Tito 3 - Nuevo Testamento Toba Sur

Da no'on n'onataxac na 'amqajnataxanaxaicpi

¹ 'Auennataxanaxanec na 'amqajnataxanaxaicpi da ÿataqta ÿoqochi'iguet qataq ÿalaxalec na nta'alpi mayi lta'adaicpi qataq na ltauapi. Chaqdata da lhuotta da i'ot ca camachicague't no'on n'onataxanaxac.

² Sa ishit da quetapeguelec ca lÿa. Chaqdata da huo'o da lhualaxavic qataq da lsoxoyic. Qataq huosotta da lataxac da huetapegue' ca camachaqca shiÿaxaua.

³ Cha'ayi nachi 'en'ama qomi' co'olloxochi saxanaxa da sa'amqajnataxanaq. Ÿataqta qaica ca saÿajnaqpec, qataq sa salaxasoxolec ñi Dios. Sesomaqtac, qataq qomi' l-lataqa na ÿotta'a't qadqopitaxanaqtaic qataq qadamanaxanaqtaic. Souaqtaigui da so'otaqtapeguec ca sa ÿaÿamaxañi ca qadÿa, qataq sepa'aguenaqtac. Mashi sotaq qomi' qaishitegueta. Chaqdata da ñipa'aguenaqtega't.

⁴ Qalaxayi ñi Dios mayi qadca'alaxaqui co'ollaq ÿachaxana da lsoxoyic qataq da lauotaxanaqtaic na shiÿaxauapi,

⁵ nachi qomi' nca'alaxatreec. Qaq de'eda qomi' i'oteque, sa ishit da huo'otaq naigui ca so'otaqtac ÿaÿamaqchiguiñi. Mayi ñimayi qomi' ichoxode'n. Ÿoqo'oyi qomi' nca'alaxatreec co'ollaq saxaigui da achilaxac mayi naigui da dalaxaic qadañoxoc qataq da dalaxaic qanachaalataxac mayi chigoqchigui so Espíritu Santo.

⁶ Qaq ñimayi ÿachigoxotchigui so qadca'alaxaqui Jesucristo da qomi' ÿanema so Espíritu Santo, ÿataqta sa naloqnañi.

⁷ Ÿoqo'oyi nagui ñimayi ishit da qaltaq qomi' ÿaÿamaxadeete' souaxat da lqouagaxanaqtaic, qataq qomi' ÿanema da achaalataxac chochi tateec mayi ñaquitaqta'aguet.

⁸ Qaq de'eda shiitega ÿataqta 'eesa. Qaq ÿoqo'oyi ñishitaique da ÿataqta 'au'axat, yaqto' 'enauac na i'amaqten ñi Dios ÿataqta npogoxoinapegue' da i'ot ca ÿaÿamaqchiguiñi. De'eda shiitega ÿataqta 'onaxaic, qataq huo'o naq naigui.

⁹ Qalaxayi 'antela'agueto' na cotaxacpi mayi qaica ca naigui, nataq'en da n'aqtaguec so hua'au nta'alpi, qataq da qanayictega ca nÿa, qataq da qancotatapigui na nqataxacpi mayi chigoqo'ot so Moisés co'olloxochiyi. Cha'ayi damayi qaica ca taiguet, qataq qaica ca naigui.

¹⁰ Da huo'o ca sa nhuojna't naq'en na 'amqajnataxanaxaicpi, camayi ÿataqta 'autaxaÿot. Qaq da 'am sa ÿalaxaguet da mashi dos 'avi'iguelaxalec da qonapega, camayi nal'en da 'auÿotauga.

¹¹ Cha'ayi mashi qaÿaÿaten que'eca shiÿaxaua da sa nateneueegue da ÿaÿamaqchiguiñi. Cha'ayi da lasouaxashit nachida da yi'oq naq'en da ÿataqta isomapec.

Lalamaxat nqataxac so Tito

¹² Qom mashi 'am samaxa ñi Artemas, huo'otaq ñi Tíquico, qaq 'am sa 'anaÿaloxon qome da 'ananaÿa yi Nicópolis da aÿim 'anauane', cha'ayi sauotaique da soota'a yimayi qom nvideuo na n'omaxa.

¹³ Ÿataqta 'anpogoxoinapegue' qome da 'autauan so Apolo qataq so Zenas mayi l'onataxanaxac da iuejlec ca huo'o ca ÿasouaxat. 'Autauanque soomayi 'enauac na lhueneguesat da lliquiaxa'c, yaqto' qaica ca iue'n.

¹⁴ Nataq'en na qadqaÿañicpi 'amqajnataxanaxaicpi 'onaxaic da ÿaÿaten da i'ot ca no'on, qataq da itauan ca huo'o da lhuenaxanaxa, yaqto' da nachaalataxac namayipi ÿataqta huo'o da lañaxataxac.

Da pa'ateec lquinaxanaxac so Pablo

¹⁵ 'Enauac na soota'aguet qadqaÿañicpi 'am ÿamaxa da lquinaxanaxac. Qataq da iquinaxanaxac 'enauac na 'amqajnataxanaxaicpi mayi qanauochaxauapi. Qaq ñi Dios qami' ÿanema qome ca no'on qoyiquiaxaqui. Aja', nachi 'eetec de'eda.