Santiago 4 - Nuevo Testamento Toba Sur

Da qanauote' na nqopitaxanaqtaicpi mayi huetalecna

¹ ¿Huá'ago' ca chigaqa'ague da pa'aguenaxac qataq da loquiaxac da qoñiita? ¿Sa ishito' da chigaqaigui da lqopitaxanaqtaic da qadapachiyaxaqui mayi deloctega't, nachattaigui ñi 'oonolec da qoñiita?

² Qami' da huo'o ca qauauoitaique, qalaxayi sa ishit da qauañoxochi da huo'o, nachi qaualaataxañi. Qataq qauqopichiita'a ca ÿaqa'a, qalaxayi sa ishit da qanqachiiñi, nachi qaupa'aguenataxañi qataq qauloquiaxanataxañi. Qaq sa qanqachiiñi ca qauauoitaique, cha'ayi sa qauÿaxañiÿot ñi Dios.

³ Qaq da qauÿaxañiÿaique, qataq sa ishit da qauacoñiiguet, cha'ayi sa ÿaÿamaxañi da qadÿaxanaxaqui. Cha'ayi souaxat da qanshiitaique da chochi taigui qanqashiñi da qadqopitaxanaqtaiqui.

⁴ ¡Qami' mayi qai'axañiiuec da qauauochiic ñi Dios! ¿Qami' sa qauaÿajñiÿo' da ca shiÿaxaua da nauote' na nqopitaxanaqtaicpi mayi huetalec ana 'alhua, nachi camayi 'ico' npa'aguenaxaua ñi Dios? Qaq ca ÿi'iguena'a da nauote' na nqopitaxanaqtaiguesat mayi huetalecna, que'eca shiÿaxaua ÿataqta npa'aguene' ñi Dios.

⁵ Ÿoqo'oyi saq vichiguiñi da 'enapec naua ñiyigui'shi l'aqtaqa ñi Dios, 'eeta': “So Espíritu mayi qomi' ÿanaiguilo naq'en ñi Dios, somayi qomi' ÿauoteque qataq 'ico' ica'altalguete.”

⁶ Qalaxayi ñi Dios ÿacteec da lqouagaxanaqtaic da qomi' itaua'n. Cha'ayi ana'ana ñiyiguishi 'eeta': “Ñi Dios nachaata'aguet ca n'amqajnaxaic, qalaxayi nqouaguec da itauan ca ÿataqta sa n'amaqten.”

⁷ Qaq ÿoqo'oyi ÿataqta qanañañiÿot da qauatailec ñi Dios. Qataq qanachaachiÿa'aguet so shiÿaxaua lma'na. Qaq somayi dataueguesopa qami'.

⁸ Qanquiquiÿot ñi Dios, qaq ñimayi sa qami' iÿotapigui. Qami' 'itaxaloxoicpi, qai'axañiiuec da qauacoñiigui ca sa ÿaÿamaxañi. Qami' mayi qanshiitaique da qauauochiic ñi Dios qataq na huetalecna, nal'en da qauqui'itaxachiite' qome naua qadquiyaqchilli'.

⁹ Ÿataqta qauaquicoita, qataq qanoÿiñi qataq qan'alqaiñi. Sa ishit da qauaÿalliguiyiitac, chaqdata da ñittrañi naua qadachiyi'. Qataq sa ishit da qauamaitac, chaqdata da qauaquicoita.

¹⁰ Sa ishit da qan'amaqchiñiito'ot ñi qadataxala' Dios, yaqto' ñimayi qami' nauaxaÿaxaayishigue'm da qami' ÿi'oxoda'q naq'en.

Qoÿaatapigui ca lasouaxashit ca nÿa

¹¹ Qami' ÿaqaÿa't, saqco' qome ca quetapeguelec ca lÿa. Cha'ayi ca quetega ca lqaÿa, huo'otaq ÿaatapigui ca lasouaxashit, camayi 'ico' quetapeguelec na nqataxacpi qataq napacapeguelec. Qaq da nachi qoneta'ac de'eda, da qoquetega na nqataxacpi, nachi qoneta'am ca nmit na nasouaxashit, qaq sa ishit da 'aualaxalec na nqataxacpi.

¹² Qalaxayi 'oonolec ñim ÿan na nqataxacpi, qataq nachiñi ñi nmit na nasouaxashit. Qaq nachiñi mayi ishit da deca'alaqtaxan qataq delaqtaxan. Qalaq 'am, ¿négue't 'am da 'anmit ca lasouaxashit ca 'adÿa?

Sa qaÿaÿaten ca huaigui ca lÿa na'a'q

¹³ Qaq nagui qan'axaÿaxañiÿa da shinapec. Qami' mayi qoñiÿapec naxa da qad'aqtaqui: “Na na'a'q, huo'otaq qoyi'oxoñi, saxacda'a, ñoqo'onaxa yi la ciudad, huo'otaq yi'iyi lÿa. Qaq qom sovitaxa, nachi souaqa'a ca 'oonolec vi'i, nachi seshijnaxanqaique na qadmenec, yaqto' ñauegaq aca plata.”

¹⁴ Qaq ¿saq taguio' da qadvilli da sa qauaÿajñi ca huaigui ca lÿa na'a'q? Cha'ayi ¿négue'to' ca 'en'am da nachaalataxac ca shiÿaxaua? 'En'am peta'a na shiue da cada'acolec yi'oqta, lcopata'ague, qataq nlagaxatapec.

¹⁵ Da qad'aqtaquíctaxa 'eeta': “Da nachida ÿaÿamaxadeeta ñi qadta'a Dios, qaq ñachaataqtague' da so'otaq de'eda, huo'o chaq de'eda lÿa.”

¹⁶ Qalaxayi qami' ÿataqta ñi'oxonnaxaiqa naua qadtaxaÿaxacolli'. Qaq 'enauac de'eda 'amqajnaxac ÿataqta sa ÿaÿamaxañi.

¹⁷ Cha'ayi ca shiÿaxaua da ÿaÿaten ca ÿaÿamaqchiguiñi, qalaxayi sa ishit da i'ot, qanachi huo'o da lasouaxashit.