Santiago 3 - Nuevo Testamento Toba Sur

Da n'onataxac ñi qadachaxat

¹ Qami' ÿaqaÿadolqa, sa ishito' qome da saqalota na dapaxaguenataxanapec da qoñiita, cha'ayi mashi qauaÿajñi da qomi' mayi sapaxaguenataxanaqtac, qomi' naÿalguete ca saq llalcolec qanhuaxanaguec, saq shinaqa'am na qadaÿipi.

² Cha'ayi 'enauac huo'oi naua qadsomaxaco. Qaq da huo'o ca sa ishit da huo'o ca lsomaxac da detaqa, que'eca shiÿaxaua ÿataqta nalochiguiñi, cha'ayi ÿataqta ÿaÿaten da ilo'ogue 'enauac da l'oquiaxac.

³ 'Eeta'am da 'eetec da qomi' sanqaguilo caua lquejnaxanqa'te ca caaÿo, yaqto' ishit da qomi' ÿalaxagueta cam sataxanaqteuga.

⁴ Semetenaq nataq'en aca barco. Mayi ÿataqta late'edai, qataq ÿataqta saq llalcolec na i'axasoxoota'aguet l'at, qalaq so l'o ishit da ÿashaxaatapiguiñi cam ÿataxangue, qamaq ÿataqta qapi'olec sotai' ÿashiltalecolec.

⁵ Qaq 'eda da 'eetec nataq'en ñi qadachaxat. Ñimayi saq 'amaqtaq, saq 'en'ama naua lÿa't qodogoxoshi'te, qalaxayi ÿataqta napagaqajnaxaic da detaqa. ¡Ca ÿataqta lta'adaic aviaq ishit da qaÿavigaxat, ÿavigaxat catai' saq 'amaqtaqolec nodec!

⁶ Qaq ñi qadachaxat 'eeta'am ca nodec. Ñimayi imattalec 'enauac na qauemsat. Nachattaigui da qad'oquiaxac, qataq ishipaxanaqchittac. Ñimayi nachi 'eetai' da ÿavigaxattaigui da qanachaalataxac. Qaq de'eda l'edaxa ÿachigoxottapegueu'a ca nodec mayi saqca ca loga't.

⁷ Ca shiÿaxaua ishit da i'oxoÿaqchit ca 'oonolec naua shidolqa, huo'otaq nam ishit da huaÿotac, qataq na hualectapigui', qataq nam 'etaxat l'ec. Qaq huo'o na mashi i'oxoÿaqchit.

⁸ Qalaxayi saqca ca ishit da i'oxoÿaqchit ñi qadachaxat. Ñimayi ÿataqta qauemaic qataq huegaqaic, qataq nlaqchigui na 'ico' deshinataxanapec mayi qanlem.

⁹ Ñimayi taiguet da shi'oxodenaq ñi qadta'a Dios, qataq da seshiunaq ca shiÿaxaua mayi l'onatac ñi Dios da 'eeta'am naq'en da lataxac.

¹⁰ Na qodap chigoqtapoigui da qayi'oxonnataxanaxac qataq da qadshiunaxanaxac. Qami' ÿaqaÿadolqa, sa ÿaÿamaxañi da nachi 'eetec de'eda.

¹¹ Aca 'oonole ñi'illoxoqui mayi npaxaatashiguem na l'ec, ¿peta'a ishit da ama qataq chim? ¡'A'i!

¹² Qami' ÿaqaÿadolqa, aca higo lchiyic, ¿peta'a ishit da ñaxateec aca ala 'eeta'am ana l'enaxat aceituna? Qataq aca nanguishi uva, ¿peta'a ishit da ñaxateec aca ala, qaq 'eeta'am ana ala aca higo? Qaq nachi 'eetec nataq'en aca 'oonole ñi'illoxoqui, sa ishit da huo'otaq ñi'iua qataq ama na l'ec.

Da naÿajnec mayi ÿoqta 'eesa lataxac

¹³ Da huo'o ca 'oonolec da qoñiita ÿataqta ÿajnataxanaxaic qataq huo'o na ÿaÿaten, ña ÿachaxan ca ÿaÿamaqchiguiñi n'onataxac qataq da huosotta lataxac dam ÿachigoxotaigui da laÿajnec.

¹⁴ Qalaxayi qami' da huo'o ca huetangui añi lquiyaqte ca lquiÿaxanaqtaic qataq huo'o ca naquittaique, qaq no'on da sa ishit da n'amqajngui da laÿajnec, cha'ayi 'eeta'am da chochi datenataxaatac qataq dataÿa'aguet da 'eesa lataxac.

¹⁵ Cha'ayi de'eda naÿajnec sa ishit da nachida da naÿajnec mayi chigoqo'ot ñi Dios. Damayi nachida da naÿajnec lma'na, chigaqaigui da lqopitaxanaqtaic na shiÿaxauapi, qataq nataq'en so shiÿaxaua lma'na.

¹⁶ Cha'ayi cam hueta'ague ca huo'o da lquiÿaxanaqtaic qataq huo'o ca naquittaique, nachi huetaña da saqca ca nlagaxayic qataq 'enauac na sa ÿaÿamaxañisat.

¹⁷ Qalaxayi ca hueto'ot da naÿajnec mayi chigoqo'ot ñi Dios, camayi hua'auñi da qui'itta da nachaalataxac. Ime, qataq nhualaxaunaxaic, soxodaic, n'axaÿaxanguet ca lÿa, choxonnataxanaxaic, qataq i'ot ca ÿaÿamaqchiguiñi. Camayi sa ishit da huo'o ca ÿoxottapiguiñi. Chaqdata da huosochiguiñi.

¹⁸ Qaq na npogoxoueetapegue' da nlagaxayic, namayipi nachina na ÿaatapiguiñi de'eda nlagaxayic, yaqto' na shiÿaxauapi ishit da qui'itta da nachaalataxac.