Romanos 9 - Nuevo Testamento Toba Sur

Na llalaqpi so Israel lca'aguishicpi ñi Dios

¹ Ÿataqta 'eesa de'eda sa'axattac, cha'ayi aÿim sa'amaqten so Cristo, qaq sa ishit da chochi satenataxaatac. Cha'ayi da ivilÿaxac chigoqchigui so Espíritu Santo da aÿim i'axatem da ÿoqta aÿim 'eesa.

² Qataq aÿim ÿataqta saquicota qataq añi iquiyaqte chochi tateec da lqui'ic.

³ Cha'ayi aÿim mashi sovida'a da ñishitaique da aÿim ÿamaqauec ñi Dios da yaqto' aÿim qaÿoqta naq'en so Cristo, souaxat na ÿaqaÿañicpi mayi maichi ÿalamaxat iuo' l'ecpi, da huo'otaq damayi ishit da naigui ca no'on laÿamqa' namayipi.

⁴ Cha'ayi namayipi maichi llalaqpi so Israel, qataq ñi Dios ÿaconguet namayipi da 'eeta'am naq'en da llalaqpi. Ñi Dios ÿataqta hueta'aguet co'ollaxa naq'en namayipi da lli'oxoyic qataq da chigoqta'ague somayipi ÿanem ñi 'oonolec da naÿamaxataxac, qataq ÿanem so nqataxacpi mayi chigoqo'ot naq'en so Moisés, qataq dam lataxac da qaÿi'oxoden ñimayi da huaigui aso ñi'oxonnataxanaxaqui, qataq ÿanem nam ÿachaxanapecpi.

⁵ Namayipi maichi llalaqpi som hua'au qadta'alpi. Qaq da yi'oqchigui lapachiyaxac namayipi chigoqtoigui so Cristo som qoÿanagui da qadta'a Dios da ilo'ogue 'enauacna, da yaqto' nachi 'eetai' da qaÿi'oxodeetac. Aja', nachi 'eetec de'eda.

⁶ Qaq sa ishit da huo'otaq sa ipaguelec nam ÿachaxanapecotpi ñi Dios so Israel, qalaxayi nam llalaqpi so Israel sa ishit da ima'a't da lalamaxatpi ñi Dios.

⁷ Cha'ayi na llalaqpi so Abraham sa ishit da 'enauac namayipi da llalaqpi ñi Dios. Chaqdata da ñi Dios 'eeta': “Chigoqchigui qome ñi Isaac ca 'ai'alaqpi.”

⁸ Qaq 'eda da huo'o mshi qomi' saÿajnaq da qaica ca ishit da llalec ñi Dios, souaxat da maichi nhuo' l'ec. Cha'ayi nachaqcata cam chigoqchigui da ÿachaxanapec co'ollaxa ñi Dios, qaq 'ica mayi ÿoqta 'eesa da qaÿamata'ac da llalaqpi ñi Dios.

⁹ Cha'ayi dam ÿachaxanapecot co'ollaxa ñi Dios so Abraham 'eeta': “Qom ivita ca ÿaloqnec, nachi aÿim ñanac qome, nachi añi Sara huo'o qome ca llalec.”

¹⁰ Qaq damayi sa ishit da nachaqdata, cha'ayi nataq'en soua dos llalqa aso Rebeca, soomayi 'oonolec so lta'a', som hua'au qadta'a Isaac.

^11-13 Cha'ayi soomayi co'ollaq saxanaxa da ñiyiñi, qataq saxanaxa da huo'otaq huo'o ca i'ot ca no'on huo'otaq ca qauem, qalaq ñi Dios 'enapega aso Rebeca, 'eeta': “Yim ÿi yiua 'ai'alqa, nachiyi qome yi l-latac yim n'asa.” Qaq damayi nateeteguet da 'enapec naua ñiyigui'shi l'aqtaqa ñi Dios mayi 'eeta': “Ÿauotaxat so Jacob, qaq so Esaú qalaxayi sa ishit.” Huaña, nachi ÿoqta yi'oqteec da 'eetec ñi Dios da maichi lca'ateu'a cam tajlec yi lavilÿaxac da iÿaxana, qaq sa ishit da ilotagui ca 'eetec ca i'ottac.

¹⁴ Qaq ÿoqo'oyi ¿chaq huá'ague ca 'eetec ca qad'aqtac? ¿Peta'a ñi Dios ishit da i'ot ca sa ÿaÿamaxañi? ¡'A'i, sa ishit!

¹⁵ Cha'ayi co'ollaq 'eetega so Moisés, qalaq 'eeta': “Sechoxoden cam ñishitaique da sechoxoden, qataq ñoqouaguec cam ñishitaique da ñoqouaguec.”

¹⁶ Qaq ÿoqo'oyi sa ishit qone' da chigoqchigui ca maichi 'eetapeguec qataq ca l'añaxac ca shiÿaxaua, cha'ayi nachaqcata cam maichi chigoqchigui da nqouaguec ñi Dios.

¹⁷ Cha'ayi naua ñiyigui'shi l'aqtaqa ñi Dios na nettrañi co'ollaq ñimayi 'enapega so nta'a mayi ilotague' yi Egipto, 'eeta': “'Am sanagui da 'am nta'a, cha'ayi ñishitaique da 'am sachigoxotchigui da sachaxan da i'añaxac, qataq yaqto' ishit da ÿauatton da i'enaxat 'enauac nam huetalec ana 'alhua.”

¹⁸ Qaq 'eda da 'eetec da ñi Dios da nqouaguec cam tajlec da nqouaguec qataq qadamchigui naq'en añi lquiyaqte cam tajlec da qadamchigui naq'en.

¹⁹ Qaq 'am peta'a ishit da aÿim qonapega da qoneta': “Da huo'otaq nachi 'eetec de'eda, nachi ¿tá'ainco' qone' ñi Dios da ÿauo'o ca lasouaxashit ca shiÿaxaua? Cha'ayi ¿négue't ca ishit da dataÿa'aguet ca maichi 'eetapeguec?”

²⁰ Qaq 'am shiÿaxaua, ¿négue't 'am da 'anshitaique da 'ancotaÿapegue' ñi Dios? ¿Peta'a ishito' aca n'oxona 'alhua da 'enapega cam i'oxon da 'eeta': “Tá'ainco' yi aÿim qonetec de'eda?”

²¹ Cha'ayi cam 'alhua l'o mayi huo'o naq 'enec da maichi ÿoiqueetac ca 'eetec da i'ot que'eca 'alhua. Camayi ishit da ÿachigoxotaigui que'eca 'alhua da i'ot aca 'alhua mayi taiguet da ñi'oxoyic qataq acam taiguet da chochi ndaxac.

²² Qaq ÿoqo'oyi ¿huá'ague ca qoÿiitec ca n'aqtac, da huo'otaq ñi Dios nshitaique da ÿachaxan da 'eetec da huo'o ca ÿauo'o ca nhuaxanaguec qataq da l'añaxac, nachi huo'o da lhualaxavic da n'añaxateguet nam 'itchiguiñi taÿa'a da qaÿauo'o ca nhuaxanaguec qataq tai'a da qanlaxajñi?

²³ Cha'ayi ñimayi i'ot de'eda, cha'ayi nshitaique da qomi' ÿauattonaxanaxanque da lta'adaic lli'oxoyic, qomi' mayi qomi' nqouagueque, qataq qomi' ÿaqataxanai'salo co'ollaxa da nshitaique da ñiuanaqhua'a da lli'oxoyic ñimayi.

²⁴ Cha'ayi ñi Dios da qomi' iÿaxanalo, qalaq huo'o na chigoqtoigui naq'en na judiopi, qataq na laÿipi huo'o na chigoqtoigui naq'en na saq judiopi.

²⁵ Qaq ipacchigui da 'enapec naua l'aqtaqa ñi Dios mayi ÿilyiñi so Oseas, co'ollaq 'eeta': Nam sa ishit da ÿalamaxatpi, qalaq seÿaxana da ÿalamaxatpi, qataq nam sa ishit da sauotec, qalaq seÿaxana da ÿauotaxatpi.

²⁶ Qaq yim huaña co'ollaxa da qoÿinapega namayipi da qoÿiita': “Qami' sa ishit da qami' ÿalamqa'te,” qaq nachiyi yi huaña da qaiÿaxana namayipi da llalaqpi ñim Dios mayi nca'altauec.

²⁷ Qaq nam Israel llalaqpi, qalaq so Isaías co'ollaq detaxaÿa, qalaq 'eeta': “Nai'ctaxa da ÿataqta qalota na llalaqpi so Israel da 'eeta'am na lsochi na 'alhua mayi hueto'ot na loigue aso auaxai, qalaxayi nachaqcata cam saq 'amaqtaq n'onañi, nachica cam nca'aleec.

²⁸ Cha'ayi ñi qadataxala' ÿataqta ipacchiguilo naua l'aqtaqa mayi ÿa'n 'enauac ana 'alhua, qataq ÿataqta saqaÿaloq naq'en.”

²⁹ Qaq ipacchigui nataq'en co'ollaxa da 'enapec so Isaías, co'ollaq 'eeta': Ñim Dios mayi lataxala' 'enauac nam piguem l'ecpi, da huo'otaq sa ishit da huo'o ca n'onaxatañi nam qoyalaqpi, nachi sogotéctaxa da sovidaqa'a da shinaqta'am soua la ciudad Sodoma qataq so Gomorra.

Da no'on qad'axaÿaxac nataq'en taÿa'a na judío l'ecpi

³⁰ Qaq ÿoqo'oyi ¿chaq huá'ague ca 'eetec ca qad'aqtac? Yi nam sa ishit da judiopi qataq sa ishit da nmittaique da ÿaÿamaxadeeta ñi Dios, qalaq nachina nam ÿaÿamaxadeeta ñi Dios, chigoqchigui da lpi'iÿaxac.

³¹ Qamaq nam Israel l'ecpi mayi quetague' nam nqataxacpi mayi ishíttaxa da ÿaÿamaxadeeta naq'en ñi Dios, qalaxayi namayipi sa ishit da ÿañoxot da ipaguelec nam nqataxacpi.

³² Qaq ¿chaq tá'ainco'? Qomyi souaxat namayipi da sa ishit da npogoxoinapegue' da chigoqchigui da lpi'iÿaxac da ÿaÿamaxadeeta ñi Dios, chaqdata da ipactega nam maichi l'onataxanaxacpi. Qaq ÿoqo'oyi namayipi qui'aqaisop so Cristo mayi 'eeta'am ca coma' nsalviaxala',

³³ som i'axat naua ñiyigui'shi l'aqtaqa ñi Dios, mayi 'eeta': Aÿim sanangui qome na laiñi yi Sión cam 'en'am ca coma' mayi ishit da qaiqui'aqaisop, cam coma' mayi ishit da 'ico' nsalviaxala', qaq cam i'amaqten camayi, qaq sa ishit da n'aloxootac.