Romanos 8 - Nuevo Testamento Toba Sur

Da 'eetec da achaalataxac mayi chigoqo'ot so n'Espíritu ñi Dios

¹ Qaq ÿoqo'oyi nagui sa ishit da qaÿauo'o ca nhuaxanaguec cam mashi sogote da n'attau'a so Cristo Jesús, cam mashi sa ishit da quegue cam qauem 'eetapeguec da lapachiyaxac, chaqcata cam 'eetapeguec som Espíritu Santo.

² Cha'ayi dam l'añaxac so Espíritu mayi ÿan da achaalataxac, damayi aÿim huesoueguesop naq'en da l'añaxac da ñi'itaxaloxo qataq da nleuaxa, chigoqchigui naq'en da mashi qan'attau'a so Cristo Jesús.

³ Cha'ayi ñi Dios i'ot co'ollaxa dam sa ishit da ÿañoxot da i'ot nam nqataxacpi mayi chigoqo'ot so Moisés. Cha'ayi na nqataxacpi qaica ca l'añaxac souaxat da lapachiyaxac na shiÿaxauapi. Nachi ñi Dios namaq so lalamaxat llalec da 'eeta'am naq'en ca shiÿaxaua, da yaqto' ishit da qaÿalauat da ishiiten da ñi'itaxaloxo. Qaq 'eda da 'eetec da huo'o mshi ñimayi namaq so llalec da 'eeta'am naq'en ca 'itaxaloxoic shiÿaxaua. Huaña, nachi ÿachigoxotchigui de'eda lapachiyaxac somayi da nlaxajñi da l'añaxac da ñi'itaxaloxo.

⁴ Qaq 'eetec de'eda ñimayi, cha'ayi nshitaique da qomi' ishit da so'otaq 'enauac nam damaxasoxoolec nam nqataxacpi. Cha'ayi qomi' mashi sa ishit da qolaqtague' cam qauem 'eetapeguec dam qadapachiyaxac, chaqcata cam 'eetapeguec som Espíritu.

⁵ Cha'ayi cam iuennatapega cam 'eetapeguec da lapachiyaxac, camayi quetague' da lhuennataxac da maichi lapachiyaxac. Qaq cam iuennatapega cam 'eetapeguec so Espíritu Santo, nachi camayi i'ot cam 'eetapeguec somayi.

⁶ Cha'ayi da qaiuennatapega cam 'eetapeguec da napachiyaxac, qaq damayi naigui da nleuaxa. Qaq da qaiuennatapega cam 'eetapeguec so Espíritu, qaq damayi naigui da achaalataxac qataq da nlagaxayic.

⁷ Cha'ayi cam iuennatapega cam 'eetapeguec da lapachiyaxac, nachi camayi ÿataqta deloctague' ñi Dios, cha'ayi sa ishit da nañan da hueto'ot na lqataxacpi ñimayi, qataq ÿataqta sa ishit da nañoxojla't.

⁸ Qaq ÿoqo'oyi cam quetague' da 'eetapeguec da maichi lapachiyaxac, nachi camayi sa ishit da ÿaÿamaxaden ñi Dios.

⁹ Qalaxayi qami' mashi sa ishit da qoquiitague' cam 'eetapeguec da qadapachiyaxaqui. Chaqdata da qoquiitague' cam 'eetapeguec so Espíritu Santo, qom ÿoqta 'eesa da qami' netanguita so Espíritu mayi chigoqo'ot ñi Dios. Qaq cam sa ishit da netanguit so Espíritu mayi chigoqo'ot so Cristo, nachi camayi sa ishit da lalamaxat somayi.

¹⁰ Cha'ayi so Cristo da mashi qami' nachattaiguilo, nachi nca'aleec som qoquiÿapegue' qadqui'ii, cha'ayi mashi ime da qami' ÿaÿamaxadeete' ñi Dios, qaq nai'ctaxa da huo'otaq de'eda ñi'itaxaloxo ishit da ÿalauat da qad'oquiaxaqui.

¹¹ Cha'ayi da mashi qami' netanguita som n'Espíritu ñi Dios mayi nca'alaxateeguesop naq'en da nleuaxa so Cristo Jesús, qaq ñimayi nachiñi qome ñi qami' ÿanema ca dalaxaic nachaalataxac da qad'oquiaxaqui mayi taÿa'a da ileu, qalaxayi ÿachigoxotchigui qome naq'en som n'Espíritu mayi qami' netanguita.

¹² Qaq ÿoqo'oyi qami' ÿaqaÿa't, qomi' huo'o de'eda qanqataxac, qalaxayi sa ishit da nachida da qadapachiyaxac da qolaxague cam qauem 'eetapeguec.

¹³ Cha'ayi qami' da huo'otaq chaqdata da qoquiitague' cam maichi 'eetapeguec da qadapachiyaxaqui, nachi ishit da qadellivi. Qalaxayi da chigoqchigui qanqashiñi so Espíritu Santo da 'ico' qaualauachi nam 'eetapegueguesat de'eda qadapachiyaxaqui, nachi ishit da qadca'allivic.

¹⁴ Cha'ayi 'enauac nam lataxala' so Espíritu mayi chigoqo'ot ñi Dios, nachi namayipi 'enauac llalaqpi ñi Dios.

¹⁵ Cha'ayi som Espíritu mayi qami' qauacoñiiguet, somayi sa ishit da i'ot da qami' nlataqa naq'en, qataq sa ishit da ÿoltaq ÿauo'o ca qadcolanqai. Chaqdata da somayi qami' i'otegueta da qami' llalqa naq'en ñi Dios. Qataq se'eso Espíritu itaxaÿaxanaxanec naq'en ñi 'oonolec da shinaqta da 'eeta': “'Am ita'a Dios.”

¹⁶ Qataq se'eso Espíritu nachi huaxaiguet ñi qolaqpegue' qadqui'i da i'axa't da qomi' mashi qomi' llalqa ñi Dios.

¹⁷ Qaq nagui da mashi qomi' llalqa ñi Dios, nachi nataq'en ishit da saconaxaguet cam qomi' ÿachaxanapeguema ñimayi. Qalaxayi ÿataqta ñiuanaqte' so Cristo, qaq lamaaxa nagui da ÿataqta qanque'ejnaxaua somayi, da yaqto' ishit qome da ñiuanaqhua'a cam lli'oxoyic somayi.

¹⁸ Cha'ayi 'eesa da huo'oi naua qanque'ejnaxaco de'eda qanachaalataxac mayi souaqtaigui nagui, qalaxayi sa ishit da 'en'am ñaqshin cam ñaq natai' ñi'oxoyic mayi ñiuanaqhua'a qome.

¹⁹ Cha'ayi ÿataqta lta'adaic da lyaxa 'enauac nam l'onatacpi ñi Dios da iuatta'a que'eca na'a'q qom ivita da na llalaqpi ñi Dios qaÿachaxan ca 'eetec ca lataxac.

²⁰ Cha'ayi nam n'onatacpi mayi qoÿanguet co'ollaxa da ishit da nlaguiñi, qaq damayi sa ishit da maichi lhuennataxac namayipi, cha'ayi ñi Dios nachi 'en'ac naq'en namayipi. Qalaxayi ñaqaiyita huo'o da aquitaxac

²¹ da ne'ena seloqtaigui n'onatacpi ishit da huesoueguesop de'eda nlataguec qataq dam 'eetec da qanlaxajñi namayipi, da yaqto' ishit da nhuanau'a cam qaica ca 'eeta'am lli'oxoyic nam llalaqpi ñi Dios qom qaisouec.

²² Cha'ayi saÿajnaq da 'enauac na l'onatacpi ñi Dios ñaq 'eetalec nagui da 'ico' dachotta'am da nqui'ic, 'eeta'am aca 'alo da deco'otapigui'.

²³ Qaq saqnata namayipi da 'ico' dachottac, nataq'en qomi', nai'ctaxa da mashi qomi' netanguita so Espíritu Santo som l'auaxanec da qomi' qoÿanema. Qalaq ñaqaiyita ÿataqta lta'adaic da pa'atauo qanqui'ic da sayinaqta'aguet que'eca na'a'q qom qomi' ÿacongueta ñi Dios da ÿoqta qomi' llalqa qataq da isouec da qad'oquiaxac.

²⁴ Cha'ayi nachida de'eda qanaquitaxac da qomi' nca'alaxatreec. Cha'ayi ca 'oonolec da huo'otaq ilota'a cam naquitta'a, nachi damayi sa ishit da aquitaxac. Cha'ayi cam mashi qailota'a, nachi sa ishit da iuen da qanaquitta'a.

²⁵ Cha'ayi cam ñaquitaqtaique, da huo'otaq saxanaxa da yi'oq, nachi ishit da ÿataqta huo'o da qadhualaxavic da seuataqta'a.

²⁶ Qaq nachi 'en'am nataq'en so Espíritu Santo qomi' itaua'n, souaxat da qaica ca qad'añaxac. Cha'ayi qomi' sa ishit da saÿajnaq ca lataxac cam qanqouagaxaunaique. Qalaxayi nachiso so Espíritu nqouagaxaunot ñi Dios da qomi' nqouagaxaueelguete, qalaxayi naua nachoxonnaxaco somayi ÿataqta sa ishit da qaivi' da qai'axateguelo ca naigui.

²⁷ Qaq ñim Dios mayi imeteeta'pe naua nquiyaqtel, ñimayi ÿaÿaten cam 'eetega so Espíritu. Cha'ayi so Espíritu nqouagaxaunaique cam ÿaÿamaxadeeta ñi Dios da nqouagaxaueelec nam lalamaxatpi ñimayi.

Ÿataqta qomi' 'añaxaiqa

²⁸ Cha'ayi qomi' saÿajnaqta da ñi Dios ÿaqataxanai' 'enauac na lataxaguesat da ÿauotaique chigoqchigui naq'en da ÿaÿamaxatchiguiñi da lliquiaxac nam ÿauotec ñimayi mayi maichi lÿaxanataguishicpi co'olloxochiyi da ÿauotaique nca'alaxateec.

²⁹ Cha'ayi nam nal'ena co'ollaxa da ÿauattonpi ñi Dios, qaq nachina nam lca'au'a co'olloxochiyi ñimayi, da yaqto' 'eeta'am naq'en so llalec, yaqto' so llalec 'eeta'am ca ñaxanec da ÿataqta qalota na lqaÿañicpi.

³⁰ Qaq nam lca'aguishicpi co'ollaxa ñi Dios, nachi nataq'en iÿaxana. Qaq nam lÿaxanataguishicpi ñimayi nataq'en ÿanagui da ÿataqta ÿaÿamaxadeeta qataq nhuanau'a naq'en da lli'oxoyic.

³¹ Qaq ÿoqo'oyi ¿chaq huá'ague ca 'eetec ca qad'aqtac de'eda? Da huo'otaq qomi' hueta'agueta ñi Dios, nachi ¿négue't ca ishit da qomi' npa'agueneto? ¡Qomyi qaica!

³² Cha'ayi ñim Dios mayi ÿataqta sa ÿauota'ac so lalamaxat llalec, chaqdata da ÿanguet da nalaataguec souaxat da shinaqta. Qaq ¿táloxochiyictoxo' da sa lÿateec naq'en so llalec da qomi' ÿanema 'enauacna, da yaqto' qadalamaxat?

³³ Qaq ÿoqo'oyi ¿negue'tom ca ishit da ÿauo'o ca lasouaxashit cam lca'aguishic ñi Dios? Cha'ayi ñim Dios mayi i'axat da qaica ca lasouaxashit camayi.

³⁴ Qataq ¿négue't ca ishit da ÿauo'o ca lasouaxashit ca shiÿaxaua? ¡Qaica! Cha'ayi so Cristo nachiso so ileu, qaltaq jec da nca'aleeguesop qanqoÿin da nleuaxa. Ime, qaq nso'oota'ague da aloic ñi Dios, nachi nachoxodeetapeguelec da shinaqta.

³⁵ Qaq ÿoqo'oyi ¿négue't ca ishit da nqanaxat da lauotaxanaqtaic so Cristo da shinaqta? ¿Peta'a nachida da qanque'ejnaxac, huo'otaq da huo'o da qadqalaic, huo'otaq da qancanaguec, qadqouaxa, huo'otaq qaica ca qanapogoña, huo'otaq ca lchic, huo'otaq da nleuaxa? ¡'A'i, qaica!

³⁶ Qaq ipacchigui da 'enapec naua ñiyigui'shi n'aqtaqa, 'eeta': 'Am sasouaxalec da imauec yi na'a'q da qomi' qaÿauecta'alo da qadeleuaxa; qomi' qoÿiita'ama qanqoÿin aca qaguetapi da qaÿauecta'a ca nalaataqa'.

³⁷ Qalaxayi 'enauac namayipi senoxotaqchiviigui. Chaqdata da ÿataqta qomi' 'añaxaiqa, da qad'añaxac chigoqchigui som qomi' lauotaqa'te.

³⁸ Qaq ÿoqo'oyi ÿataqta 'eesa ñaq'en da sa ishit da huo'o ca ishit da nqanaxat da lauotaxanaqtaic ñi Dios da shinaqta. Nai'ctaxa da huo'otaq nleuaxa, huo'otaq da achaalataxac, huo'otaq nam namaxashicpi piguem l'ecpi qataq nam damaxasoxonapecpi qataq nam n'añaxacpi mayi saq cha'a, huo'otaq nam souaqtaigui nagui qataq cam ñaq natauo,

³⁹ huo'otaq nam hueto'ot na piguem qataq nam huetaña na pa'aguiñi, qataq 'enauac na laÿipi l'onatacpi ñi Dios, qaica ca ishit da ÿañoxot da nqanaxat da lauotaxanaqtaic da shinaqta ñi Dios dam ÿachigoxotchigui naq'en so qadataxala' Cristo Jesús.