Romanos 7 - Nuevo Testamento Toba Sur

Qaÿaloqnaxana da nhuaÿaxac

¹ Qami' ÿaqaÿa't, qami' mayi qauauattoñi na nqataxacpi, qaq qauaÿajñi da ne'ena nqataxacpi, namayipi nllitañi que'eca shiÿaxaua da huo'otaq ña nca'altauec.

² Qaq saloqnaxana aca 'alo mayi mashi huadon, acamayi na nqataxacpi ña ncoñitta'ai' naq'en ca lhua qom huo'otaq camayi ña nca'altauec. Qalaxayi que'eca lhua qom huo'otaq ileu, nachi acamayi ishit da huesoueguesop na nqataxacpi mayi icoñitta'aguet naq'en camayi.

³ Qaq ÿoqo'oyi acamayi da huo'otaq huadonguet ca lÿa ÿale, da huo'otaq ña nca'altauec ca lhua, nachi acamayi qaÿamata'ac da ncachaxai. Qalaxayi que'eca lhua da huo'otaq mashi ileu, nachi acamayi nsoueguesop ne'ena nqataxacpi. Nachi acamayi ishit da huadonguet ca lÿa shiÿaxaua. Qaq sa ishit da qaÿamata'ac da ncachaxai.

⁴ Qaq nachi 'eetec nataq'en qami' ÿaqaÿadolqa mayi qan'ayiitau'a da l'oquiaxac so Cristo, 'eeta'am da mashi qaullivi, da yaqto' qoquiÿa'ai na nqataxacpi, da yaqto' ishit da 'ico' qaltaq qauadoñi. Nachi nagui qaq qami' lalamqa'te so Cristo som nca'alaxateeguesop naq'en ñi Dios da nleuaxa, da yaqto' so'onataxanqot ñi Dios da so'otaq ca ÿaÿamaqchiguiñi.

⁵ Cha'ayi co'ollaq qomi' ñaq qolaqtague' da qadapachiyaxac, nachi ne'ena nqataxacpi, namayipi ÿayiita'a nam qauem 'eetapeguecpi dam qad'oquiaxac. Qaq nachida da qomi' ÿauecta'alo da qadeleuaxa.

⁶ Qalaxayi nagui mashi seleuaq, da yaqto' soqolqa'ai na nqataxacpi mayi qomi' icoñittai'salo. Huaña, nachi ÿataqta qomi' huesochiyiñi, da yaqto' so'onataxanqot ñi Dios dam dalaxaic qanachaalataxac mayi chigoqo'ot so Espíritu Santo. Qaq mashi sa ishit da souaqto'oto naua nqataxaco mayi qoÿittrañi.

Na ÿotta'a't qauem shiitapeguecpi

⁷ Qaq ÿoqo'oyi ¿chaq huá'ague ca 'eetec ca qad'aqtac? ¿Peta'a qauem na nqataxacpi? ¡'A'i, sa ishit! Cha'ayi aÿim sa ishit co'ollaxa da saÿaten chaq negue't dam ñi'itaxaloxo, da huo'otaq sa ishit da aÿim da'aqtaxanem na nqataxacpi. Qaq chochi saloqnaxana da aÿim sa ishit da saÿaten ca lataxac da huo'otaq qaÿoqopitta'a ca ÿaqa'a, da huo'otaq aÿim sa da'aqtaxanem na nqataxacpi, da 'eeta': “Sa ishit qome da 'auqopitta'a ca ÿaqa'a.”

⁸ Qalaxayi de'eda ñi'itaxaloxo co'ollaq ÿanata da 'eetec, nachi do'onataxana de'eda namaxasoxonaxac, da yaqto' ÿayina'a 'enauac na ÿotta'a't qauem shiitapeguecpi. Cha'ayi ne'ena nqataxacpi da huo'otaq qaica, nachi de'eda ñi'itaxaloxo sa ishíttaxa da huo'o ca l'añaxac.

⁹ Cha'ayi huo'o co'ollaxa so na'a'q da aÿim chochi ñica'altauec, qaq sa ishit da sauatton na nqataxacpi. Qalaxayi co'ollaq sauatton de'eda namaxasoxonaxac, nachi de'eda ñi'itaxaloxo nca'aleec, qaq aÿim qalaq 'ico' seleu.

¹⁰ Huaña, nachi de'eda namaxasoxonaxac mayi ishíttaxa da aÿim nca'alaxateec, mataq 'ico' aÿim ÿaueca'a da ileuaxa.

¹¹ Cha'ayi de'eda ñi'itaxaloxo, co'ollaq ÿanata da 'eetec, nachi do'onataxana de'eda namaxasoxonaxac, nachi aÿim ÿatenachit, qataq chigoqchigui naq'en de'eda namaxasoxonaxac da aÿim ÿalauat.

¹² Qaq ÿoqo'oyi ne'ena nqataxacpi, namayipi chigoqo'ot ñi Dios. Qaq ñim 'oonolec nam namaxasoxonaxacpi mayi chigoqo'ot ñimayi, ÿaÿamaqchiguiñi cam 'enapec, qataq i'ot cam no'on.

¹³ Qaq ¿peta'a ne'ena no'on nqataxacpi nachina na aÿim ÿauega ca ileuaxa? ¡'A'i, sa ishit! Cha'ayi nachida dam ñi'itaxaloxo da aÿim ÿasouaxateguet da seleu. Huaña, qaq damayi maichi ÿachaxan da lataxac co'ollaq do'onataxana dam no'on. Qaq 'eda da 'eetec da namaxasoxonaxac da i'axategue da llic da ñi'itaxaloxo da ÿataqta qauem.

¹⁴ Cha'ayi qomi' saÿajnaq da saq cha'a na nqataxacpi. Qaq aÿim, qalaxayi yi'oqchigui da chochi aÿim shiÿaxaua, shiita'am da 'ico' aÿim qaimen da yaqto' aÿim l-latac da ñi'itaxaloxo.

¹⁵ Cha'ayi aÿim sa ishit da saÿaten cam shiita, souaxat da sa ishit da so'ot cam ÿataqta shiitapeguec. Nda'a't cam ÿataqta saÿimec, qaq nachica so'ot.

¹⁶ Qalaxayi que'eca sa saÿamaxaden da huo'otaq nachica so'ot, nachi aÿim maichi saÿaten da ÿataqta no'on ne'ena nqataxacpi.

¹⁷ Qaq sa ishit da nachaÿim da so'ot camayi, cha'ayi nachida da ñi'itaxaloxo mayi huetaigui añi iquiyaqte.

¹⁸ Cha'ayi aÿim saÿaten da sa ishit da huo'o ca ÿaÿamaqchiguiñi huetaigui da yi'oqchigui ÿapachiyaxac. Qaq nai'ctaxa da aÿim huo'o da iyaxa da so'ot ca ÿaÿamaqchiguiñi, qalaxayi sa ishit da sañoxot da so'ot.

¹⁹ Qaq sa ishit da so'ot cam ÿaÿamaqchiguiñi mayi seuennatapega, chaqdata da shicto'ot da so'ottac cam sa ishit da seuennatapega.

²⁰ Qaq ÿoqo'oyi da huo'otaq so'ot cam sa ishit da seuennatapega, nachi sa ishit da nachaÿim da so'ot camayi, cha'ayi nachida da ñi'itaxaloxo mayi huetaigui añi iquiyaqte.

²¹ Qaq 'edacnaxa da 'eetec da souaigui, 'eeta': Da huo'otaq ñishitaique da so'ot ca ÿaÿamaqchiguiñi, qalaq ndoteec da sa ÿaÿamaxañi mayi aÿim huetaigui da so'ot.

²² Cha'ayi dam iquiyaqteÿaxac mayi aÿim pa'ataigui noqopita nam nqataxacpi mayi chigoqo'ot ñi Dios.

²³ Qalaxayi huo'o da lÿa sela'a da huetaigui da i'oquiaxac, damayi deloctague' dam iuennataxac. Qaq damayi nachida dam lamaxasoxonaxac dam ñi'itaxaloxo mayi huetaigui da i'oquiaxac, qataq aÿim icoñittai'.

²⁴ Qaq ¡ÿataqta choxodaicolec aÿim! ¿Negue'tom ca ishit da aÿim huesoueguesop naq'en de'eda i'oquiaxac mayi aÿim ÿauecta'a da ileuaxa?

²⁵ Qaq nachaqñita ñi Dios mayi ishit da ÿachigoxotchigui naq'en so qadataxala' Jesucristo. ¡Ñi'achic ñi ita'a Dios! Qaq ÿoqo'oyi aÿim nagui saÿateeta da ÿataqta ñañanot da so'ot na lqataxacpi ñi Dios. Qaq dam yi'oqchigui ÿapachiyaxac, qalaxayi l-latac dam lamaxasoxonaxac dam ñi'itaxaloxo.