Santiago 2 - Nuevo Testamento Toba Sur

Sa ishit da qalca'atagui na shiÿaxauapi

¹ Qami' ÿaqaÿa't, mayi qau'amaqchiñi som ÿi'oxodaic qadataxala' Jesucristo, sa ishito' qome da qalca'aitagui na shiÿaxauapi.

² Cha'ayi sa iuena'a da huo'otaq nnoxoodeu'a ca qalaponaxaqui caua dos shiÿaxa'u. Ca 'oonolec ÿaataguilo naua llaxaata ana chiguishaqte oro qataq naua alogo ÿataqta 'onaxaiqa. Qaq ca lÿa ÿaatrañi caua anogo ltoxoiqolqom.

³ Qaq huo'otaq ÿataqta qauloÿiguet cam ÿaatrañi caua no'oñi anogo, qaq qoñiÿapega: “'Anso'ootanguio' qome ana'ana 'onaxai so'onaxaqui.” Qaq ca choxodaq qoñiÿapega: “'Am qoueta'aÿo' yi'iyi 'anachattañi, huo'otaq qonetaña ne'ena.”

⁴ Qaq da nachi qoñiitec de'eda, nachi qami' sogote da qalca'aitagui na shiÿaxauapi. Qaq de'eda qalca'axanaxaqui chigoqtapoigui dam sa ÿaÿamaxañi qadhuennataqai.

⁵ Qami' ÿaqaÿa't, qami' ñauochaxa'u, qan'axaÿaxañiÿa da i'aqtac: Ñi Dios lca'aguishic na shiÿaxauapi mayi choxodaq nam huetalec ana 'alhua, ÿauotaique da chochaq huañi naq'en da lpi'iÿaxac 'ico' lsallaxa, qataq nshitaique da talec da lalamaxat naq'en cam ñaq natauo l'onataxanaxac mayi ÿachaxanapeguem cam ÿataqta ÿauotec ñimayi.

⁶ Qalaxayi qami' qauauoita'a da l'aloxo nam choxodaqpi. ¿Peta'a sa nachino' na sallaxanecpi da ÿauo'o da qanque'ejnaxaqui? ¿Sa nachino' nam qami' ÿauecau'alo na nta'alpi?

⁷ ¿Sa nachino' namayipi nam ishiueetac da no'on l'enaxat so Cristo dam qami' qailonque?

⁸ Da ÿoqta 'eesa qau'ochi dam napacalec na laÿipi nqataxacpi mayi 'eeta': “'Auauotec ca 'adÿa, 'au'enaxatchigui da maichi 'anauojla't,” qaq damayi ÿataqta ÿaÿamaqchiguiñi.

⁹ Qaq qom qalca'aitagui na shiÿaxauapi, nachi qami' qauauoita'a ca qadasouaxashichi, qanachi yi'aqlec da sa qaualaqailec na lqataxacpi ñi Dios.

¹⁰ Cha'ayi da huo'o ca shiÿaxaua ÿataqta ÿalaxalec 'enauac na nqataxacpi, qaq da huo'otaq huo'o ca 'oonolec ÿasouaxatañi, nachi que'emaxaguet 'enauac na laÿipi nqataxacpi.

¹¹ Cha'ayi ñi Dios ñim 'enapec co'olloxochiyi: “Sa ishit da 'aualaataxan.” Qaq da huo'o ca sa ishit da lauatapiguiñi' aca sa lhua, qaq da huo'otaq dalaataxan, nachica ca yi'aqlec da sa ÿalaxalec na nqataxacpi.

¹² Qaq ÿoqo'oyi qami' 'eda da qadtaxaÿaxaqui qataq da qoñiitec, qau'enaxachiichigui ca qaÿataxanot da yaqto' nmit da nqataxac mayi ishit da qomi' huosochiyiñi naq'en.

¹³ Cha'ayi ca sa ishit da ichoxoden ca lÿa, nachi qai'enaxatteguet qom qanmit. Sa ishit da qaichoxonnai'. Ÿoqo'oyi ca huo'o da lchoxonnataxanaxa, ÿataqta saqca ca da qom qanmitna.

Da npi'iÿaxac qataq da ÿaÿamaqchiguiñi l'onataxanaxac

¹⁴ Qami' ÿaqaÿadolqa, ¿négue'to' ca naigui da huo'o ca 'eetega da huo'o da lpi'iÿaxac, da huo'otaq sa ishit da i'ot ca ÿaÿamaqchiguiñi? ¿Peta'a ishit da nca'alaxateec de'eda lpi'iÿaxac?

¹⁵ Cha'ayi sa iuena'a da huo'o ca qadqaÿa, huo'otaq aca qadqaÿa, huo'o da lhuenaxanaxa ca napogoña, huo'otaq ca chic yi na'a'q.

¹⁶ Qaq huo'o ca 'oonolec da qoñiita 'enapega: “'Aue qome, saqca ca da da 'iquiaxac. Sa 'auena'a ca 'anapogoña qataq ca qollic.” Qalaxayi da saq ÿanem cam yi'oqchigui lhuenaxanaxa, qaq ¿négue'to' ca naigui de'eda?

¹⁷ Qaq 'eda da 'eetec da lpi'iÿaxac ca shiÿaxaua. Da qaica ca ÿaÿamaqchiguiñi l'onataxanaxac, nachi 'ico' leuaxaic da lpi'iÿaxac.

¹⁸ Qaq da huo'o ca 'enapec da l'aqtac: “'Am huo'o da 'adpi'iÿaxac; aÿim, qalaxayi, huo'o da ÿaÿamaqchiguiñi i'onataxanaxac.” Qalaxayi aÿim shinapec: “Ñaq aÿim 'auachaxanem da 'adpi'iÿaxac 'andoxotteec, sa 'aualecneuo ca ÿaÿamaqchiguiñi 'ad'onataxanaxac. Ime, qaq aÿim 'am sachaxana da ÿaÿamaqchiguiñi l'onataxanaxac da ipi'iÿaxac.”

¹⁹ 'Am nalotau'a da 'adpi'iÿaxac da 'au'amaqten da 'oonolec ñi Dios. Qaq damayi ÿataqta ÿaÿamaqchiguiñi. Qalaxayi nataq'en i'amaqten de'eda na lamaxashicpi so shiÿaxaua lma'na. Ÿoqo'oyi ÿataqta iviloxolaqchit da lcolanaxa.

²⁰ Qaq 'am ÿoqta da qaica ca 'auaÿajnapec, cha'ayi sa ishit da 'au'amaqten da ca shiÿaxaua da saqca ca ÿaÿamaqchiguiñi l'onataxanaxac, nachi 'ico' leuaxaic da lpi'iÿaxac.

²¹ Ñi Dios ÿamata'ac da no'on shiÿaxaua so hua'au qadta'a Abraham souaxat da ÿaneuo co'ollaxa so llalec Isaac da ÿauo'o lachitaqtaxanaqte, ÿasaxalec aso nca'atoxonaxalate.

²² Ña 'ameteno' de'eda 'eetec so Abraham, damayi yi'oq naq'en da huo'o da lpi'iÿaxac, souaxat de'eda i'ot. Qaq de'eda lpi'iÿaxac ivida'a da ÿataqta nalochiguiñi, souaxat da ÿaÿamaqchiguiñi l'onataxanaxac.

²³ Qaq ÿoqo'oyi ipacchiguilo naua ñiyigui'shi l'aqtaqa ñi Dios da 'ena'pe: “So Abraham i'amaqten ñi Dios, qaq souaxat de'eda lpi'iÿaxac, nachi ñi Dios ÿamata'ac somayi da no'on shiÿaxaua.” Qaq ÿoqo'oyi so Abraham qailonec da nasaguiyaxaua ñi Dios.

²⁴ Qaq qami' ña qaumijñi da ñi Dios ÿaÿamaxadeeta ca shiÿaxaua souaxat ca ÿaÿamaqchiguiñi l'onataxanaxac, qaq sa ishit da chaqdata da lpi'iÿaxac.

²⁵ Qaq 'eda nataq'en da 'eetec aso quishiguetaxai, l'enaxat Rahab, co'ollaq ñi Dios ÿamata'ac asomayi da no'on 'alo, souaxat de'eda i'ot. Cha'ayi asomayi ÿauo'o ca l'ochaqa't soua nmejnaxanaxanqa, qataq itauanque da ÿaqa'a ca tateugalo naq'en.

²⁶ Qaq ÿoqo'oyi ca npi'iÿaxac, da saqca ca ÿaÿamaqchiguiñi l'onataxanaxac, nachi 'ico' leuaxaic. 'Eeta'am da qad'oquiaxac da saqca som capegue' lqui'i, nachi ileu.