napa yŭn guna dayung, pak dayung dog napa yŭn guna dari.

¹⁰ Amai sabab bara malaikat, dayung patut biyŭn tutu di ubak-i ngga kiren adŭp-i di ribo kuasa banŭh-i.

¹¹ Darŭm pimudip ta ngga Tuhan, dayung dŭh bisa dŭh bisangan di dari, ka dari dŭh bisa dŭh bisangan di dayung.

¹² Amai nimun dayung dog ndai so dari, simŭnŭ gŭh dari dog biranak so dayung; ka Tapa inŭh adi bada sopŭrŭg kayuh agi.

¹³ Adŭp ngan bisa kira patut kah dŭh dayung simayang di uruk daya bagŭ dŭh nutu ubak-i.

¹⁴ Amai mani, tibiat ong mbŭh ngajar angān nang dari ngga ubok ambu taŭn dŭh patut,

¹⁵ pak di dayung taŭn-i mbŭh pinyiramus. Ubok ambu-i mbŭh di ayŭh ndu tutu.

¹⁶ Pak kambŭi daya raan bikarit pasar kayuh anŭ, kayuh adi aku bisa nang kaŭs-i sakati: mating ata bait eklisia Tapa biyŭn atur adat adi bŭkŭn darŭm simayang.

Biruman Tuhan

¹⁷ Ngga pinganang ku te, aku dŭh muji angān, sabab tikuruk simayang angān sibatur-i ndai bagŭ dŭ pinyusah so pinyikana.

¹⁸ Sibungas-i aku dog kidaan nang agi tibaran adi dŭh bisa bigaur ngga tibaran adi bŭkŭn di uruk ngan; ka anŭ aku sabah nang batang an sawŭ. (

¹⁹ Kayuh adi mun anŭ taŭn-i abah dŭh jadi di dupan ngan isa ngara adi batur bisa rabis tungang dog kiris.)

²⁰ Kan angān tikuruk, dŭh-i Biruman Tuhan adi angān man.

²¹ Amai darŭm angān man, barang naan angān masin masin man pinguman adŭp-i, ka adi bŭkŭn agi adi mbŭh sibŭrŭk, agi gŭh adi mbŭh mabuk.

²² Dŭh kah angān biyŭn ramin adŭp ngan di yŭn ngan bisa man nok? Puan kah angān raan dŭ kani nggen mangŭh di eklisia Tapa buang nggen mangŭh di daya adi sutok. Ani meh sŭn ngan nang re ku nang di angān pasar kayuh anŭ? Bisa kah aku muji angān? Manŭn aku dŭh!

²³ Amai aku mbŭh trima so Tuhan ajar adi aku ko nggen di angān: Tuhan Jesus, di ngarŭm Ayŭh dog jua, mbit ndi kiping ruti,

²⁴ nggen trima kaseh di Tapa, mire-i, ka nang, “Ati inŭh pŭrŭng Ku, adi dog nggen yŭn ngan. Ndai simuti jadi pinatŭng Ku.”

²⁵ Simŭnŭ gŭh, ripas man Ayŭh mbit makuk ka nang, “Makuk ati inŭh simanya bauh Tapa, dog natu ngga deya Ku. Tiap kari angān nok-i, angān nok-i jadi pinatŭng Ku.”

²⁶ Sirati-i tiap kari angān man ruti ati ka nok so makuk ati angān piagah pinyikabŭs Tuhan ndŭg ka Ayŭh mandŭg.

²⁷ Pak kambŭi angān man ruti Tuhan puan kah nok so makuk-I ngga urah adi dŭh batur, angān mbŭh bidosa rawan pŭrŭng ngga deya Tuhan.

²⁸ Ngapŭi angān an nakit pirasa adŭp ngan diŭ, komŭnŭ meh angān bisa man ruti ka nok so makuk anŭ.

²⁹ Amai kambŭi angān dŭh puan rati pŭrŭng Tuhan darŭm angān man ruti anŭ ka nok so makuk anŭ, angān mbŭh nunggu adŭp ngan darŭm angān man ka nok-i.

³⁰ Anŭ inŭh sabab bagŭ angān mbŭh birandam ka ramah, ka bagŭ gŭh mbŭh kabŭs.

³¹ Kambŭi ata pirasa adŭp ta diŭ, dŭh ata dog ukum Tapa.

³² Pak ata dog bisara ka dog ukum adŭp Tuhan, isa ata dŭh dog ukum samah ngga ong.

³³ Jadi meh, bara dingan ku, kan angān tikuruk yŭn Biruman Tuhan, kajŭn dingan ngan.

³⁴ Ka kambŭi agi so angān sibŭrŭk, ayŭh patut man di arŭn adŭp-i, isa angān dŭh dog ukum Tuhan darŭm angān mandŭg tikuruk. Pasar kayuh adi bŭkŭn, aku re ngatur-i kan aku mandŭg.