Santiago 1 - Nuevo Testamento Toba Sur

So Santiago ÿamaxa aso lede som nlagaxattacpi

¹ Aÿim Santiago, aÿim lamaxashic ñi Dios qataq so qadataxala' Jesucristo. Samaxa da iquinaxanaxac na shiÿaxauapi mayi chigoxogueta soua doce llalqa so Israel nam nlagaxajlec 'enauac ana 'alhua.

Ca naÿajnec mayi chigoqo'ot ñi Dios

² Qami' ÿaqaÿa't, ÿataqta ÿacteec qanqashiñi da qantonaxaqui qom qami' nvitalo na ÿotta'a't ñi'iguenataxanaxac.

³ Cha'ayi mashi qauaÿajñiita qom ivita da qaÿi'iguen da qadpi'iÿaxaqui, nachi huaña, qaq nquic da qanhualaxaunaxaqui.

⁴ Qalaxayi qanpogoxoiñiÿapegue' da qanhualaxaunaxaqui da ÿataqta nalochiguiñi qanqashiñi, yaqto' qoñiita'am ca shiÿaxaua da mashi ÿi, ÿataqta nalochiguiñi, saqca ca lhuenec.

⁵ Da huo'o ca 'oonolec da qoñiita iuen ca laÿajnec, no'on da iÿaxanot ñi Dios. Qaq ñimayi ÿami', ÿataqta sa naloqnañi. Cha'ayi ñimayi sa ishit da shimataqaic, qataq sa ÿauota'a l'aloxo ca shiÿaxaua.

⁶ Qalaxayi ÿataqta 'auauo'o da 'adpi'iÿaxac da huo'o ca 'auÿaxanaique. Sa ishit da chochi 'anachita'a. Cha'ayi ca shiÿaxaua da nachita'a da huo'o ca iÿaxaataique, camayi 'eeta'am ana lapaxa aso auaxai da chochi ÿachitac na l'at, saqca ca lli'imqa' naq'en.

⁷ Ca shiÿaxaua da nachi 'eetec de'eda, no'on da sa iuennatapega da huo'o ca ÿaconguet, chigoqo'ot ñi qadataxala' Dios.

⁸ Cha'ayi ca shiÿaxaua da saq ÿataxalguete naua lhuennataxaco, camayi ÿoqta sa ishit da quegue ca 'oonolec lataxac.

⁹ Ca qadqaÿa da huo'otaq choxodaq, camayi no'on da ÿataqta machiguiñi qom ivita ca na'a'q da Dios nauaxaÿaxaashiguem.

¹⁰ Nachi 'en'am ca sallaxanec, camayi no'on da ÿataqta machiguiñi qom ivita ca na'a'q da 'ico' qañi'iguelaxajñi. Cha'ayi cam hueto'ot ca nsallaxa, camayi 'eeta'am ana lauoxo na 'auaqpi da sa ishit da 'eetai'.

¹¹ Cha'ayi da ivita da nnoxooshiguem añi nala', nachi ÿataqta saqalota na l'edaxa. Qaq na 'auaqpi nachi daqaqa, qaq ana lauoxo najñi, nachi imeuo da lyaquiaxac. Nachi 'eeta'am nataq'en ca hueto'ot ca nsallaxa, chochi 'ico' daqaqtalec da l'onataxanaxac.

Ñi'iguenataguec ca shiÿaxaua da qaÿayin

¹² Ÿataqta machiguiñi ca shiÿaxaua qom huelec da lhualaxavic da n'añaxateguet ca ñi'iguenataguec. Cha'ayi qom mashi inoxonaqchitteec de'eda ñi'iguenataguec, nachi ÿaconguet da nca'alaxa, 'ico' nshiitenaqte qanqoÿin. De'eda nca'alaxa nachida da Dios ÿachaxanapeguem ca shiÿaxaua mayi ÿauotec ñimayi.

¹³ Qom huo'o ca 'oonolec nomteguet ca lhuennataxac da i'ot ca sa ÿaÿamaxañi, sa ishit qome da ipettega da nachiñi ñi Dios ÿami' que'eca lhuennataxac. Cha'ayi ñimayi sa ishit da huetacot ca sa ÿaÿamaxañi da i'ot, qataq sa ishit da ÿasaxalec ca 'oonolec da chochi ÿi'iguenec ca sa ÿaÿamaxañi.

¹⁴ Chaqdata da ñi 'oonolec shiÿaxaua maichi queueegue qataq ÿayin da maichi lqopitaxanaqtaic, qaq nachida da que'emaxam.

¹⁵ De'eda sa ÿaÿamaxañi nqopitaxanaqtaic, damayi deco'oic da ñi'itaxaloxo. Qaq de'eda ñi'itaxaloxo da ivita yi laloqo' da 'ico' mashi ÿi, nachi yi'oq da 'ico' deco'oic da nleuaxa.

¹⁶ Qami' ÿaqaÿa't, qami' ñauochaxa'u, sa ishito' qome da qanatenachiitapeguela't.

¹⁷ 'Enauac na ÿaÿamaqchiguiñi qataq nalochiguiñi mayi qomi' qoÿanema, namayi chigaqshiguem, chigoqtot ñi Dios ñim l'onata ana ishit da icoÿadelecna. Ñimayi sa ishit da nadalaxajla't, qataq sa ishit da nqochin, 'ico' ca lpaqal.

¹⁸ Ñimayi qomi' namaxalo da l'aqtac mayi i'axat da 'eesa lataxac da qomi' nca'alaxatreec, cha'ayi nshitaique da qomi' 'ico' l'auaxanqa ala na 'enauac l'onatac. Qaq damayi nachida da maichi lhuennataxac.

Da n'amqajnataxanaxac mayi ÿataqta 'eesa lataxac

¹⁹ Ÿoqo'oyi qami' ÿaqaÿa't, qami' ñauochaxa'u, ñi 'oonolec da qoñiita no'on da ÿataqta lhuotta da n'axaÿaxan, qalaxayi iuen da npottelec da ltaxaÿaxac, qataq saqaÿoqchiguinguit da lalemataic.

²⁰ Cha'ayi ca shiÿaxaua lemataqaic sa ishit da i'ot ca ÿaÿamaxadeeta ñi Dios.

²¹ Qaq ÿoqo'oyi qau'aqaÿa'a 'enauac na ishit da ishipaxanaqchit ca shiÿaxaua qataq 'enauac na sa ÿaÿamaxañisat. Chaqdata da qami' huosotte' da qauacoñiiguet da l'aqtac ñi Dios mayi mashi qoÿaalguete naua qadquiyaqchilli', cha'ayi de'eda n'aqtac ishit da qami' nca'alaxatreec.

²² Qalaxayi qau'ochi cam qami' ÿapaxaguenque da n'aqtac. Sa ishit da chochi qan'axaÿaxañiitega. Cha'ayi da nachi qoñiita'ac de'eda, qaq 'en'am da chochi qanatenachiitapeguela't.

²³ Cha'ayi ca chochi n'axaÿaxaatega da n'aqtac, qalaq sa ishit da ÿalaxalec da i'ot, camayi 'eeta'am ca shiÿaxaua da ilolec aca tannaxai da imeten da lashiguiaxac.

²⁴ Chochi imeten ca 'eetec da lashiguiaxac. Ime, qaq jec. Qaÿata'ague, nachi icoua'ai ca 'eetec.

²⁵ Qaq ca sa ishit da icoua'ai cam hua'aqchigui, chaqdata da ilotelec cam 'enapec dam nalochiguiñi nqataxac mayi ishit da qomi' huosochiyiñi naq'en, qataq quetelec damayi da ÿataqta i'ot cam 'enapec, que'eca shiÿaxaua cam ÿacoolec da i'ot, qalaq ÿataqta machiguiñi.

²⁶ Da huo'o ca ipi'itaxaatega da ÿataqta 'amqajnataxanaxaic, qalaxayi sa ishit da icoñidai' ñi lachaxat, camayi maichi natenachittapeguela't. Qaq da l'amqajnataxanaxac ÿataqta saqca ca naigui.

²⁷ Da n'amqajnataxanaxac mayi ÿataqta imeteeta ñi qadta'a Dios da ÿataqta qui'itta qataq saqca ca huetapoigui nasouaxashit, damayi 'eeta': ca shiÿaxaua itauan ca saqcaua caua lta'al qataq aca pa'ai mayi huetaigui da nque'ejnaxac, qataq ÿataqta ndenguet 'enauac na sa ÿaÿamaxañisat mayi huetalec ana 'alhua.