Santiago 5 - Nuevo Testamento Toba Sur

Qai'aqtaxanem da nata'a nque'ejnaxac na sallaxanecpi

¹ Qami' sallaxanecpi, qan'axaÿaxañiÿo' qome da shinapec. Qanoÿiñiitaco', qataq qan'alqaitapiguiño' qome, souaxat da qami' nata'alo qanque'ejnaxaqui.

² Da qadsallaqai mashi ltotañi, qataq naua no'o'n qodogolli' mashi chi'c na lalaxat.

³ Ana qodomi oro qataq ana plata mashi ÿataqta decochi. Qaq ne'ena lcochaxa nachina na i'axat qome da qadasouaxashichi, qataq nachina na nlaxajñi da qadapachiyaxaqui, 'en'am ca nodec. Qami' qalapoñiitashiguem da qadsallaqai naua pa'atreec na'axa'te mayi souaqtaiguilo.

⁴ Añi nshiitenaqte mayi qami' sa ishit da qaushiichiñi na qad'onataxanaxanqui mayi nqattac ana ala na qodanguishiqui, nachañi añi qami' itoqoota'pe. Qaq ñi Dios mayi lataxala' 'enauac na piguem l'ecpi, ñimayi hua'aqtega da l'alaxac ne'ena n'onataxanaxanecpi.

⁵ Nagui da ña qauapiitalecna, qataq ÿataqta qanañañiiguet na ñi'oxoyic qataq na nqopitaxanaqtaicpi. Qami' qanchaqchiitapeguela't, qoñiÿa'am ca nalaatac huaca. Qaq nagui mashi nayiita'a da qanalaataguiiqui.

⁶ Qami' qauasaqailec ca lasouaxashit ca shiÿaxaua mayi saqca ca ÿasouaxat, qataq qaualauachi. Qalaxayi namayipi sa ishit da nañilengueta qami'.

Da hualaxaunaxac qataq da qouagaxaunaxac

⁷ Qaq ÿoqo'oyi qami' ÿaqaÿa't, ÿataqta qauauo'oi da qanhualaxaunaxaqui, chochi ivitta'a qanqashiñi ca lvidaxac so qadataxala' Jesús. Ña qaumichiñiÿo' ca do'onataxaatac na 'alhua ÿataqta ÿauo'o da nhualaxaunaxac da iuatta'aguet ca l'auaxanec auot. Ime, nachi qaltaq jec da iuatta'a ca pa'ateec auot. Huaña, qanachi ÿaconguet da lyaquiaxac da naquitta'a l'onataxanaxac.

⁸ Nataq'en qami' qauauo'oi da qanhualaxaunaxaqui. Sa ishit da leutapigui qadvilli, cha'ayi ca lli'iguelaxasoxoc so qadataxala' mashi sa qaÿapeque.

⁹ Qami' ÿaqaÿa't, saqco' qome ca quetapeguelec ca lÿa, yaqto' sa ishit da qaÿauo'o ca qadasouaxashichi. Cha'ayi ñi Dios mayi nmit na nasouaxashitpi, mashi sa qaÿapeque da nvi'.

¹⁰ Qami' ÿaqaÿadolqa, qaualoqnaxañiÿo' qome da n'aqtaguec da nque'ejnaxac qataq da lhualaxavic so Dios l'aqtaxanaxanecpi mayi ÿamaxalec da i'axat co'olloxochiyi da l'aqtac.

¹¹ Cha'ayi qomi' saÿajnaqta da ÿataqta machiguiñi ca inoxonaqchitteec na nque'ejnaxaguesat. Qami' mashi qau'aqaitega da lhualaxavic so Job, qataq mashi qauaÿajñiita da 'eetec ñi Dios somayi co'ollaq ividaxateec da nque'ejnaxac. Cha'ayi ñimayi ÿataqta soxodaic qataq choxonnataxanaxaic.

¹² Qami' ÿaqaÿadolqa, da ÿoqta napactelec na 'enauac 'eeta': Sa ishito' qome da 'auÿaxaatega da chigoqo'ot na piguem ca 'anhuaxanaguec, huo'otaq chigaqlec na 'alhua, huo'otaq camachaqcague't lÿa, qom huo'otaq sa 'aupaguelec ca 'ad'aqtac. Chaqdata da 'oonolec ca 'ad'aqtac 'anqa'en da 'auasat. Qoneta': Aja'. Qaq da sa 'aushit, qaq qoneta': 'A'i. Qaq da qonetec de'eda, nachi ñi Dios sa ishit da ÿauo'o ca 'adasouaxashit.

¹³ Da huo'o ca 'oonolec da qoñiita huo'o ca nomtapeeguet, no'on da nqouagaxaueetac. Da huo'o ca machiguiñi, no'on da do'onaxaatac, ÿi'oxodeetac ñi Dios.

¹⁴ Qaq da huo'otaq huo'o ca dalola, camayi no'on da iÿaxana na lataxala'pi na 'amqajnataxanaxaicpi da qanqouagaxaueelec, qataq qai'amnaxana na aceite da qanqouagaxauna da l'enaxat so qadataxala' Jesús.

¹⁵ Qaq da ÿataqta huelec da lpi'iÿaxac namayipi da nqouagaxauen, nachi de'eda nqouagaxaunaxac nca'alaxateec ca dalolaxaic. Qaq ñi qadataxala' Dios nachaalataxaañi. Qaq da huo'otaq huo'o ca lasouaxashit camayi, nachi qaÿapalaxat.

¹⁶ Qaq ÿoqo'oyi ñi 'oonolec da qoñiita da'aqtaxanem ca lÿa ca lasouaxashit, qataq ñi 'oonolec nqouagaxaueelec ca lÿa, yaqto' qami' qanatade'n. Da nqouagaxaunaxac ca no'on shiÿaxaua ÿataqta huo'o naq 'enec.

¹⁷ So Dios l'aqtaxanaxanec, l'enaxat Elías, somayi da lataxac 'eeta'ama qomi'. Co'ollaq nqouagaxaunot ñi Dios da sa namaq naq'en ca auot, nachi ipacchigui da saq nalec ana 'alhua ca auot, ividaxattreec soua tres vi'iyi, qataq seis ca'agoxoiqa.

¹⁸ Qaq co'ollaq ÿi'iguelaxalec da nqouagaxauen, nachi qaltaq huo'o so auot. Qaq nam ñaxattalec ana 'alhua, nachi huo'o da alaÿaxac.

¹⁹ Qami' ÿaqaÿadolqa, da huo'o ca 'oonolec da qoñiita ilamaqhuec, ca'ai da 'eesa lataxac, qaq da huo'o ca ñi'iguelaxateu'a da 'eesa lataxac,

²⁰ qaq no'on da qauaÿajñiita da ca ñi'iguelaxateuo ca 'itaxaloxoic da ca'ai naq'en ca sa ÿaÿamaxañi lliquiaxac, camayi nca'alaxateeguesop da l-leuaxa que'eca 'itaxaloxoic, qataq i'otteu'a da saqalota na qaÿapalaxat nasouaxashitpi.